సూపర్ స్టార్ మహేష్ బాబు నటిస్తోన్న 'సర్కారు వారి పాట' సినిమా షూటింగ్ దశలో ఉంది. పరశురామ్ డైరెక్ట్ చేస్తోన్న ఈ సినిమాపై ప్రేక్షకుల్లో భారీ అంచనాలు నెలకొన్నాయి. రీసెంట్ గానే ఈ సినిమా నుంచి 'కళావతి' అనే సాంగ్ ను విడుదల చేశారు. ఈ పాట యూట్యూబ్ లో రికార్డులు సృష్టించింది. చాలా మంది ఈ పాటకు రీల్స్ చేస్తూ.. సోషల్ మీడియాలో షేర్ చేస్తున్నారు.
ఇప్పుడు మహేష్ బాబు కూతురు సితార కూడా 'కళావతి' పాటకు స్టెప్పులేసింది. ఈ వీడియోను తన ఇన్స్టాగ్రామ్ లో షేర్ చేస్తూ.. #KalaavathiChallenge అంటూ అభిమానులకు ఓ ఛాలెంజ్ విసిరింది. 'కళావతి' పాటకు రీల్స్ చేసి #KalaavathiChallenge పేరుతో వీడియోలను షేర్ చేయాలని కోరింది. అందులో తనకు నచ్చిన వీడియోలను ఇన్స్టాగ్రామ్ స్టోరీస్ లో పెట్టుకుంటానని చెప్పింది.
మొత్తానికి సితార తన తండ్రి సినిమాకి ఈ విధంగా ప్రమోషన్స్ మొదలుపెట్టేసిందన్నమాట. చిన్న వయసులోనే సితార తన వీడియోలు, ఫొటోలతో అభిమానులను సంపాదించుకుంది. ఆమెకి ఇన్స్టాగ్రామ్ లో ఐదు లక్షలకు పైగా ఫాలోవర్లు ఉన్నారు.
ఇక మహేష్ బాబు కెరీర్‌లో 27వ సినిమాగా రాబోతున్న 'సర్కారు వారి పాట'ని మైత్రి మూవీ మేకర్స్, 14 రీల్స్ ప్లస్, జి.మహేష్ బాబు ఎంటర్‌టైన్‌మెంట్ బ్యానర్స్ సంయుక్తంగా నిర్మిస్తున్నాయి. ఈ సినిమాలో మహేష్ సరసన కీర్తి సురేష్ హీరోయిన్‌గా నటిస్తోంది. సుబ్బరాజు, వెన్నెల కిషోర్ కీలక పాత్రలు పోషిస్తున్నారు. మే 12న సినిమాను విడుదల చేయడానికి ప్లాన్ చేస్తున్నారు. ఈ సినిమా తర్వాత త్రివిక్రమ్ దర్శకత్వంలో మహేష్ బాబు చేయనున్న సినిమా సెట్స్ మీదకు వెళ్లనుంది. అందులో పూజా హెగ్డే హీరోయిన్ గా నటిస్తోంది.