India Couture Week: ర్యాంప్ వాక్ చేసే ముందు బిర్యానీ తినాలా?- ఇదేం సలహా శోభితా?

‘ఇండియా కోచర్ వీక్ 2023‘లో శోభితా ధూళిపాళ, ఇషాన్ ఖట్టర్ ర్యాంప్ వాక్ చేసి ఆకట్టుకున్నారు. రోహిత్ గాంధీ, రాహుల్ ఖన్నా కోసం ఈ షోలో పాల్గొని ఫ్యాషన్ ప్రియులను ఆకట్టుకున్నారు.

‘ఇండియా కౌచర్ వీక్ 2023‘లో డిజైనర్లు రోహిత్ గాంధీ, రాహుల్ ఖన్నా ప్రదర్శన కోసం నటి శోభితా ధూళిపాళ, నటుడు ఇషాన్ ఖట్టర్‌ ర్యాంప్ వాక్ చేశారు. వీరిద్దరూ మొదటిసారిగా ర్యాంప్‌పై నడిచి అందరినీ అలరించారు. శనివారం రాత్రి జరిగిన ఈ షోలో సిల్వర్ మెరుపులు మెరిపించే దుస్తులతో ర్యాంప్‌పై హొయలుపోతూ కనిపించింది శోభిత.  నటుడు ఇషాన్ ఖట్టర్ బ్లాక్ బ్లేజర్, మ్యాచింగ్ ప్యాంట్‌లో కనిపించాడు. ఇద్దరూ కలిసి ర్యాంప్ మీద నడుస్తూ చూపరులను ఆకట్టుకున్నారు.

  

శోభిత వింత సలహా

షో అనంతరం శోభిత, ఇషాన్ కొద్దిసేపు మీడియాతో మాట్లాడుతూ ఫ్యాషన్ గురించి పలు విషయాలు వెల్లడించారు.  ర్యాంప్ వాక్ చేసే ముందు అనుసరించాల్సి జాగ్రతలు, చేయకూడని పనుల గురించి చెప్పాలని మీడియా ప్రతినిధులు  అడిగినప్పుడు, శోభిత ఆసక్తికర వ్యాఖ్యలు చేశారు. ర్యాంప్ వాక్ కు వెళ్లే ముందు బిర్యానీ తినాలంటూ చమత్కరించారు.  ఆమె సూచన పట్ల అందరూ పగలబడి నవ్వారు. మ్యూజిక్ అంటే తనకు ఎంతో ఇష్టం అని, ఎక్కడికి వెళ్లినా మ్యూజిక్ తప్పని సరిగి ఉంటాలని చెప్పింది. ఇషాన్ ఖట్టర్ కూడా కొన్ని ర్యాంప్ వాక్ చిట్కాలను కూడా పంచుకున్నారు. "నేను ర్యాంప్ వాక్ కు వెళ్లే ముందు ఎక్కువగా ఆలోచించకుండా ఉండేందుకు ప్రయత్నిస్తాను. షోలను, సంగీతాన్ని బాగా ఆస్వాదిస్తాను” అని చెప్పుకొచ్చారు.  

వరుస ప్రాజెక్టులతో శోభిత, ఇషాన్ బిజీ బిజీ

ఇక  ఇషాన్ పలు ప్రాజెక్టులతో బిజీగా ఉన్నారు.  'పిప్పా',  'ది పర్ఫెక్ట్ కపుల్' లో కనిపించబోతున్నారు. మరోవైపు, శోభితా ధూళిపాళ 2023లో మంచి సక్సెస్ లు అందుకుంటోంది. అనిల్ కపూర్, ఆదిత్య రాయ్ కపూర్‌లతో కలిసి నటించిన డిస్నీ+ హాట్‌స్టార్ సిరీస్ 'ది నైట్ మేనేజర్' పార్ట్ 1తో ఆమె సంవత్సరాన్ని ప్రారంభించింది. థ్రిల్లర్‌గా తెరకెక్కిన ఈ చిత్రం అందరినీ ఆకట్టుకుంది. ఈ సిరీస్‌లోని రెండవ భాగం జూన్‌లో విడుదలైంది. అటు మణిరత్నం 'పొన్నియిన్ సెల్వన్ 2' రెండో భాగంలోనూ శోభిత కనిపించింది. అటు జోయా అక్తర్, రీమా కగ్తీ రూపొందించిన 'మేడ్ ఇన్ హెవెన్' సిరీస్‌ కోసం శోభిత ఆసక్తిగా ఎదురుచూస్తున్నారు. ఇందులో శోభితా, అర్జున్ మాథుర్, కల్కి కోచ్లిన్, శశాంక్ అరోరా, శివాని రఘువంశీ, జిమ్ సర్భ్ సహా పలువురు నటీనటులు కీలక పాత్రలు పోషిస్తున్నారు.  'మేడ్ ఇన్ హెవెన్' సీజన్ 2 ఆగస్టు 10న ప్రైమ్ వీడియోలో స్ట్రీమింగ్ కానుంది.  గత కొంత కాలంగా నాగ చైతన్య, శోభిత ప్రేమాయణం నడుపుతున్నారనే వార్తలు వినిపిస్తున్నాయి. అయితే, ఈ వార్తలపై అటు నాగ చైతన్య గానీ, ఇటు శోభిత గానీ ఎలాంటి ప్రకటన చేయలేదు. పనికి రాని వాళ్లు చేసే కామెంట్స్ పట్ల తాను స్పందించాల్సిన అవసరం లేదని శోభిత ఇప్పటికే వెల్లడించింది.  

ముఖ్యమైన, మరిన్ని ఆసక్తికర కథనాల కోసం ‘టెలిగ్రామ్’లో ‘ఏబీపీ దేశం’లో జాయిన్ అవ్వండి.
Join Us on Telegram: https://t.me/abpdesamofficial