ఒక దర్శకుడు తెరకెక్కించిన మూవీ ఫ్లాప్ అయితే.. తనను నమ్మి ఏ హీరో డేట్స్ ఇవ్వడు. కానీ తనకు మరో ఛాన్స్ వస్తే.. ఏ రేంజ్‌లో కమ్‌బ్యాక్ ఇవ్వగలడో అని నిరూపించుకున్న దర్శకులు ఎంతోమంది ఉన్నారు. తాజాగా అందులో నెల్సన్ దిలీప్‌కుమార్ పేరు కూడా యాడ్ అయ్యింది. కోలీవుడ్‌లో స్టార్ హీరో విజయ్ లాంటి వారికి ఫ్లాప్ ఇచ్చిన తర్వాత ఇంకా ఏ స్టార్ హీరో కూడా నెల్సన్ లాంటి దర్శకుడికి ఛాన్స్ ఇవ్వాలని అనుకోడు. కానీ సూపర్‌స్టార్ రజినీకాంత్ మాత్రం నెల్సన్‌ను నమ్మి అవకాశం ఇచ్చారు. ఆ అవకాశాన్ని నూటికి నూరు శాతం వినియోగించుకున్నాడు. దీంతో మరో తెలుగు స్టార్ హీరో కూడా నెల్సన్‌కు ఛాన్స్ ఇవ్వడానికి ముందుకొచ్చాడు.
తెలుగు స్టార్‌తో సినిమా..
కోలీవుడ్‌లో కమర్షియల్ సినిమాలను తెరకెక్కించే దర్శకులు చాలామంది ఉన్నారు. అందులో నెల్సన్ దిలీప్‌కుమార్ కూడా ఒకరు. తెరకెక్కించింది కొన్ని సినిమాలే అయినా.. తన కమర్షియల్ చిత్రాలకు ఒక సెపరేట్ ఫ్యాన్ బేస్ ఏర్పడింది. కానీ ఇంతలోనే స్టార్ హీరో విజయ్‌తో ‘బీస్ట్’లాంటి చిత్రాన్ని చేశాడు. సినిమా కమర్షియల్‌గా సక్సెస్ అయ్యింది, కలెక్షన్స్ సాధించింది. కానీ విజయ్ ఫ్యాన్స్ దగ్గర నుండి మాత్రం తీవ్రమైన నెగిటివిటీ వచ్చింది. అయినా కూడా ‘బీస్ట్’ విడుదలయిన కొన్నిరోజుల్లోనే రజినీకాంత్‌తో సినిమా చేస్తున్నట్టు ప్రకటన వచ్చింది. ఇప్పుడు రజినీకాంత్‌తో ‘జైలర్’ విడుదలయిన కొన్నిరోజులకే ఒక తెలుగు స్టార్ హీరోతో నెల్సన్ దిలీప్‌కుమార్.. సినిమా చేస్తున్నట్టు వార్తలు వస్తున్నాయి.
‘జైలర్’ ఇచ్చిన ఊపుతో..
రజినీకాంత్‌తో నెల్సన్ దిలీప్‌కుమార్ తెరకెక్కించిన ‘జైలర్’.. బ్లాక్‌బస్టర్ హిట్‌ను సాధించింది. కలెక్షన్స్ విషయంలో అయితే ఎన్నో రికార్డులను తిరగరాసింది. ప్రపంచవ్యాప్తంగా రూ.650 కోట్ల కలెక్షన్స్ సాధించింది. దీంతో టాలీవుడ్ ఐకాన్ స్టార్ అల్లు అర్జున్‌తో ఒక కథ గురించి నెల్సన్ దిలీప్‌కుమార్ చర్చలు జరిపాడని వార్తలు వస్తున్నాయి. వీరిద్దరూ త్వరలోనే కలిసి ఒక సినిమా చేయనున్నారని టాక్ వినిపిస్తోంది. అయితే ‘జైలర్’ లాంటి ఒక కమర్షియల్ సినిమా అల్లు అర్జున్‌కు పడితే.. చాలా బాగుంటుంది అంటూ బన్నీ ఫ్యాన్స్ సంతోషం వ్యక్తం చేస్తున్నారు. ‘జైలర్’ తర్వాత నెల్సన్ ప్లాన్ ఏంటి అని సందేహంలో ఉన్న ప్రేక్షకులకు కూడా ఇది గుడ్ న్యూస్‌లాగా మారింది.
అప్పుడు అట్లీ.. ఇప్పుడు నెల్సన్..
ప్రస్తుతం అల్లు అర్జున్.. నేషనల్ అవార్డ్ అందుకున్న సంతోషంలో ఉన్నాడు. ఆ సంతోషంలోనే ‘పుష్ప 2’ షూటింగ్‌లో యాక్టివ్‌గా పాల్గొంటున్నాడు. సుకుమార్ దర్శకత్వంలో తెరకెక్కిన ‘పుష్ప’ పార్ట్ 1కు ఇప్పటికే నేషనల అవార్డ్ అందుకున్న అల్లు అర్జున్.. పార్ట్ 2 కోసం అంతకంటే ఎక్కువగా కష్టపడాలని ఫిక్స్ అయినట్టు తెలుస్తోంది. అందుకే గ్యాప్ లేకుండా షూటింగ్స్‌లో పాల్గొనాలని నిర్ణయించుకున్నాడు. కానీ ‘పుష్ప 2’ తర్వాత అల్లు అర్జున్ ప్లాన్స్ ఏంటి అని మాత్రం ఎవరికీ క్లారిటీ లేదు. తాజాగా కోలీవుడ్ దర్శకుడు అట్లీతో అల్లు అర్జున్ సినిమా ఉంటుందని వార్తలు వచ్చినా.. ఇప్పుడు ఆ స్థానంలో నెల్సన్ దిలీప్‌కుమార్ పేరు వినిపిస్తోంది. మరి బన్నీ తరువాతి చిత్రం అట్లీతో ఉంటుందా? నెల్సన్ దిలీప్‌కుమార్‌తో ఉంటుందా? అనే విషయం క్లారిటీ రావాలంటే మరికొన్ని రోజులు ఆగాల్సిందే.
Also Read: మిమ్మల్ని చాలా చాలా మిస్ అయ్యా - సాయి పల్లవి ఈజ్ బ్యాక్
Join Us on Telegram: https://t.me/abpdesamofficial