Vishal: షాక్ ఇచ్చిన విశాల్ - రాజకీయాలపై కీలక ప్రకటన

Vishal on politics: కోలీవుడ్ యంగ్ హీరో, తెలుగు ప్రేక్షకులకు సైతం సుపరిచితుడైన విశాల్ రాజకీయాలపై కీలక ప్రకటన చేశారు.

కోలీవుడ్ కథానాయకుడు, తెలుగు వాడు, తెలుగు ప్రేక్షకులకు సుపరిచితుడు విశాల్ (Vishal) రాజకీయాల్లోకి వస్తున్నట్లు రెండు మూడు రోజులుగా ప్రచారం జరుగుతోంది. విజయ్ తాను రాజకీయాల్లోకి వస్తున్నట్లు వెల్లడించిన తర్వాత విశాల్ రాజకీయ పార్టీ ప్రకటన రావడంతో ఆయనకు పోటీగా వస్తున్నారని ఊహాగానాలు మొదలు అయ్యాయి. ఈ ప్రచారం మీద విశాల్ స్పందించారు. 

రాజకీయాల్లోకి రావడం లేదు!
తాను రాజకీయాల్లోకి రావడం లేదని విశాల్ స్పష్టం చేశారు. సోషల్ మీడియాలో ఈ మేరకు ఆయన ఓ లేఖ విడుదల చేశారు. రాజాకీయాల్లోకి వచ్చే ఉద్దేశం తనకు లేదని అందులో పేర్కొన్నారు. మెరుగైన సమాజం ఏర్పాటుకు తన శక్తి మేరకు కృషి చేస్తానని ఆయన తెలిపారు.

రాజకీయాలు విశాల్ (Vishal Politics)కు కొత్త కాదు. నడిగర్ సంఘం ఎన్నికల్లో ఆయన పోటీ చేశారు. ఆయన ప్యానల్ తరఫున పోటీ చేసిన నాజర్ ప్రెసిడెంట్ అయ్యారు. విశాల్ సెక్రటరీగా ఎన్నికయ్యారు. ప్రత్యక్ష రాజకీయాలు సైతం ఆయనకు కొత్త కాదు. తమిళనాడులో గత అసెంబ్లీ ఎన్నికల్లో ఆర్కే నగర్ నియోజకవర్గం నుంచి నామినేషన్ వేశారు. అది తిరస్కరణకు గురి కావడంఅప్పట్లో చర్చనీయాంశం అయ్యింది. అందువల్ల, విశాల్ రాజకీయాల్లోకి రానున్నారనే ప్రచారం నిజమని చాలా మంది నమ్మారు. దళపతి విజయ్ పార్టీకి పోటీగా రాజకీయాల్లోకి విశాల్ వస్తున్నారా? అని తమిళ సినిమా ఇండస్ట్రీలో చర్చ మొదలైందని తెలుస్తోంది.

తమిళ హీరోలు రాజకీయాల్లోకి రావడం కొత్త కాదు. సినిమాల్లో అగ్ర కథానాయకుడిగా కొన్నేళ్ల పాటు స్టార్ స్టేటస్ ఎంజాయ్ చేసిన ఎంజీఆర్... తర్వాత 'ఆల్ ఇండియా అన్నా ద్రవిడ మున్నేట్ర కళగం' పార్టీ స్థాపించారు. అధికారంలోకి వచ్చిన తర్వాత ముఖ్యమంత్రి పీఠం అధిరోహించారు. ఒక్కప్పటి కథానాయిక జయలలిత సైతం ముఖ్యమంత్రి అయ్యారు. కరుణానిధికి సైతం సినిమా నేపథ్యం ఉంది.

ఎంజీఆర్ తర్వాత తరంలో సూపర్ స్టార్ రజనీకాంత్. ఆయన తమిళ రాజకీయాల్లోకి రావాలని అభిమానులు బలంగా కోరుకున్నారు. కానీ, ఆయన వెనకడుగు వేశారు. లోక నాయకుడు కమల్ హాసన్ మాత్రం ధైర్యంగా ముందడుగు వేశారు. రాజకీయ పార్టీ స్థాపించారు. కానీ, అధికారంలోకి మాత్రం రాలేకపోయారు. ఇటీవల కన్ను మూసిన విజయకాంత్ సైతం రాజకీయాల్లోకి ప్రభావం చూపించారు. అధికారంలోకి రాలేదు కానీ తన పార్టీని ఇతర పార్టీల్లో విలీనం చేయకుండా చివరి వరకు ధైర్యంగా నిలబడ్డారు.

రజనీకాంత్, కమల్ హాసన్, విజయకాంత్ వంటి హీరోలతో పోలిస్తే తమిళ యువతీ యువకుల్లో విజయ్ కంటూ బలమైన అభిమానగణం ఉంది. అయితే... వాళ్లలో ఎంత మంది ఓటు వేస్తారు? అనేది చూడాలి. ఎంజీఆర్ కాలం నాటి పరిస్థితులు ఇప్పుడు లేవు. జయలలిత, కరుణానిధి వంటి బలమైన రాజకీయ ప్రత్యర్థులు కూడా లేరు. ముఖ్యమంత్రి స్టాలిన్, ఇతర రాజకీయ నాయకులకు విజయ్ ఎటువంటి పోటీ ఇస్తారో చూడాలి.