ప్రస్తుతం పవర్ స్టార్ పవన్ కళ్యాణ్ (Pawan Kalyan) హైదరాబాదులో ఉన్నారు. తన మేనల్లుడు సాయి ధరమ్ తేజ్ (Sai Dharam Tej) తో కలిసి సముద్రఖని దర్శకత్వంలో సినిమా (PK SDT Film) షూటింగ్ చేస్తున్నారు. ఒక వైపు ఈ చిత్రీకరణ జరుగుతుంటే... మరో వైపు రామోజీ ఫిల్మ్ సిటీలో పవర్ స్టార్ ఇంకో సినిమా షూటింగ్ జరుగుతోంది.


'హరి హర వీరమల్లు' @ 100 డేస్!
పవన్ కళ్యాణ్ కథానాయకుడిగా క్రిష్ జాగర్లమూడి దర్శకత్వంలో రూపొందుతున్న పీరియాడిక్ ఫిల్మ్ 'హరి హర వీర మల్లు' (Hari Hara Veera Mallu). ప్రస్తుతం రామోజీ ఫిల్మ్ సిటీలో కొన్ని సన్నివేశాలు తెరకెక్కిస్తున్నారు. సముద్రఖని సినిమాతో పవన్ బిజీగా ఉండటంతో ఆయన అవసరం లేని సన్నివేశాలను క్రిష్ పూర్తి చేస్తున్నారని తెలిసింది. బాలీవుడ్ నటుడు బాబీ డియోల్ సీన్స్ తీస్తున్నారట. ఈ రోజుతో 'హరి హరి వీర మల్లు' 100 షూటింగ్ డేస్ కంప్లీట్ చేసుకుందని క్రిష్ పేర్కొన్నారు. చిన్న ట్విస్ట్ ఏంటంటే... వందో షూటింగ్ రోజున పవన్ సెట్ లో లేరు.  


'హరి హర వీరమల్లు' సినిమాలో ఔరంగజేబు పాత్రలో బాబీ డియోల్ నటిస్తున్నారు. ఇది పాన్ ఇండియా సినిమా. తెలుగుతో పాటు తమిళ, కన్నడ, మలయాళ, హిందీ భాషల్లో కూడా విడుదల చేయనున్నారు. అయితే, బాబీ డియోల్‌కు తొలి తెలుగు చిత్రమిది. ఇంతకు ముందు ఆయన చేసిన కొన్ని హిందీ చిత్రాలు తెలుగులో అనువాదం అయ్యాయి. అలాగే, ఓ వెబ్ సిరీస్ కూడా! ఇప్పుడు పవన్ సినిమాతో నేరుగా తెలుగు ప్రేక్షకుల ముందుకు వస్తున్నారు.    


Also Read : అమెరికాలో కాదు, అపోలోలో ఉపాసన డెలివరీ - ఇండియన్ డాక్టర్లకు తోడు అమెరికన్ గైనకాలజిస్ట్






పవన్ కళ్యాణ్ పుట్టినరోజు సందర్భంగా గత ఏడాది సెప్టెంబర్ 2న 'హరి హర వీరమల్లు' వీడియో గ్లింప్స్ విడుదల చేశారు. అందులో పవన్ కళ్యాణ్ తొడ కొట్టిన విజువల్ వైరల్ అయ్యింది. ఈ సినిమాలో పవన్ కళ్యాణ్ సరసన నిధి అగర్వాల్ కథానాయికగా నటిస్తున్నారు. ప్రతినాయకుడిగా ఔరంగజేబు పాత్రలో హిందీ హీరో బాబీ డియోల్ (Bobby Deol) నటిస్తున్నారు.


ఈ ఏడాది వేసవిలో విడుదల!
ఇటీవల సినిమాలో మేజర్ యాక్షన్ సీక్వెన్స్ షూటింగ్ కంప్లీట్ చేశారు. ఆ షూట్ కూడా రామోజీ ఫిల్మ్ సిటీలో జరిగింది. బాబీ డియోల్ షెడ్యూల్ కోసం సిటీలోని ప్రముఖ స్టూడియోలో సెట్ వేశారు. కొన్ని రోజుల క్రితం ఆయనకు వెల్కమ్ చెబుతూ కారు దిగిన వీడియో సోషల్ మీడియాలో షేర్ చేశారు. అప్పుడు ''ఇండియన్ సినిమాలో బిగ్ యాక్షన్ స్టార్ అయిన బాబీ డియోల్‌తో పని చేస్తుండటం సంతోషంగా, ఎగ్జైటెడ్ గా ఉంది'' అని దర్శకుడు క్రిష్ జాగర్లమూడి ట్వీట్ చేశారు. ఈ ఏడాది వేసవిలో చిత్రాన్ని విడుదల చేయనున్నట్లు పేర్కొన్నారు.  


Also Read : అమ్మాయిని కొడతావా? నడిరోడ్డు మీద నిలదీసిన రియల్ హీరో నాగశౌర్య


ఈ సినిమాలో నర్గిస్ ఫక్రి కీలక పాత్రలో కనిపించనున్నారు. తెలుగు అమ్మాయి పూజితా పొన్నాడ కూడా ఓ రోల్ చేస్తున్నారు. మెగా సూర్య ప్రొడక్షన్స్ పతాకంపై ప్రముఖ నిర్మాత ఏఎం రత్నం సమర్పణలో దయాకర్ రావు నిర్మిస్తున్నారు. ఎం.ఎం. కీరవాణి సంగీతం అందిస్తున్నారు. జ్ఞానశేఖర్ ఛాయాగ్రహణ బాధ్యతలు నిర్వర్తిస్తున్నారు. సాయి మాధవ్ బుర్రా సంభాషణలు అందిస్తున్నారు.