HanuMan: ‘హనుమాన్’ ఖాతాలో మరో రికార్డ్ - 92 ఏళ్లలో ఎప్పుడూ లేనంతగా!

HanuMan Collections: సంక్రాంతికి విడుదలయిన ‘హనుమాన్’ మూవీ గురించే ఇంకా ప్రేక్షకులు మాట్లాడుకుంటున్నారు. ఇప్పటికే ఎన్నో రికార్డులు బ్రేక్ చేసిన ఈ మూవీ.. మరో రికార్డును సొంతం చేసుకుంది.

HanuMan Box Office Collections: సంక్రాంతి అంటేనే సినిమాల పండగ. ముఖ్యంగా సంక్రాంతికి ఎన్నో తెలుగు సినిమాలు థియేటర్లలో పోటీపడతాయి. సీనియర్ హీరోలు, యంగ్ హీరోలు అని తేడా లేకుండా అందరు హీరోలకు సంక్రాంతి హిట్స్ కావాలని కోరిక ఉంటుంది. అదే విధంగా 2024 సంక్రాంతికి కూడా పలు సినిమాలు పోటీపడ్డాయి. అందులో అతిపెద్ద బ్లాక్‌బస్టర్‌గా నిలిచిన చిత్రం ‘హనుమాన్’. ఇప్పటికే ‘హనుమాన్’ ఖాతాలో ఎన్నో రికార్డులు వచ్చి చేరాయి. కలెక్షన్స్ పరంగా టాప్ 10 తెలుగు సినిమాల్లో యాడ్ అయ్యింది. తాజాగా మరో రికార్డ్ కూడా ‘హనుమాన్’ పేరు మీద నమోదయ్యిందని తెలుస్తోంది.

రూ.300 కోట్లు వచ్చే అవకాశం

కేవలం ఇండియన్ బాక్సాఫీస్ వద్ద మాత్రమే కాదు.. ప్రపంచ బాక్సాఫీస్ వద్ద కూడా కలెక్షన్స్ విషయంలో ‘హనుమాన్’ పరుగులు పెడుతోంది. ప్రశాంత్ వర్మ తెరకెక్కించిన ఈ చిత్రానికి ప్రేక్షకులు ఫిదా అవుతున్నారు. అమెరికాలో సైతం 5 మిలియన్ డాలర్ల మార్క్‌ను టచ్ చేసింది ఈ సినిమా. 2024 సంక్రాంతికి విడుదలయిన సినిమాల్లో ‘హనుమాన్’ ఎక్కువ కలెక్షన్స్ సాధించిన సినిమాగా రికార్డ్ దక్కించుకుంది. టాలీవుడ్ హిస్టరీలోనే 92 ఏళ్లుగా సంక్రాంతికి ఏ సినిమా ఇంత పెద్ద హిట్ అవ్వలేదని తెలుస్తోంది. ప్రస్తుతం ప్రపంచవ్యాప్తంగా ‘హనుమాన్’ కలెక్షన్స్ రూ. 260 కోట్లకు చేరుకున్నాయి. ఇంకా చాలా ప్రాంతాల్లో ఈ సినిమా హౌజ్‌ఫుల్ షోలతో రన్ అవుతోంది. అందుకే రన్ పూర్తయ్యేలోపు రూ.300 కోట్ల మార్క్‌ను టచ్ చేసే అవకాశం ఉందని నిపుణులు అంచనా వేస్తున్నారు.

అలాంటి సినిమాలను దాటి..

ఇప్పటికే సంక్రాంతికి ‘అల వైకుంఠపురంలో’, ‘సరిలేరు నీకెవ్వరూ’, ‘వాల్తేరు వీరయ్య’ లాంటి బ్లాక్‌బస్టర్ చిత్రాలు ఎన్నో రికార్డులు క్రియేట్ చేశాయి. కానీ ఇప్పుడు ‘హనుమాన్’ వాటన్నింటినీ క్రాస్ చేసింది. 92 ఏళ్ల సినీ సంక్రాంతి చరిత్రలోనే ఇంత పెద్ద హిట్‌ను ప్రేక్షకులు చూడలేదు అంటేనే అర్థమవుతోంది ఈ మూవీ ఆడియన్స్‌ను ఏ రేంజ్‌లో ఆకట్టుకుంటుందో. ప్రస్తుతం కలెక్షన్స్ విషయంలో ఇంకా ‘హనుమాన్’ వెనక్కి తగ్గడం లేదు కాబట్టి సినిమా ఓటీటీ రిలీజ్‌ను కూడా పోస్ట్‌పోన్ చేయాలని మేకర్స్ భావిస్తున్నారు. వచ్చే రోజుల్లో కలెక్షన్స్ తగ్గడం కాకుండా ఇంకా పెరిగే అవకాశాలు ఉన్నాయని వారు అంచనా వేస్తున్నారు. ఒకసారి ‘హనుమాన్’ను థియేటర్లలో చూసి ఇష్టపడినవారు కూడా మళ్లీ మళ్లీ దీనికోసం థియేటర్లకు వెళ్తున్నారు.

ఎన్నో రికార్డులు..

ఇక దేవుడి కథలు, అలాంటి జోనర్‌లో తెరకెక్కిన సినిమాలంటే నార్త్ ప్రేక్షకులు విపరీతంగా ఆదరిస్తారు. దీనికి నిఖిల్ హీరోగా నటించిన ‘కార్తికేయ 2’ సినిమానే ఉదాహరణ. ఇప్పుడు అదే తరహాలో, దానికి మించి సక్సెస్ అయ్యింది ‘హనుమాన్’. ఈ చిత్రం హిందీ డబ్బింగ్ వర్షన్ నార్త్ ప్రేక్షకులను విపరీతంగా ఆకట్టుకుంది. ఇప్పటికే ‘హనుమాన్’ హిందీ వర్షన్‌కు రూ.40 కోట్లకు పైగా కలెక్షన్స్ లభించాయి. ఇంకా థియేటర్లలో సక్సెస్‌ఫుల్‌గా రన్ అవుతోంది. ఇప్పటికే ప్రపంచవ్యాప్తంగా ‘హనుమాన్’ సినిమాకు కోటి టికెట్లు అమ్ముడిపోయాయని సమాచారం. దీంతో 2024లో విడుదలయిన అన్ని సినిమాల్లో ఇలాంటి ఘనత సాధించిన మొదటి చిత్రంగా ‘హనుమాన్’ నిలిచింది.