తెలుగు చలనచిత్ర పరిశ్రమలో నటుడిగా ఎంతో మంచి పేరు ప్రఖ్యాతలు సంపాదించుకున్న మెగాస్టార్ చిరంజీవి సినీ ప్రస్థానం మరో మైలురాయి చేరుకుంది. నేటితో(సెప్టెంబర్ 22) చిరంజీవి నట ప్రస్థానానికి 45 సంవత్సరాలు నిండాయి. ఆయన నటించిన తొలి సినిమా 'ప్రాణం ఖరీదు' 1978 సెప్టెంబర్ 22న విడుదలైంది. ఈ చిత్రం విడుదలై నేటితో (2023 సెప్టెంబర్ 22) 45 ఏళ్లు పూర్తయ్యాయి. తన అద్భుతమైన సినీ ప్రస్థానంలో ఎన్నో బ్లాక్ బస్టర్లు, ఇండస్ట్రీ హిట్లు, రికార్డులు సృష్టించారు చిరంజీవి. ఎన్నో విభిన్నమైన పాత్రలను పోషించారు. అలాగే ఇప్పటికీ సేవా కార్యక్రమాలు చేస్తూనే ఉన్నారు. కోట్లాదిమందికి స్ఫూర్తిగా నిలుస్తున్నారు.
ఇప్పటివరకు 155 చిత్రాలు చేసిన ఆయన 70 పదుల వయసుకు దగ్గర పడుతున్నా వరుస సినిమాలతో ఫుల్ జోష్ లో ఉన్నారు. ఈ ఏడాది ఏకంగా రెండు సినిమాలు చేశారు. అలా మెగాస్టార్ సినీ ప్రస్థానం అప్రతిహతంగా సాగుతూనే వస్తోంది. నేటితో ఆయన సినీ ప్రస్థానానికి 45 ఏళ్లు పూర్తయిన సందర్భంగా మెగాస్టార్ సినీ జర్నీ పై ఆయన తనయుడు రామ్ చరణ్ తేజ్ సోషల్ మీడియాలో ఓ భావోద్వేగమైన పోస్ట్ చేశారు.
ఈ మేరకు ట్విట్టర్ వేదికగా రామ్ చరణ్ ట్వీట్ చేస్తూ.." సినిమాల్లో 45 సంవత్సరాల అద్భుతమైన ప్రయాణాన్ని పూర్తి చేసుకున్న ప్రియమైన మెగాస్టార్ చిరంజీవి గారికి హృదయపూర్వక శుభాకాంక్షలు. అద్భుతమైన ప్రయాణం! ప్రాణం ఖరీదు తో మొదలుపెట్టి ఇంకా మీ అద్భుతమైన పర్ఫామెన్స్ లో కొనసాగుతూనే ఉన్నాయి. తెరపై నటనతో, బయట మానవతా కార్యక్రమాలతో రెండింటితోను కోట్లాదిమందికి మీరు స్ఫూర్తిగా ఉంటున్నారు. మాలో క్రమశిక్షణ, కష్టపడేతత్వం, అంకిత భావం, సమర్థత.. అన్నింటికన్నా దయాగుణం లాంటి విలువలను నింపిన నాన్నగారికి ధన్యవాదాలు" అని రాస్కొచ్చారు రామ్ చరణ్.
అలాగే చిరంజీవి నటించిన వివిధ పాత్రలకు సంబంధించిన ఫోటోలతో కూడిన ఓ పోస్టర్ను కూడా తన ట్వీట్స్ కి జత చేశాడు. మరోవైపు చిరంజీవి సినీ ప్రస్తానానికి 45 సంవత్సరాలు నిండడంతో సినీప్రముఖులు, అభిమానులు కూడా సోషల్ మీడియా వేదికగా ఆయనకి శుభాకాంక్షలు చెబుతున్నారు. ఇక ప్రస్తుతం మెగాస్టార్ సినిమాల విషయానికొస్తే.. ఈ ఏడాది ఆయన నటించిన 'వాల్తేరు వీరయ్య', 'భోళాశంకర్' సినిమాలు విడుదల కాగా, 'వాల్తేరు వీరయ్య' బ్లాక్ బస్టర్ హిట్ అయింది. తన తదుపరి చిత్రాన్ని 'బింబిసార' మూవీ దర్శకుడు వశిష్టతో చేస్తున్న విషయం తెలిసిందే.
సోషియో ఫాంటసీ బ్యాక్ డ్రాప్ తో రాబోతున్న ఈ మూవీ షూటింగ్ ఈ ఏడాది చివరిలో మొదలుకానున్నట్లు సమాచారం. ప్రస్తుతం ప్రీ ప్రొడక్షన్ పనులు జరుపుకుంటున్న ఈ సినిమాలో చిరు సరసన అనుష్క, ఐశ్వర్య రాయ్, మృణాల్ ఠాకూర్ ముగ్గురు హీరోయిన్లు నటిస్తున్నట్లు వార్తలు వినిపిస్తున్నాయి. ఈ సినిమాతో పాటు కళ్యాణ్ కృష్ణ దర్శకత్వంలో మెగాస్టార్ మరో సినిమా చేస్తున్నారు. చిరంజీవి పెద్ద కుమార్తె సుష్మిత కొణిదెల ఈ ప్రాజెక్టును నిర్మిస్తున్నట్లు తెలుస్తోంది. ప్రస్తుతం చర్చల దశలో ఉన్న ఈ ప్రాజెక్టుపై ఇంకా అఫీషియల్ అనౌన్స్మెంట్ రావాల్సి ఉంది.
Also Read : 2024 ఆస్కార్ బరిలో 'దసరా', 'బలగం' - ఏకంగా 22 సినిమాలతో పోటీ?