'గ్యాంగ్‌తో వచ్చేవాడు గ్యాంగ్‌స్ట‌ర్‌. కానీ, అతను ఒక్కడే వస్తాడు. మాన్‌స్ట‌ర్‌' - ఇది KGF సినిమాలో డైలాగ్. దీనిని ఎవరూ అంత సులభంగా మర్చిపోలేరు. ఆ సన్నివేశంలో డైలాగ్ చెప్పిన నటుడిని కూడా! ఆయన పేరు మోహన్ జునేజా. కన్నడలో వందకు పైగా సినిమాల్లో నటించారు. ఇకపై ఆయన లేరు. ఈ రోజు ఉదయం మరణించారు.
కన్నడ నటుడు మోహన్ జునేజా శనివారం ఉదయం తుదిశ్వాస విడిచారు. కొన్ని రోజులుగా ఆయన ఆరోగ్యం బాగోవడం లేదు. బెంగళూరులోని ఒక ప్రయివేటు ఆస్పత్రిలో చికిత్స పొందుతున్నారు. ఈ రోజు ఉదయం మోహన్ జునేజా బాడీ చికిత్సకు స్పందించలేదని, ఆయన మరణించారని కన్నడ పరిశ్రమ వర్గాలు తెలిపాయి.
Also Read: తిరుమలలో నయనతార పెళ్లి - ముహూర్తం ఆ రోజేనా?
మోహన్ జునేజా స్వస్థలం కర్ణాటకలోని తుమకూర్ జిల్లా. ఆయన విద్యాభ్యాసం అంతా బెంగళూరులో సాగింది. చదువు పూర్తయిన తర్వాత అదే నగరంలో సెటిల్ అయ్యారు. నటనపై ఆసక్తితో సినిమాలు, సీరియళ్లు చేశారు. కన్నడ ప్రేక్షకులకు తెలిసిన ఆయన్ను, 'కెజిఎఫ్' సినిమా దేశవ్యాప్తంగా పాపులర్ చేసింది. ఆయన చివరగా KGF 2 సినిమాలో కనిపించారు. అదే ఆయన ఆఖరి సినిమా అని టాక్. మోహన్ జునేజా మరణం పట్ల పలువురు సినీ ప్రముఖులు, ప్రేక్షకులు సంతాపం వ్యక్తం చేశారు.