Jr NTR: గోవాలో ‘దేవర’ షూటింగ్, ఎన్టీఆర్ కొత్త లుక్ అదిరిందిగా!

జూ. ఎన్టీఆర్, కొరటాల శివ కాంబోలో తెరకెక్కుతున్న తాజా చిత్రం ‘దేవర’. ప్రస్తుతం ఈ సినిమా షూటింగ్ గోవాలో జరుగుతోంది. ఈ నేపథ్యంలో ఎన్టీఆర్ కు సంబంధించిన ఓ ఫోటోను చిత్రబృందం అభిమానులతో పంచుకుంది.

Devara Movie: యంగ్ టైగర్ ఎన్టీఆర్, బాలీవుడ్ బ్యూటీ జాన్వీ కపూర్ జంటగా నటిస్తున్న లేటెస్ట్ మూవీ ‘దేవర’. కొరటాల శివ దర్శకత్వంలో ఈ ప్రతిష్టాత్మక చిత్రం తెరకెక్కుతోంది. సముద్రం బ్యాక్ డ్రాప్ లో ఈ సినిమా రూపొందుతోంది.   ‘జనతా గ్యారేజ్’ సినిమా తర్వాత ఎన్టీఆర్-కొరటాల శివ కాంబినేషన్ లో వస్తున్న ఈ చిత్రంపై ప్రేక్షకులలో భారీగా అంచనాలు నెలకొన్నాయి. అంచనాలకు తగినట్లుగానే ఈ మూవీకి సంబంధించి విడుదలైన పోస్టర్లు, టీజర్ ప్రేక్షకులను బాగా ఆకట్టున్నాయి. ప్రస్తుతం ఈ సినిమా షూటింగ్ శరవేగంగా కొనసాగుతోంది.

వైరల్ అవుతున్న ఎన్టీఆర్ నయా లుక్

తాజాగా ‘దేవర’ సినిమాకు సంబంధించిన షూటింగ్ గోవాలో జరగుతోంది. తాజా షెడ్యూల్ లో పలు యాక్షన్ సన్నివేశాలతో పాటు జాన్వీ, ఎన్టీఆర్ పై ఓ పాటను చిత్రీకరిస్తున్నట్లు తెలుస్తోంది. ఈ సందర్భంగా చిత్రబృందం ఎన్టీఆర్ కు సంబంధించి ఓ ఫోటోను అభిమానులతో పంచుకుంది. ఈ ఫోటోలో ఎన్టీఆర్ సరికొత్త లుక్ లో ఆకట్టుకుంటున్నారు. నిలువు గీత చొక్కా, ఎడమ భుజం మీద కండువా, మెడలో రుద్రాక్ష, చెవికి దిద్దు, చేతికి కడియంతో పాటు లుంగీతో దర్శనం ఇచ్చాడు. దర్శకుడు కొరటాల శివ వెనుక నిల్చొని ఉండగా, ఎన్టీఆర్ ముందు వైపు తీక్షణంగా చూస్తున్నట్లుగా కనిపిస్తుంది. ఈ ఫోటో చూసి అభిమానులు ఫుల్ ఖుషీ అవుతున్నారు. ఎన్టీఆర్ లుక్ చాలా బాగుందని కామెంట్స్ పెడుతున్నారు. అటు గోవాలో సముద్రం దగ్గర షూటింగ్ జరుగుతుండగా ఎన్టీఆర్ సముద్రంలో నుంచి నడుచుకుంటూ వస్తున్న ఓ చిన్న వీడియో క్లిప్ లీక్ అయింది. ప్రస్తుతం ఈవీడియో బాగా వైరల్ అవుతోంది.   

‘దేవర’లో ఎన్టీఆర్ డ్యుయెల్ రోల్

ఇక ఈ సినిమాలో ఎన్టీఆర్ రెండు పాత్రలు పోషిస్తున్నారు. తండ్రి, కొడుకులుగా కనిపించనున్నట్లు తెలుస్తోంది. ఓ పాత్రకు జంటగా జాన్వీ కపూర్ ఓకే కాగా, రెండో పాత్రకు శృతి మరాఠేని ఫిక్స్ చేశారు. ఈ చిత్రం భారతదేశంలోని తీర ప్రాంతాల కథ నేపథ్యంలో రెండు భాగాలుగా ఈ సినిమా తెరకెక్కుతోంది. మే 20 ఎన్టీఆర్ బర్త్ డే సందర్భంగా ఈ సినిమాకు సంబంధించిన ఫస్ట్ సింగిల్ ను రిలీజ్ చేయాలని మేకర్స్ ప్రయత్నిస్తున్నట్లు తెలుస్తోంది. ‘దేవర’ సినిమాను ఎన్టీఆర్ ఆర్ట్స్‌, యువసుధ ఆర్ట్స్ సంయుక్తంగా తెరకెక్కిస్తున్నాయి. అనిరుధ్ రవిచందర్ సంగీతం అందిస్తున్నారు. ‘దేవర’ గ్లింప్స్ కు ఆయన అందించిన సంగీతం ఓ రేంజిలో ఆకట్టుకోవడంతో సాంగ్స్ మరో లెవల్ లో ఉంటాయని సినీ అభిమానులు భావిస్తున్నారు. మొదటి భాగం 'దేవర పార్ట్ -1' దసరా కానుకగా అక్టోబర్ 10న ప్రేక్షకుల ముందుకు రానుంది.