ప్రముఖ నటుడు కమల్ హాసన్ ప్రస్తుతం దర్శకుడు శంకర్ దర్శకత్వంలో ‘ఇండియన్ 2’ సినిమాలో నటిస్తున్నారు. గతంలో వీరిద్దరి కాంబోలో ‘భారతీయుడు’ అనే సినిమా విడుదలైంది. ఈ సినిమా ఎంత హిట్ అయింతో అందరికీ తెలిసిందే. దీంతో ఇప్పుడు వీరిద్దరి కాంబో లో మళ్లీ వస్తోన్న ఈ సినిమాపై భారీ అంచనాలే ఉన్నాయి. ప్రస్తుతం ఈ సినిమా షూటింగ్ దశలో ఉంది. చెన్నైలో కొన్ని సన్నివేశాలను చిత్రీకరిస్తున్నారు. తాజాగా కమల్ హాసన్ ‘ఇండియన్ 2’ సెట్ లో కనిపించారు. ఈ ఫోటోలలో కమల్ ఇంటర్నేషనల్ స్టంట్ టీమ్ తో చర్చిస్తున్నట్లు కనిపిస్తోంది. ఇందులో స్టంట్ టీమ్ ‘ఇండియన్ 2’ అనే టీ షర్ట్స్ ను ధరించి ఉన్నారు. ఈ ఫోటోలు సోషల్ మీడియాలో వైరల్ అవుతున్నాయి.
కమల్ హాసన్ ప్రధాన పాత్రలో నటిస్తోన్న ‘ఇండియన్ 2’ మూవీ టీమ్ చెన్నై ఆదిత్య రామ్ స్టూడియోస్ లో ఫ్రిబ్రవరి 17 న లాంగ్ షూటింగ్ షెడ్యూల్ ను ప్రారంభించింది. 30 రోజుల పాటు జరిగే ఈ షూటింగ్ లో ఇటీవలే కాజల్ అగర్వాల్ కూడా పాల్గొంటుంది. కొన్ని రోజుల క్రితమే కాజల్ సోషల్ మీడియాలో ‘ఇండియన్ 2’ షూటింగ్‌లో ఉన్నానంటూ ఒక ఫోటోను షేర్ చేసింది. ప్రెగ్నెన్సీ తో కొంత కాలంగా సినిమాలకు దూరంగా ఉంటున్న కాజల్ సుదీర్ఘ ప్రసూతి విరామం తర్వాత తిరిగి ఈ సినిమా షూటింగ్ లో జాయిన్ అయింది.
నిజానికి ఈ ‘ఇండియన్ 2’ సినిమా అనౌన్స్ చేసినప్పటి నుంచీ చాలా సార్లు అనేక కారణాల వలన సినిమా షూటింగ్ వాయిదా పడుతూ వచ్చింది. గతంలో సినిమా సెట్స్ లో భారీ క్రేన్ ప్రమాదం జరిగింది. ఈ ప్రమాదంలో ముగ్గురు సిబ్బంది మరణించారు, మరో పది మందికి గాయాలయ్యాయి. దర్శకుడు శంకర్ కు కూడా గాయాలయ్యాయి. దీంతో ఈ మూవీ షూటింగ్ కొన్ని రోజులు వాయిదా పడింది. తర్వాత కోవిడ్ కారణంగా మరికొన్ని రోజులు వాయిదా పడింది. దీంతో ఈ సినిమా అసలు పూర్తవుతుందా అనే ప్రశ్నలు తలెత్తాయి. కానీ మొత్తానికి ఇప్పుడు ‘ఇండియన్ 2’ సినిమా సెట్స్ పైకి వెళ్లింది. ఇక ఈ సినిమాను రెడ్ జెయింట్ మూవీస్ తో కలసి లైకా ప్రొడక్షన్స్ కలసి నిర్మిస్తున్నారు. సోమసుందరం, ఢిల్లీ గణేష్, జయప్రకాష్, వెన్నెల కిషోర్ తో పాటు తదితర నటీనటులు నటిస్తున్నారు. ఈ సినిమాకు ప్రముఖ సంగీత దర్శకుడు అనిరుధ్ సంగీతాన్ని అందిస్తున్నారు.
కమల్ హాసన్ ప్రస్తుతం వరుస సినిమాలతో దూసుకెళ్తున్నారు. గతేడాది ‘విక్రమ్’ సినిమాతో బ్లాక్ బస్టర్ హిట్ అందుకున్నారు కమల్. ఇక తన తదుపరి సినిమా మణిరత్నం తో కలసి చేయనున్నారు. ఈ సినిమా ఈ ఏడాది చివర్లో సెట్స్ పైకి వెళ్లనుందని సమాచారం. అంతేకాకుండా కమల్ తర్వాత లోకేష్ కనగరాజ్ దర్శకత్వంలో ‘విక్రమ్ 2’ సినిమాలో కూడా నటించనున్నారు.
Read Also: అల్లు అర్జున్ రిజెక్ట్ చేసిన హిట్, ఫ్లాప్ మూవీస్ ఇవే? బన్నీ ఫ్యాన్స్ షాకవ్వడం పక్కా!