TG Keerthi Kumar interview on Chaari 111 movie: 'మళ్ళీ మొదలైంది' చిత్రంతో దర్శకుడిగా ఇండస్ట్రీకి పరిచయమైన టీజీ కీర్తి కుమార్... ఇప్పుడు 'చారి 111' వంటి స్పై కామెడీ మూవీతో ప్రేక్షకులను అలరించడానికి వస్తున్నారు. కమెడియన్ వెన్నెల కిశోర్ టైటిల్ రోల్ పోషించిన ఈ సినిమాలో సంయుక్తా విశ్వనాథన్ నటించారు. బర్కత్ స్టూడియోస్ పతాకంపై అదితి సోనీ నిర్మించిన ఈ సినిమా మార్చి 1న థియేటర్లలో విడుదల కానుంది. ఈ నేపథ్యంలో సినిమాకు సంబంధించిన ఆసక్తికరమైన విషయాలను మీడియాతో పంచుకున్నారు డైరెక్టర్ కీర్తి కుమార్. ఆ విశేషాలు...
ఎడిటర్ నుంచి డైరెక్టర్ గా...
''నేను ఎవరి దగ్గరా అసిస్టెంట్ డైరెక్టర్ గా పని చేయలేదు. ఎడిటర్ గా కెరీర్ స్టార్ట్ చేశా. విజువల్ కమ్యూనికేషన్ కోర్స్ చేసి, టీవీ కమర్షియల్స్, కార్పొరేట్ ఫిలిమ్స్ ఎడిట్ చేశా. కాలేజీ రోజుల్లో పాకెట్ మనీ కోసం టీవీ సీరియల్స్ కూడా ఎడిటింగ్ చేశా. ఆ తర్వాత బెంగళూరు వెళ్లి యాడ్ ఫిల్మ్స్ ఎడిటింగ్ చేశా. కొన్ని యాడ్ ఫిల్మ్స్ కూడా డైరెక్ట్ చేశా. సుమారు పదేళ్లు యాడ్ ఫిల్మ్ ఇండస్ట్రీలో ఉన్నాను. ఆ తర్వాత హైదరాబాద్ వచ్చి, 'మళ్ళీ మొదలైంది' సినిమాతో దర్శకుడిగా ప్రయాణం మొదలుపెట్టాను''
'చారి 111' ఎలా మొదలైందంటే..?
''మళ్ళీ మొదలైంది సినిమాలో వెన్నెల కిశోర్ కమెడియన్ రోల్ చేశారు. ఆ సినిమా చేసేటప్పుడే 'చారి 111' ఐడియా చెప్పాను. ఆయనతో చాలా రోజుల నుంచి ఇటువంటి సినిమా చేయాలని అనుకుంటున్నాను. ఆయన నేరేషన్ ఇవ్వమనని అడగకుండా, స్క్రిప్ట్ సెండ్ చేయమని అడిగారు. స్క్రిప్ట్ చదివిన తర్వాత ఓకే చెప్పారు. అలా ఈ సినిమా పట్టాలెక్కింది. 'పింక్ పాంథర్', 'జానీ ఇంగ్లీష్' వంటి హాలీవుడ్ ఫిలిమ్స్ ను ఇన్స్పిరేషన్ గా తీసుకొని ఈ చిత్రాన్ని తీసాను''
విలన్ ఫేస్ అందుకే చూపించలేదు...
''వెన్నెల కిశోర్ బ్రిలియంట్ యాక్టర్. ఎన్నో సినిమాల్లో ఆయన కామెడీ అద్భుతంగా చేశారు. నేను ఆయనకు పెద్ద ఫ్యాన్. నాకు ఆయనలో నటుడు అంటే ఇష్టం. 'జానీ ఇంగ్లీష్' ఫిల్మ్ చూసినప్పుడు నేను ఇండస్ట్రీలోకి వస్తే ఆయనతో అటువంటి సినిమా తప్పకుండా చేయాలని అనుకున్నాను. నా ఫస్ట్ సినిమాలో కమెడియన్ రోల్ చేశారు. ఇప్పుడు ఆయనతో 'చారీ 111' సినిమా చేశా. ఇటువంటి సినిమాలకు కాస్టింగ్ చాలా ఇంపార్టెంట్. కిశోర్, మురళీ శర్మని మనసులో పెట్టుకుని ఈ సినిమా స్క్రిప్ట్ రాశా. తర్వాత విలన్, కాన్‌ఫ్లిక్ట్ ఇష్యూ వచ్చాయి. విలన్ మాస్క్ ఎందుకు వేసుకుంటాడు అనేదానికి ఒక కారణం ఉంది. ప్రత్యేకంగా దాచాలని ఏమీ అనుకోలేదు. కథలో అదొక ఇంట్రెస్టింగ్ ఫ్యాక్టర్. దాన్ని మార్కెటింగ్ కోసం ఉపయోగించాం.''
చిరంజీవి 'రుద్రనేత్ర' సినిమానే స్ఫూర్తి...
''ఇది స్పై యాక్షన్ కామెడీ జోనర్ ఫిల్మ్. 'జేమ్స్ బాండ్' స్పై యాక్షన్.. 'జానీ ఇంగ్లీష్' స్పై యాక్షన్ కామెడీ. నాది రెండో కేటగిరీ సినిమా. కిశోర్ ని మైండ్ లో పెట్టుకుని స్క్రిప్ట్ రాశా. ఆయన 'నో' అంటే ఈ ప్రాజెక్ట్ స్టార్ట్ అయ్యేది కాదు. మెగాస్టార్ చిరంజీవి నటించిన 'రుద్రనేత్ర' సినిమా స్ఫూర్తితోనే 'చారీ 111'లో స్పై ఏజెన్సీకి 'రుద్రనేత్ర' అని పేరు పెట్టాను. 'చంటబ్బాయ్' సినిమాలో చిరంజీవి డిటెక్టివ్ రోల్ ఎలానో, మా సినిమాలో కిశోర్ స్పై రోల్ అలాగా ఉంటుంది''
'చారి 111' సినిమాకు సీక్వెల్...
''ఫ్యూచర్ లో స్టార్ హీరోలతో తప్పకుండా సినిమాలు చేయాలని ఉంది. వెన్నెల కిశోర్ ఓకే చేయడంతో 'మళ్ళీ మొదలైంది' తర్వాత ఈ సినిమా చేశా. నాకు యాక్షన్ ఎంటర్టైనర్స్ చేయాలని ఉంది. దానికి ముందు నన్ను నేను ప్రూవ్ చేసుకోవాలి. రచయితగా, దర్శకుడిగా, ప్రేక్షకుడిగా ఈ సినిమా చేయడం నాకు చాలా సంతోషంగా ఉంది. ఈ చిత్రంలో రుద్రనేత్ర స్పై ఏజెన్సీ ఉంటుంది. అందులోకి మరింత మంది హీరోలను తీసుకురావాలని ఉంది. 'చారి 111'కు కూడా సీక్వెల్ ప్లాన్ ఉంది. ఈ యూనివర్స్ లో ఏ సినిమా చేసినా స్పై యాక్షన్ కామెడీ జానర్ ఫిల్మ్ అవుతుంది''
Also Read: ప్రపంచ సుందరికి ఈసారైనా హిట్టు దక్కేనా?