తెలుగు చిత్ర పరిశ్రమపై కరోనా కన్ను పడింది. వరుసపెట్టి ఒక్కొక్కరుగా వైరస్ బారినపడుతూనే ఉన్నారు. తాజాగా మెగాస్టార్ చిరంజీవి తాను ఎన్ని జాగ్రత్తలు తీసుకున్నా కరోనా పాజిటివ్ వచ్చినట్టు సోషల్ మీడియాలో ప్రకటించారు. అలాగే హీరో శ్రీకాంత్ కూడా తనకు కరోనా సోకినట్టు ట్విట్టర్ లో ప్రకటించారు. వీరిద్దరు ఓకేసారి ప్రకటించడంతో శంకర్ దాదా సినిమాను గుర్తు చేసుకుంటున్నారు అభిమానులు. ఆ సినిమాలో చిరు శంకర్ దాదాగా, శ్రీకాంత్ ‘ఏటీఎమ్’గా నటించిన సంగతి తెలిసిందే. వీరిద్దరూ కరోనా బారిన పడినట్టు ఒకేరోజు ప్రకటించారు.
హీరో శ్రీకాంత్ ట్విట్టర్లో ‘గత కొన్ని రోజులుగా వైరస్ లక్షణాలు కనిపించాయి. జాగ్రత్తలు తీసుకున్నప్పటికీ కోవిడ్ పాజిటివ్ సోకింది. ఈ మధ్య నన్ను కలిసిన వారిందరికీ నేను విన్నవించేది ఒక్కటే లక్షణాలు కనిపిస్తే ఒకసారి చెక్ చేయించుకోండి’అని ట్వీట్ చేశారు. మహేష్ బాబు, రామ్ చరణ్, డైరెక్టర్ తరుణ్ భాస్కర్, థమన్, మంచు లక్ష్మీ, రాజేంద్రప్రసాద్... ఇలా చాలమంది తాజాగా కరోనా బారిన పడ్డారు.
చేతినిండా సినిమాలు...
మొన్నటి వరకు హీరోగా చేసిన శ్రీకాంత్ ఇప్పుడు విలన్ గా మారారు. ఆయనకు నెగెటివ్ రోల్స్ వరుసకడుతున్నాయి. అఖండ సినిమాలో విలన్ గా మెప్పించడంతో ఆయనకు మరో ఆఫర్ వచ్చింది. మెగా హీరో రామ్ చరణ్, డైరెక్టర్ శంకర్ కాంబినేషన్లో తెరకెక్కుతున్న చిత్రంలో కూడా ఆయన విలన్ రోల్ చేయబోతున్నారు. ఇందులో క్యారెక్టర్ చూసి అందరూ షాక్ తింటారని ఓ ఇంటర్యూలో శ్రీకాంత్ చెప్పారు. అతని కొడుకు రోషన్ కూడా హీరోగా మారాడు. ఇప్పటికే రెండు సినిమాల్లో నటించారు. అతనికి కూడా వరుస ఆఫర్లు వస్తున్నాయి. 2015లో వచ్చిన రుద్రమదేవి సినిమాలో చిన్నప్పటి చాళుక్యవీరభద్రుడి పాత్రలో నటించాడు రోషన్. తరువాత 2016లో నిర్మలా కాన్వెంట్ అనే సినిమాలో హీరోగా కనిపించాడు. తరువాత 2021లో పెళ్లిసందడి సినిమాతో మంచి పేరు తెచ్చుకున్నాడు. ఇప్పుడు ఎంతో మంది బడా నిర్మాతలు రోషన్ తో సినిమా చేసేందుకు సిద్దంగా ఉన్నట్టు సమాచారం.