టాలీవుడ్ లో నటిగా, దర్శకురాలిగా పలు సినిమాలు చేసిన జీవితా రాజశేఖర్.. తన భర్త ప్రధాన పాత్రలో 'శేఖర్' అనే సినిమాను తెరకెక్కించారు. ఈ సినిమాను మే 20న విడుదల చేయబోతున్నారు. దీంతో ప్రమోషన్స్ మొదలుపెట్టారు. ఇటీవల జరిగిన ఓ ఈవెంట్ లో జీవిత చేసిన వ్యాఖ్యలు దుమారాన్ని రేపాయి. తమ కులాన్ని కించపరిచిందంటూ ఓ వర్గం ఆమెపై ఫైర్ అవ్వడంతో.. బహిరంగంగా క్షమాపణలు చెప్పారామె.
తను ఒకలా చెబితే మరో విధంగా అర్ధం చేసుకున్నారని.. ఎవరినైనా నొప్పించి ఉంటే క్షమించమని కోరారు. ఇదే సమయంలో తన కుటుంబంపై వస్తోన్న వార్తలపై స్పందించారు. తన మీద వచ్చినన్ని వార్తలు వేరేవాళ్ల మీద రావేమోనని అన్నారు. మొన్నామధ్య తన కూతురు బాయ్ ఫ్రెండ్ తో దుబాయ్ కి వెళ్లిందని తప్పుడు ప్రచారం చేశారని మండిపడ్డారు. ఒకసారి శివాత్మిక అంటారు, ఇంకోసారి శివానీ ప్రియుడితో పారిపోయిందని రాస్తారని ఫైర్ అయ్యారు.
తీరా వార్త ఓపెన్ చేసి చూస్తే.. అందులో రాసున్నదానికి టైటిల్ కి అసలు సంబంధం ఉండదని అన్నారు. తమ కుటుంబం మొత్తం కలిసి దుబాయ్ కి వెళ్లామని.. దానికే ప్రియుడితో దుబాయ్‌కు లేచిపోయారని వార్తలు రాశారని.. ఇలా తప్పుడు ప్రచారాలు చేస్తే ఎంతో మంది జీవితాలు ప్రభావితం అవుతాయని అన్నారు. 'గరుడ వేగ' సినిమా వివాదం కోర్టులో ఉందని.. అక్కడ తేలకముందే ఏదేదో రాస్తున్నారని అన్నారు. నిజంగా తప్పు చేశామంటే రోడ్డు మీద నిలబెట్టి కొట్టండి.. ఎవరూ కాదనం.. కానీ నిజాలు తెలుసుకోకుండా తప్పుడు ప్రచారాలు చేయొద్దంటూ ఆవేదన వ్యక్తం చేశారు.