Pushpa Pushpa Song: ‘పుష్ప.. పుష్ప’ సాంగ్ - బన్నీచేతిలోని గ్లాస్ నుంచి టీ ఎందుకు ఒలకలేదో తెలుసా? కారణం ఇదే!

Pushpa Pushpa Song: ‘పుష్ప ది రూల్’ నుంచి విడుదలయిన ‘పుష్ప పుష్ప’ సాంగ్.. ప్రస్తుతం అల్లు అర్జున్ ఫ్యాన్స్ ప్లే లిస్ట్‌ను రూల్ చేస్తోంది. ఇందులో బన్నీ చేసిన గ్లాస్ స్టెప్ వెనుక ఒక లాజిక్ ఉంది.

Pushpa Pushpa Song Glass Step: ప్రస్తుతం తెలుగు నుంచి చాలా పాన్ ఇండియా సినిమాలు విడుదలకు సిద్ధమవుతున్నాయి. అందులో ఒకటి ‘పుష్ప ది రూల్’. అల్లు అర్జున్ ఫ్యాన్స్ అంతా ‘పుష్ప 2’ కోసం ఎంతో ఆసక్తిగా ఎదురుచూస్తుండగా.. తాజాగా ఈ మూవీ నుంచి విడుదలయిన ‘పుష్ప పుష్ప’ పాట ఫ్యాన్స్‌లో కొత్త ఉత్సాహాన్ని నింపింది. అయితే ఈ పాటలో అల్లు అర్జున్ వేసిన స్టెప్పులను అప్పుడే నెటిజన్లు ఇమిటేట్ చేయడం మొదలుపెట్టారు. ముఖ్యంగా అందులోని ఛాయ్ స్టెప్ గురించే సోషల్ మీడియాలో చర్చలు జరుగుతున్నాయి. అసలు ఆ ఛాయ్ స్టెప్ వేస్తున్నప్పుడు కప్‌లో నుంచి ఛాయ్ ఎందుకు ఒలకలేదు అనేదాని వెనుక ఒక పెద్ద థియరీ ఉంది.

అదే కారణం..

‘పుష్ప 2’ నుంచి తాజాగా ‘పుష్ప పుష్ప’ అనే పాట విడుదలయ్యింది. దేవీ శ్రీ ప్రసాద్ అందించిన సంగీతానికి అల్లు అర్జున్ స్టెప్పులు వేయడం ఫ్యాన్స్‌కు ఫీస్ట్‌ను అందించింది. అయితే అందులో గ్లాసులో టీ పోసుకొని అల్లు అర్జున్ రౌండ్‌గా తిప్పినా.. టీ ఒలకలేదు. దానికి కారణం సెంట్రల్ ఫోర్స్. సెంట్రల్ ఫోర్స్ వల్ల ఇది సాధ్యమవుతుంది. కప్పును వేగంగా తిప్పినప్పుడు.. అందులో ఉండే ద్రవపదార్థంపై సెంట్రల్ ఫోర్స్ ప్రభావం పడుతుంది. దానివల్ల అది కిందకు ఒలకకుండా స్థిరంగా ఉంటుంది. అదే కప్పును నెమ్మదిగా తిప్పితే.. టీ ఒలికిపోతుంది. అది మనం తిప్పే వేగంపై ఆధారపడి ఉంటుంది. ఈ పాటలో అల్లు అర్జున్ వేసిన స్టెప్పును శ్రద్ధగా గమనిస్తే.. తను కప్‌ను చాలా వేగంగా తిప్పాడు. అందుకే టీ ఒలకలేదు. చాలామంది దీన్ని గ్రాఫిక్స్ అంటున్నారు. అయితే, దీన్ని చేయడానికి గ్రాఫిక్స్‌తో పనిలేదు. మీరు కూడా ఇంట్లో ట్రై చేసి చూడండి.

ప్రశంసలు మొదలు..

‘పుష్ప పుష్ప’ పాటలో అల్లు అర్జున్ వేసిన చాలా స్టెప్పులు ప్రస్తుతం సోషల్ మీడియాలో వైరల్ అవుతున్నాయి. ఇది లిరికల్ వీడియోనే అయినా ఇందులో చూపించిన బన్నీ ప్రతీ స్టెప్పును ఇమిటేట్ చేయడానికి ప్రయత్నిస్తున్నారు ఫ్యాన్స్. అందుకే రెండు రోజులుగా సోషల్ మీడియాలో మొత్తం ‘పుష్ప పుష్ప’ మ్యానియానే కనిపిస్తోంది. ముందుగా ఈ సాంగ్ గ్లింప్స్ విడుదలయినప్పుడు దీనిని ట్రోల్ చేసిన ప్రేక్షకులే.. ఇప్పుడు దీనిని లూప్‌లో వింటున్నారు. దేవీ శ్రీ ప్రసాద్ మ్యూజిక్ చాలా బాగుందంటూ ప్రశంసలు కూడా కురిపిస్తున్నారు. మొత్తానికి ‘పుష్ప’ పార్ట్ 1 లాగానే పార్ట్ 2 పాటలు కూడా మెల్లగా ప్రేక్షకులను ఆకట్టుకునే విధంగా ఉన్నాయని ఆడియన్స్ అభిప్రాయం వ్యక్తం చేస్తున్నారు. ఈ పాటను యూట్యూబ్‌లో పోస్ట్ చేసిన 24 గంటల్లోనే సుమారు 40 మిలియన్ రియల్ టైమ్ వ్యూస్ రావడం గమనార్హం. ఒక లిరికల్ సాంగ్‌కు ఇన్ని వ్యూస్ రావడం ఆల్ టైమ్ రికార్డ్ అని నిర్మాణ సంస్థ ప్రకటించింది.

హిస్టరీ రిపీట్..

‘పుష్ప పుష్ప’ పాటలో ఛాయ్ స్టెప్‌తో పాటు షూ స్టెప్ కూడా అందరి దృష్టిని ఆకర్షించింది. ‘పుష్ప ది రైజ్’లోని శ్రీవల్లి పాటలో కూడా ఇలాగే చెప్పుతో సింపుల్‌గా ఒక స్టెప్ వేసి పాటను ఇంటర్నేషనల్ రేంజ్‌కు తీసుకెళ్లాడు అల్లు అర్జున్. ఇప్పుడు ‘పుష్ప పుష్ప’తో కూడా అదే రిపీట్ అవుతుందని బన్నీ ఫ్యాన్స్ అభిప్రాయం వ్యక్తం చేస్తున్నారు. ఛాయ్ స్టెప్‌తో పాటు ఈ షూ స్టెప్‌ను కూడా ఇమిటేట్ చేస్తూ రీల్స్, షార్ట్స్ చేస్తున్నారు నెటిజన్లు. చాలామంది సోషల్ మీడియా ఇన్‌ఫ్లుయెన్సర్లు కూడా అల్లు అర్జున్ వేసిన స్టెప్పులను ఇమిటేట్ చేస్తూ లైకుల మీద లైకులు కొట్టేస్తున్నారు.