Kartikeya Fiance: అలా మొదలైంది.. ఇదీ హీరో కార్తికేయ రియల్ లవ్ స్టోరీ

కార్తికేయ త్వరలోనే పెళ్లి పీటలు ఎక్కనున్నాడనే సంగతి తెలిసిందే. ఈ సందర్భంగా కార్తికేయ.. ఆమెను ఎప్పుడు ఎక్కడ చూశాడో తెలిపాడు.

‘ఆర్‌ఎక్స్ 100’తోనే తన విశ్వరూపం చూపించిన నటుడు హీరో కార్తికేయ గుమ్మకొండ. మొదటి చిత్రం ప్రేక్షకుల్లోకి వెళ్లకపోయినా.. రెండో చిత్రమైన ‘ఆర్ఎక్స్ 100’తో యువ అభిమానులను సంపాదించుకున్న కార్తికేయ.. ఇప్పుడు తమిళ సినీ పరిశ్రమలో కూడా అడుగుపెట్టాడు. ప్రముఖ హీరో అజిత్ కుమార్ నటిస్తున్న ‘వాలిమై’ సినిమాలో కనిపించనున్నాడు. ప్రస్తుతం తెలుగులో ‘రాజ విక్రమార్క’ సినిమాలో కార్తికేయ నటిస్తున్నాడు. 

తాజాగా కార్తీకేయ ఎంగేజ్మెంట్ ఫొటోలు సోషల్ మీడియాలో వైరల్‌గా చక్కర్లు కొట్టాయి.  ‘‘అరే.. ఒక్క మాటైనా చెప్పలేదేంటి బ్రో..’’ అని అతని అభిమానులు చాలా ఫీలైపోయారు. దీంతో ట్విట్టర్ ద్వారా తనకు కాబోయే భార్య గురించి, ఆమెను ఎప్పుడు ఎక్కడ చూశాడో తెలిపాడు. 2010లో నిట్ వరంగల్‌లో లోహితా రెడ్డిని తొలిసారి చూశానని కార్తికేయ తెలిపాడు. దాదాపు దశాబ్ద కాలం నాకు బెస్ట్ ఫ్రెండ్‌గా ఉన్న లోహితాతో నాకు ఎంగేజ్మెంట్ జరిగిందని, త్వరలోనే ఆమె తనతో జీవితంలో భాగం కానుందని వెల్లడించాడు. ఈ సందర్భంగా లోహితతో పదేళ్ల కిందట తీసుకున్న ఫొటోను కూడా పోస్ట్ చేశాడు. అయితే, లోహిత కార్తికేయ కుటుంబానికి దగ్గర బంధువని కూడా తెలిసింది. కార్తికేయ తన పెళ్లి ఎప్పుడనేది మాత్రం చెప్పలేదు. 

‘ఆర్ఎక్స్ 100’ తర్వాత కార్తికేయ ‘హిప్పీ’, ‘గుణ 369’, ‘90 ఎంఎల్‌’, ‘చావు కబురు చల్లగా’ సినిమాల్లో నటించాడు. నానీ హీరోగా నటించిన ‘గ్యాంగ్‌లీడర్‌’ సినిమాలో విలన్‌గానూ మెప్పించాడు. కార్తికేయ కథానాయకుడిగా ప్రస్తుతం శ్రీ సరిపల్లి దర్శకత్వంలో ‘రాజా విక్రమార్క’ సినిమా షూటింగ్ జరుగుతోంది. కార్తికేయ సరసన తాన్య రవిచంద్రన్ నటిస్తోంది. లవ్, యాక్షన్ చిత్రంగా తెరకెక్కుతున్న ఈ చిత్రాన్ని రామారెడ్డి నిర్మిస్తున్నారు.  

కార్తికేయ హైదరాబాద్‌లోనే పుట్టి పెరిగాడు. తల్లిదండ్రులకు వనస్థలిపురంలో ఒక స్కూల్ ఉంది. వరంగల్‌లోని నేషనల్ ఇనిస్టిట్యూట్ ఆఫ్ టెక్నాలజీలో గ్రాడ్యూయేషన్ పూర్తిచేసిన తర్వాత కార్తికేయ నటన వైపు మొగ్గు చూపాడు. కార్తికేయ 2017లో ‘ప్రేమతో మీ కార్తిక్’ సినిమాతో పరిచమయ్యాడు. అయితే, 2018లో విడుదలైన ‘ఆర్‌ఎక్స్ 100’ సినిమాతోనే గుర్తింపు పొందాడు. దీంతో అంతా అదే అతడి మొదటి సినిమా అని చాలామంది భావిస్తారు. ‘చావు కబురు చల్లగా’ సినిమాలో మాస్ క్యారెక్టర్‌తో కార్తికేయ మంచి మార్కులే కొట్టేశాడు.