Fighter Movie:‘ఫైటర్’లో లిప్ లాక్ సీన్ - లీగల్ నోటీసులు పంపిన ఇండియన్ ఎయిర్ ఫోర్స్ ఆఫీసర్

Fighter Movie: ‘ఫైటర్’ చిత్రబృందానికి ఎదురుదెబ్బ తగిలింది. ఈ సినిమాలో లిప్ లాక్ సన్నివేశంపై ఇండియన్ ఎయిర్ ఫోర్స్ సీరియస్ అయ్యింది. లీగల్ నోటీసులు జారీ చేసింది.

Fighter Movie: బాలీవుడ్ యాక్షన్ హీరో హృతిక్ రోషన్, దీపికా పదుకొణె జంటగా నటించిన తాజా చిత్రం ‘ఫైటర్’. రీసెంట్ గా థియేటర్లలోకి అడుగు పెట్టిన ఈ సినిమా ప్రేక్షకుల నుంచి పాజిటివ్ రియాక్షన్ సాధించింది. కేవలం హిందీ భాషలోనే విడుదలైన ఈ సినిమా వసూళ్ల పరంగానూ సత్తా చాటింది. ఈ సినిమాలోని కొన్ని సన్నివేశాలపై తీవ్ర అభ్యంతరం వ్యక్తం చేస్తూ మిడిల్ ఈస్ట్ దేశాలు ఈ సినిమాపై నిషేధం విధించాయి. తాజాగా ఈ మూవీ మరోసారి చిక్కుల్లో పడింది. ఈ సినిమాలోని హృతిక్, దీపిక నడుమ లిప్ లాక్ సన్నివేశంపై ఇండియన్ ఎయిర్ ఫోర్స్ లీగల్ యాక్షన్ కు రెడీ అయ్యింది. ఈ మేరకు చిత్రబృందానికి లీగల్ నోటీసులు అందించింది.

‘ఫైటర్’ మూవీ లిప్ లాక్ సీన్ పై ఎయిర్ ఫోర్స్ అధికారి సౌమ్య సీరియస్

అస్సాంకు చెందిన ఎయిర్ ఫోర్స్ అధికారి సౌమ్య దీప్‌దాస్‌ ‘ఫైటర్’ లిప్ లాక్ సీన్ పై సీరియస్ అయ్యారు. ముద్దు సన్నివేశంపై అభ్యంతరం వ్యక్తం చేశారు. సినిమాల్లో లిప్ లాక్ సీన్లు కొత్తేమీ కాకపోయినా, ఇండియన్ ఎయిర్ ఫోర్స్ యూనిఫామ్ లో ఇలా లిప్ కిస్ పెట్టుకోవడాన్ని ఆమె తీవ్రంగా పరిగణించారు. ఈ సన్నివేశం భారత వైమానిక దళంలోని అధికారుల పరువుకు భంగం కలిగించేలా ఉందని అభిప్రాయపడ్డారు.

ఎయిర్ ఫోర్స్ యూనిఫామ్ అనేది కేవలం డ్రెస్ మాత్రమే కాదని, అది దేశ గౌరవం, సేవకు, నిబద్దతకు చిహ్నమని నోటీసులలో పేర్కొన్నారు.  అలాంటి ఉన్నతమైన దుస్తులు ధరించి లిప్ కిస్ పెట్టుకోవడం అంటే వాయుసేన అధికారులను కించపరచడమే అవుతుందన్నారు. ఇలాంటి అనుచిత ప్రవర్త ఎయిర్ ఫోర్స్ ఔన్నత్యాన్ని దెబ్బతీస్తుందన్నారు. అంతేకాదు, ఎయిర్ ఫోర్స్ కు చెందిన రన్ వేను ఎంతో సున్నిత ప్రాంతంగా పరిగణిస్తారని చెప్పారు. ఎంతో భద్రతతో కూడిన రన్ వే మీద లిప్ లాక్ సీన్లు చేయడం చాలా తప్పు అన్నారు. ఈ సినిమా చూసి భవిష్యత్ లో ఎవరైనా అలా చేస్తే, దానికి బాధ్యులు ఎవరని ఆమె ప్రశ్నించారు. అయితే, ఈ లీగల్ నోటీసులపై ‘పైటర్’ చిత్రబృందం నుంచి ఇంకా ఎలాంటి స్పందన రాలేదు.

రిపబ్లిక్ డే కానుకగా విడుదలైన ‘ఫైటర్’

బాలీవుడ్ స్టార్ డైరెక్టర్ సిద్ధార్థ్‌ ఆనంద్‌ ‘ఫైటర్’ సినిమాకు దర్శకత్వం వహించారు. ఇండియన్ ఎయిర్ ఫోర్స్ వైమానిక దాడులను బేస్ చేసుకుని తొలి ఏరియల్ యాక్షన్ చిత్రంగా రూపొందింది. రిపబ్లిక్‌ డే కానుకగా ఈ సినిమా ప్రేక్షకుల ముందుకు వచ్చింది. ఈ సినిమాపై పలువురు ప్రముఖులు ప్రశంసలు కురిపించారు. ఈ చిత్రంలో హృతిక్ రోషన్, దీపిక పదుకొణె ఎయిర్ ఫోర్స్ ఫైలెట్లుగా కనిపించారు. ఈ సినిమా మంచి విజయం సాధించడం పట్ల హృతిక్ సంతోషం వ్యక్తం చేశారు. తాము ఈ సినిమా కోసం ఎంతో కష్టపడ్డామని చెప్పారు. ఆ కష్టానికి ఫలితం దక్కిందన్నారు. ఈ సినిమా కోసం ఏకంగా ఏడాది పాటు కుటుంబానికి, స్నేహితులకు, చివరకు సోషల్ మీడియాకు కూడా దూరంగా ఉన్నట్లు ఆయన తెలిపారు.