మత్య్సకారుల జీవన ముఖ చిత్రం ఇతి వృత్తంగా తెరకెక్కుతున్న సినిమా షూటింగ్ కోసం హీరో అక్కినేని నాగ చైతన్య సిక్కోలు తీరంలో సందడి చేశారు. ఈ మేరకు ఎచ్చెర్ల రూరల్ డి. మత్య్సలేశం తీర ప్రాంతానికి డైరక్టర్ చందూ మొండేటి, ప్రొడ్యూసర్ బన్ని వాసుతో హీరో అక్కినేని నాగ చైతన్య చేరుకున్నారు. సినిమాల్లో కనిపించే హీరో ఒక్క సారిగా తమ తీర ప్రాంతానికి రావడంతో మత్య్సకారుల ఆనందానికి హద్దుల్లేకుండా పోయాయి. ఒక్కసారిగా వారంతా నాగ చైతన్య ను చూసేందుకు ఎగబడ్డారు. నాగ చైతన్యతో ఫోటోలు తీసుకునేందుకు తాపత్రయపడ్డారు.
భద్రత సిబ్బంది ఎంత కట్టడి చేస్తున్నప్పటికీ వారంతా తమ అభిమాన నటుడిని చూసేందుకు, మాట్లాడేందుకు పోటీ పడ్డారు. ముందుగా నిర్వహించిన విలేకర్ల సమావేశంలో డైరక్టర్ చందూ మొండేటి, ప్రొడ్యూసర్ బన్ని వాసు, హీరో అక్కినేని నాగ చైతన్య మాట్లాడారు. నాగ చైతన్య మాట్లాడుతూ.. గత ఆరు నెలల క్రితం దర్శకుడు చందు మొండేటి మత్య్సకారుల జీవన విధానంపై కథ వినిపించారని మనస్సుకు ఎంతో బాగా నచ్చి ఈ ప్రాజెక్టు చేయాలని భావించానని అన్నారు. మత్య్సకారుల జీవన విధానం తెలుసుకునేందుకు సిక్కోలు తీర ప్రాంతం డి. మత్య్పలేశం గ్రామానికి వచ్చానని నాగచైతన్య తెలిపారు. బన్ని వాస్ మాట్లాడుతూ నిజ జీవితంలో జరిగిన యదార్థ గాధను ఇతి వృత్తంగా చేసుకొని గీతా ఆర్ట్స్ బ్యానర్ పై తెరకెక్కించామని వెల్లడించారు.
నాగచైతన్య తన తర్వాతి సినిమా పనుల్లో బిజీ అయ్యారు. పాన్ ఇండియా స్థాయిలో మత్స్యకారుల వెతలపై ఈ సినిమా రూపుదిద్దుకోనుంది. ఈ చిత్రానికి చందూ మొండేటి దర్శకత్వం వహిస్తున్నారు. గీతా ఆర్ట్స్ బ్యానర్‌పై దీన్ని నిర్మిస్తున్నారు.
2024లో పక్కా ప్లానింగ్‌తో నాగ చైతన్య
నాగ చైతన్య రీసెంట్ గా నటించిన సినిమాలు ఆశించినంత విజయాన్ని అందుకోలేకపోయిన సంగతి తెలిసిందే. అందుకే ఈసారి పక్కా ప్లానింగ్ తో వచ్చి హిట్లు అందుకోవాలని చూస్తున్నారు చైతన్య. అందుకే తనకు మంచి హిట్ లు అందించిన శివ నిర్వాణ, చందూ మొండేటి లతో ఒకేసారి సినిమాలు చేస్తున్నారు. ఇప్పటికే జాలర్ల నేపథ్యంలో చందూ మొండేటితో ఒక పాన్ ఇండియా లెవల్ సినిమా చేస్తున్నారు. వీరిద్దరి కాంబినేషన్ లో గతంలో ‘ప్రేమమ్’ సినిమా వచ్చింది. ఈ మూవీ మంచి హిట్ ను అందుకుంది. దీంతో వీరిద్దరి కాంబోలో వస్తోన్న ఈ మూవీపై అంచనాలు పెరిగాయి. ఇప్పటికే ఈ సినిమాకు సంబంధించిన పనుల్లో భాగంగానే తాజాగా శ్రీకాకుళానికి వచ్చి మత్స్యకారులను కలిశారు.
ఇక ఈ సినిమాతోపాటు తనకు ‘మజిలీ’ లాంటి క్లాసిక్ హిట్ ను అందించిన శివ నిర్వాణతో కూడా ఓ సినిమా చేయడానికి ప్లాన్ చేశాడని సమాచారం. నాగ చైతన్య, సమంత కలసి నటించిన ‘మజిలీ’ మూవీ ఎంత పెద్ద హిట్ అయిందో తెలిసిందే. అందుకే ఇప్పుడు ఈ కాంబో పై కూడా మరోసారి ఉత్కంఠ నెలకొంది. త్వరలో ఈ సినిమా కూడా స్టార్ట్ అవుతుందని టాక్.