నిఖిల్ హీరోగా తెరకెక్కిన తాజా సినిమా ‘కార్తికేయ-2’. చందూ మొండేటి దర్శకత్వంలో తెరకెక్కిన ఈ చిత్రం సస్పెన్స్ థ్రిల్లర్ గా రూపొందింది. ఈ నెల 13న జనాల ముందుకు వచ్చిన ఈ సినిమా తొలి షో నుంచే హిట్ టాక్ తెచ్చుకుంది. తెలుగులోనే కాదు.. ఇతర భాషల్లోనూ మంచి విజయాన్ని అందుకుంది. నార్త్ లో బాలీవుడ్ బడా హీరోలను కాదని టాలీవుడ్ హీరోకు జైకొడుతున్నారు ప్రేక్షకులు. అన్ని చోట్ల మంచి వసూళ్లను రాబడుతోంది. అమీర్ ఖాన్, అక్షయ్ కుమార్ నటించిన లాల్ సింగ్ చడ్డా, రక్షాబంధన్ సినిమాలను వెనక్కి నెట్టి మరీ దూసుకెళ్తోంది.
ఎదురెళ్లి ఆహ్వానించిన బిగ్ బీ
తాజాగా ‘కార్తికేయ-2’ సినిమాను బిగ్ బీ అమితాబ్ బచ్చన్ సైతం చూశారట. ఈ సినిమా తనను ఎంతగానో ఆకట్టుకుందట. వెంటనే ఆయన ఈ సినిమా దర్శకుడు చందుకు ఫోన్ చేశారు. చక్కటి సినిమా తీయడంపై ప్రశంసలు కురిపించారు. అంతేకాదు.. దర్శకుడిని తన ఇంటికి ఆహ్వానించారు. బిగ్ బీ పిలుపుతో ఆయన ఇంటికి వెళ్లిన చందును.. ఎదురెళ్లి స్వాగతం పలికారట. ఎంతో ఆప్యాయంగా పలకరించారట. ఈ సందర్భంగా ‘కార్తికేయ-2’ సినిమా యూనిట్ మీద ప్రశంసల జల్లు కురిపించారట.
‘కార్తికేయ-2’ సినిమాతో పాటు పలు విషయాల గురించి చందుతో కాసేపు మాట్లాడారట. టాలీవుడ్, బాలీవుడ్ సినిమాల గురించి చర్చించినట్లు తెలుస్తోంది. ఈ సందర్భంగా తీసిన ఫోటోను చందు తన ఇన్ స్టాలో షేర్ చేశారు. అమితాబ్ జీ ధన్యవాదాలు.. మీ దీవెనలను జీవితంలో మర్చిపోలేను అని చెప్పుకొచ్చారు. ప్రస్తుతం ఈ ఫోటో సోషల్ మీడియాలో బాగా వైరల్ అవుతోంది. నెటిజన్లు చందును, ‘కార్తికేయ-2’ సినిమా యూనిట్ ను ప్రశంసల్లో ముంచెత్తుతున్నారు. మున్ముందుకు అమితాబ్ తో సినిమా తీసే అవకాశం చందుకు రావాలని కోరుకుంటున్నారు. వీరి కలయికలో ఆ విషయం కూడా చర్చకు వచ్చే ఉంటుందని మరికొంత మంది నెటిజన్లు అభిప్రాయపడుతున్నారు. మనమూ బిగ్ బీతో చందుకు సినిమా తీసే అవకాశం రావాలని కోరుకుందాం..
‘కార్తికేయ-2’పై ఇస్కాన్ ప్రశంసలు
ఇప్పటికే ఈ సినిమాపై ప్రసిద్ధ ఆధ్యాత్మిక సంస్థ ఇస్కాన్ ప్రశంసలు కురిపించింది. శ్రీకృష్ణుడి తత్త్వం గురించి ఈ సినిమాలో చూపించడం పట్ల సంతోషం వ్యక్తం చేసింది. ఇస్కాన్ కేంద్రం అయిన బృందావనానికి రావాల్సిందిగా కార్తికేయ-2 సినిమా యూనిట్ ను ఆహ్వానించింది. ఈ ఆహ్వానం తమకు దక్కిన గొప్ప గౌవరంగా మూవీ యూనిట్ అభిప్రాయపడింది.
భారీగా వసూళ్లు
ప్రస్తుతం ‘కార్తికేయ-2’ సినిమా సౌత్ తో పాటు నార్త్ లోనూ దుమ్మురేపుతుంది. అన్ని చోట్లా వసూళ్ల సునామీ సృష్టిస్తోంది. నార్త్ లో ‘కార్తికేయ-2’ సినిమాకు జనాలు బ్రహ్మరథం పడుతున్నారు. సినిమా మంచి సక్సెస్ టాక్ తెచ్చుకోవడంతో రోజు రోజుకు థియేటర్ల సంఖ్య సైతం పెరుగుతుంది. సినిమాకు వచ్చే వారి సంఖ్య భారీ స్థాయిలో ఉండటంతో వసూళ్లు కూడా అదే స్థాయిలో వస్తున్నాయి. ఇప్పటి వరకు వరల్డ్ వైడ్ గా ఈ సినిమా సుమారు రూ.44 కోట్ల గ్రాస్ సాధించినట్లు తెలుస్తోంది. తెలుగు రాష్ట్రాలోనే సుమారు రూ.25 కోట్ల రూపాయల గ్రాస్ వసూళ్లు చేసినట్లు సమాచారం. ఇక ఈ సినిమాలో అఖిల్ కు జోడీగా అనుపమ పరమేశ్వరన్ నటించింది. బాలీవుడ్ నటుడు అనుపమ్ ఖేర్ కీలక పాత్ర పోషించారు.
Also Read : 'లైగర్' సెన్సార్ రిపోర్ట్ - ఆ బూతు డైలాగ్స్ కట్!