Sandeep Reddy Vanga: ముందు నీ భర్త సినిమా గురించి మాట్లాడు, ఆమీర్ ఖాన్ మాజీ భార్యకు ‘యానిమల్’ డైరెక్టర్ కౌంటర్!

Kiran Rao: ‘యానిమల్’ సినిమా గురించి ఆమీర్ ఖాన్ మాజీ భార్య కిరణ్ రావు చేసిన కామెంట్స్ కు సందీప్ రెడ్డి వంగా స్ట్రాంగ్ కౌంటర్ ఇచ్చారు. ముందు నీ భర్త సినిమాల గురించి మాట్లాడితే బాగుంటుందన్నారు.

Sandeep Reddy Vanga On Kiran Rao: బాలీవుడ్ స్టార్ హీరో రణబీర్ కపూర్ హీరోగా టాలీవుడ్ డైరెక్టర్ సందీప్ రెడ్డి వంగా తెరకెక్కించిన ‘యానిమల్’ మూవీ సంచలన విజయాన్ని అందుకుంది. రష్మిక హీరోయిన్ గా నటించిన ఈ చిత్రం బాక్సాఫీస్ దగ్గర బ్లాక్ బస్టర్ హిట్ అందుకుంది. ఏకంగా రూ. 900 కోట్లకు పైగా వసూలు చేసి సంచలనం సృష్టించింది. ప్రస్తుతం ఈ సినిమా నెట్ ఫ్లిక్స్ వేదికగా స్ట్రీమింగ్ అవుతోంది. అయితే, ఈ సినిమాపై ప్రశంసలతో పాటు విమర్శలు కూడా అదే స్థాయిలో వచ్చాయి. పలువురు ప్రముఖులు ఈ మూవీలోని సన్నివేశాలపై తీవ్ర అభ్యంతరం వ్యక్తం చేశారు. ఈ సినిమా గురించి పార్లమెంట్ లోనూ చర్చ జరిగింది. ఇలాంటి చిత్రాల వల్ల సమాజానికి తీవ్రస్థాయిలో ముప్పు తప్పదని మహిళా ఎంపీలు అభిప్రాయపడ్డారు. స్త్రీ విద్వేష సినిమాలను కట్టడి చేయాల్సిన అవసరం ఉందన్నారు.

‘యానిమల్’ మూవీపై కిరణ్ రావు విమర్శలు

ఇటీవల ‘యానిమల్‌’ సినిమాపై బాలీవుడ్ స్టార్ హీరో అమీర్ ఖాన్ మాజీ భార్య కిరణ్ రావు స్పందించారు. ఈ సినిమా స్త్రీ విద్వేషంతో నిండి ఉందని వెల్లడించింది. ‘బాహుబలి-2’, ‘కబీర్ సింగ్’ సినిమాలు సైతం స్త్రీల పట్ల ద్వేషం, వేధింపులను ప్రోత్సహించేలా ఉన్నాయని ఆరోపించారు. ‘బాహుబలి’ సినిమా ప్రారంభంలో స్త్రీ పాత్రలను బలంగా చూపించినా, చివరకు శృంగార బొమ్మలా చూపించే ప్రయత్నం చేశారని అభిప్రాయపడ్డారు. ఇలాంటి సినిమాల వల్ల సమాజానికి ఎలాంటి ఉపయోగం లేకపోగా, కీడు కలిగించే అవకాశం ఉందని వెల్లడించింది.

కిరణ్ రావుకు స్ట్రాంగ్ కౌంటర్ ఇచ్చిన సందీప్ రెడ్డి వంగా

కిరణ్ రావు విమర్శలపై దర్శకుడు డైరెక్టర్ తనదైన స్టైల్లో కౌంటర్ ఇచ్చారు. నేరుగా కిరణ్ రావు పేరును ప్రస్తావించకుండా చెప్పాల్సిన విషయాన్ని చెప్పేశారు. తన సినిమాల గురించి విమర్శించే ముందు అమీర్ ఖాన్ నటించిన ‘దిల్’ సినిమా చూడాలని సలహా ఇచ్చారు. “నా సినిమాల గురించి విమర్శించే ఆమెను ఓ విషయం చెప్పాలి అనుకుంటున్నాను. మీరు ముందుగా అమీర్ ఖాన్ నటించిన ‘దిల్’ సినిమా చూడండి. ఈ సినిమాలో ఆయన దాదాపు అమ్మాయిపై అత్యాచారం చేసేందుకు ప్రయత్నిస్తారు. ఆ అమ్మాయిదే తప్పు అనేలా చూపించే ప్రయత్నం చేస్తారు. కానీ, అదే అమ్మాయి చివరకు అతడితో ప్రేమలో పడుతుంది. ఈ సినిమాను ఎలా అర్థం చేసుకోవాలి? ముందు ఇలాంటి సినిమాల గురించి మాట్లాడిన తర్వాత మా సినిమాల గురించి మాట్లాడితే బాగుంటుంది. గతాన్ని మరిచి విమర్శలు చేయడం మంచిది కాదని గుర్తుంచుకుంటే బాగుంటుంది” అని సందీప్ రెడ్డి ఆగ్రహం వ్యక్తం చేశారు.

తండ్రి, కొడుకు మధ్య సెంటిమెంట్ ను బేస్ చేసుకుని రూపొందించిన ‘యానిమల్’ సినిమాలో బాలీవుడ్ సీనియర్ నటుడు అనిల్ కపూర్ రణబీర్ తండ్రి పాత్ర పోషించారు. ఈ చిత్రంలో విలన్ పాత్రను బాబీ డియోల్ చేశారు. మరో కీలక పాత్రలో త్రిప్తి దిమ్రీ నటించింది.