Sarkaru Vaari Paata: సూపర్ స్టార్ మహేష్ బాబు, దర్శకుడు పరశురామ్ కాంబినేషన్‌లో 'సర్కారు వారి పాట' సినిమా తెరకెక్కుతోన్న సంగతి తెలిసిందే. ముందుగా ఈ సినిమాను సంక్రాంతి కానుకగా విడుదల చేయాలనుకున్నారు. కానీ కొన్ని కారణాల వలన సినిమాను వాయిదా వేయాల్సి వచ్చింది. ఫైనల్ గా సమ్మర్ కానుకగా మే 12న విడుదల చేయబోతున్నట్లు ప్రకటించారు.
 
ప్రస్తుతం ఈ సినిమా షూటింగ్ దశలో ఉంది. ఇదిలా ఉండగా ఈ నెల 14న ప్రేమికుల దినోత్సవం సందర్భంగా సినిమాలో తొలి పాట 'కళావతి...' విడుదల చేయనున్నట్లు చిత్రబృందం ప్రకటించింది. దీనికి సంబంధించిన ఓ పోస్టర్ ను, సాంగ్ ప్రోమోను విడుదల చేశారు. అయితే చిత్రబృందం విడుదల చేయకముందే 'కళావతి' సాంగ్ లీకైపోయింది. ఈ విషయంలో చిత్రయూనిట్ తో పాటు మహేష్ ఫ్యాన్స్ చాలా బాధపడ్డారు. 

 

సంగీత దర్శకుడు తమన్ ఆవేదన చెందుతూ.. సోషల్ మీడియాలో ఓ ఆడియో బైట్ ను షేర్ చేశారు. తన హార్ట్ బ్రేక్ అయిందంటూ ఎమోషనల్ గా మాట్లాడారు. సాంగ్ లీక్ అవ్వడంతో ఇప్పుడు చెప్పిన టైం కంటే ముందుగానే 'కళావతి' సాంగ్ ను విడుదల చేశారు. సిద్ శ్రీరామ్ పాడిన ఈ పాటకు అనంత్ శ్రీరామ్ లిరిక్స్ అందించారు. 
  

 

మహేష్ బాబు కెరీర్‌లో 27వ సినిమాగా రాబోతున్న ఈ సినిమాను మైత్రి మూవీ మేకర్స్, 14 రీల్స్ ప్లస్, జి.మహేష్ బాబు ఎంటర్‌టైన్‌మెంట్ బ్యానర్స్ సంయుక్తంగా నిర్మిస్తున్నాయి. ఈ సినిమాలో మహేష్ సరసన కీర్తి సురేష్ హీరోయిన్‌గా నటిస్తోంది. సుబ్బరాజు, వెన్నెల కిషోర్ కీలక పాత్రలు పోషిస్తున్నారు. ఈ సినిమా తర్వాత త్రివిక్రమ్ దర్శకత్వంలో మహేష్ బాబు చేయనున్న సినిమా సెట్స్ మీదకు వెళ్లనుంది. అందులో పూజా హెగ్డే హీరోయిన్ గా నటిస్తోంది.