Dhee Grand Finale: స్టార్ డైరెక్టర్ స్టెప్పులు, హైపర్ ఆది పంచులు- ఆకట్టుకుంటున్న ‘ఢీ సెలబ్రిటీ స్పెషల్‌’ గ్రాండ్ ఫినాలే ప్రోమో!

బుల్లితెర ప్రేక్షకులను ఓ రేంజ్​లో అలరిస్తున్న డ్యాన్స్ షో ‘ఢీ సెలబ్రిటీ స్పెషల్‌’. తాజాగా ఈ షో గ్రాండ్ ఫినాలేకు సంబంధించి ప్రోమో విడుదలైంది. ఇందులో దర్శకుడు అనిల్ రావిపూడి పాల్గొని సందడి చేశాడు.

Dhee Celebrity Special Latest Promo: ఈ టీవీ వేదికగా ప్రతి బుధవారం ప్రేక్షకులకు మంచి ఎంటర్ టైన్మెంట్ అందిస్తున్న షో ‘ఢీ సెలబ్రిటీ స్పెషల్‌’. ఈ సీజన్‌ లో పలువురు సెలబ్రిటీలు టైటిల్ కోసం పోటీ పడుతున్నారు. ఇప్పటికే పలు టీమ్ లో ఈ షో నుంచి ఎలిమినేట్ అయ్యాయి. చివరకు మూడు టీమ్ లు మిగిలాయి. టైటిల్ పోరులో ఒక టీమ్ ను మించి మరొక టీమ్ అదిరిపోయే పర్ఫార్మెన్స్ ఇచ్చాయి. తాజాగా ఈ షో గ్రాండ్ ఫినాలేకు సంబంధించిన ప్రోమో విడుదల అయ్యింది.

అదిరిపోయే ఎంట్రీ ఇచ్చిన అనిల్ రావిపూడి

ప్రోమో ప్రారంభం కాగానే ప్రముఖ హీరోయిన్, ఢీ జడ్జి ప్రణీతతో కలిసి యాంకర్ నందు, డ్యాన్స్ మాస్టర్ శేఖర్ స్టేజి మీదికి అడుగు పెట్టారు. గ్రాండ్ ఫినాలేను.. ఇంకా గ్రాండ్ లెవెల్ కు తీసుకెళ్లేందుకు సెన్సేషనల్ డైరెక్టర్ రాబోతున్నారంటూ నందు దర్శకుడు అనిల్ రావిపూడిని పరిచయం చేస్తాడు. ఇండస్ట్రీలో ‘సరిలేరు నీకెవ్వరు‘ అనిపించుకుంటున్న యంగ్ అండ్ డైనమిక్ డైరెక్టర్, టాలీవుడ్ సుప్రీం డైరెక్టర్ అంటూ అదిరిపోయే ఎలివేషన్ ఇస్తారు. చివరకు అనిల్ సింహపు సింహాసనం మీద కూర్చొని ఎంట్రీ ఇస్తారు. అదిరిపోయే స్టెప్పులతో ఆహా అనిపిస్తాడు. “గ్రాండ్ గా ఎంట్రీ ఇచ్చారు ఓకే. రెండు సింహాలతో ఎంట్రీ ఇచ్చారు. ఆ సింహానికి తెలిస్తే?” అంటాడు హైపర్ ఆది. “చెప్తవా ఏంటి?” అని ప్రశ్నిస్తాడు అనిల్ రావిపూడి. “చూడ్డా ఏంటి?” అంటూ ఆది కౌంటర్ ఇస్తాడు. దీంతో అందరూ నవ్వుతారు.

స్టెప్పులతో అదరగొట్టిన అనిల్, శేఖర్ మాస్టర్

ఇక అనిల్ రావిపూడి, శేఖర్ మాస్టర్ కలిసి వేసి డ్యాన్స్ మరో లెవల్ అని చెప్పుకోవచ్చు. చిరంజీవి హీరోగా నటించిన ‘కొదమ సింహం’ సినిమాలోని ‘ఘుం ఘుమాయించు కొంచెం’ అనే పాటకు అదిరిపోయే స్టెప్పులు వేశారు. వారి స్టెప్పులకు షోలోని వాళ్లంతా క్లాప్స్ కొడుతూ ఎంజాయ్ చేశారు.

క్రికెట్ ఫ్యాన్స్ జోలికి వెళ్లొద్దన్న అనిల్ రావిపూడి

ఇక టైటిల్ విన్నర్ ని ప్రకటించే సమయంలో ఆది అనిల్ రావిపూడితో “అన్నా ఇంత టెన్షన్ ఈ ప్రశ్న అడగొచ్చో? లేదో? తెలియదు. మియామ్.. మియామ్ బిల్లి అనే డైలాగ్ చెప్పవా? అన్నా” అంటాడు. “నాకు మైకు మడతపెట్టాలనుంది” అని రిప్లై ఇస్తాడు అనిల్. అదే సమయంలో “ఐపీఎల్ చూడకపోతే కొంపలు మునిగిపోతాయా” అని అనిల్ డైలాక్ కోట్ చేస్తాడు ఆది. వెంటనే అనిల్ “ఆపవోయ్.. ఆపు” అంటాడు. “మిమ్మల్ని కవర్ చేద్దామనే” అని రిప్లై ఇస్తాడు ఆది. “ఆల్రెడీ నేను కవర్ చేసుకున్నా. బ్యాటింగ్ మామూలుగా లేదక్కడ” అంటాడు అనిల్ నవ్వుతూ. “మా ఢీ చూడమని చెప్పబోతున్నా” అంటాడు ఆది. “అదైనా ఖాళీ టైమ్ లో చూస్తుంటారు. క్రికెట్ ఫ్యాన్స్ జోలికి వెళ్లకండయ్యా. చాలా సెన్సిటివ్ గా ఉన్నారు” అని అనిల్ చెప్పడంతో షో అంతా నవ్వుల్లో మునిగిపోతుంది.  మే 29న ‘ఢీ సెలబ్రిటీ స్పెషల్‌’ గ్రాండ్ ఫినాలే ఈ టీవీలో ప్రసారం కానుంది. టైటిల్ విన్నర్ ఎవరో ఆ రోజే తేలిపోనుంది.