Manchu Manoj Game Show: మంచు మనోజ్ ‘ఉస్తాద్‌’ గేమ్‌ షో షురూ, తొలి ఎపిసోడ్‌లో నాని సందడి!

Manchu Manoj Game Show: మంచు మనోజ్‌ హోస్ట్‌ గా వస్తున్న సెలబ్రిటీ గేమ్‌ షో ‘ఉస్తాద్‍’. ఈటీవీ విన్‌ ఓటీటీ వేదికగా ఈ నెల 15 నుంచి ప్రసారం కానుంది. తాజాగా ఈ షో తొలి ఎపిసోడ్ ప్రోమో విడుదల అయ్యింది.

Manchu Manoj Ustaad Game Show: యంగ్ హీరో మంచు మనోజ్‌ సరికొత్త గేమ్ షోతో ప్రేక్షకులను అలరించబోతున్నారు. ఆయన హోస్ట్ గా ‘ఉస్తాద్‍’ పేరుతో సెలబ్రిటీ గేమ్ షో ఆడియెన్స్ ముందుకు రాబోతోంది. డిసెంబర్ 15 నుంచి ఈటీవీ విన్ ఓటీటీ వేదికగా స్ట్రీమింగ్ కానుంది. ఈ ప్రతిష్టాత్మక గేమ్ షోను పీపుల్ మీడియా ఫ్యాక్టరీ బ్యానర్ లో టీజీ విశ్వ ప్రసాద్ నిర్మిస్తున్నారు. తాజాగా ఈ గేమ్ షో తొలి ఎపిసోడ్ కు సంబంధించిన ప్రోమో విడుదల అయ్యింది.

తొలి ఎపిసోడ్ లో నాని సందడి

‘ఉస్తాద్‍’ ర్యాంప్‍ ఆడిద్దాం గేమ్ షోకు సంబంధించిన ఫస్ట్ ఎపిసోడ్ లో నేచురల్ స్టార్ పాల్గొన్నారు. ఈ సందర్భంగా మంచు మనోజ్ తో ఆయన కలిసి చేసిన అల్లరి ప్రేక్షకులను బాగా అలరించింది. ఫన్నీ ముచ్చట్లు, పవర్ ఫుల్ డైలాగులు, దుమ్మురేపే డ్యాన్సులు ఆడియెన్స్ ను ఆకట్టుకున్నాయి. నాని నటించి ‘హాయ్ నాన్న’ సినిమా త్వరలో విడుదల కానున్న నేపథ్యంలో ప్రమోషన్ లో భాగంగా ఆయన ఈ షోలో పాల్గొన్నారు. నానితో పాటు మరో అతిథి కూడా ఈ షోలో పాల్గొన్నది. ఆమె ఎవరో సెలబ్రిటీ కాదు, నాని వీరాభిమాని శ్రీ ప్రియ. ‘ఉస్తాద్’ షోలో పాల్గొని నానితో కలిసి గేమ్ ఆడింది. ఇక తన అభిమాని గురించి నాని చాలా గొప్పగా చెప్పారు. “ఈమె నాకంటే ఫేమస్.. తన పేరు శ్రీ ప్రియ. ఇప్పటి వరకు ఆమె నాకు అభిమాని, ఇకపై నేను ఆమెకు అభిమానిని’ అని చెప్పుకొచ్చారు. ఈ ప్రోమోలో నాని, శ్రీ ప్రియ కలిసి గేమ్ ఆడుతున్న సన్నివేశాలు ఆసక్తి కలిగిస్తున్నాయి.  ఇంతకీ ఈమె గేమ్ లో ద్వారా ఎంత అమౌంట్ ను తీసుకెళ్లింది? అనేది డిసెంబర్ 15న తెలియనుంది. ఇప్పటికే ఈ షో గురించి మంచు మనోజ్ కీలక విషయాలు వెల్లడించారు. ఈ షో ఒక్కో ఎపిసోడ్ కి రూ.50 లక్షలు ప్రైజ్ మనీ ఉంటుందన్నారు. తొలి ఎపిసోడ్ లో నాని గెలుచుకున్న అమౌంట్ మాత్రం తన అభిమానికి వెళ్తుందని చెప్పారు.

తొలి సీజన్ గెస్టులు ఎవరంటే?

మరోవైపు ‘ఉస్తాద్’ గేమ్ షో తొలి సీజన్ లో మంచు ఫ్యామిలీ నుంచి ఎవ్వరూ పాల్గొనడం లేదని తెలుస్తోంది. రెండో సీజన్ లో వారి ఫ్యామిలీ మెంబర్స్ ఎంట్రీ ఇచ్చే అవకాశం ఉందని టాక్. తొలి సీజన్ లో నేచురల్ స్టార్ నాని, మాస్ మహారాజ రవితేజ, అడవి శేష్ సహా మరికొంత మంది పాల్గొననున్నట్లు తెలుస్తోంది.

రెండు సినిమాల్లో నటిస్తున్న మంచు మనోజ్     

మంచు మనోజ్ ‘ఉస్తాద్’ గేమ్ షోతో పాటు రెండు సినిమాల్లో నటిస్తున్నారు. వాటిలో ఒకటి ‘వాట్ ది ఫిష్’. శరవేగంగా ఈ సినిమా షూటింగ్ జరుగుతోంది. వచ్చే ఏడాదిలో ఈ సినిమా ప్రేక్షకుల ముందుకు రానుంది. అటు ‘అహం బ్రహ్మస్మి’ అనే మరో సినిమాలోనూ ఆయన నటిస్తున్నారు.  2017లో వచ్చిన ‘ఒక్కడు మిగిలాడు’ సినిమా తర్వాత మంచు మనోజ్ మళ్లీ తెరమీద కనిపించలేదు.