ఓ వైపు దర్శకుడిగా, మరో వైపు నటుడిగా అద్భుతంగా రాణిస్తున్నారు ఎస్ జే సూర్య. తాజాగా ఆయన హీరో విశాల్ తో కలిసి ‘మార్క్ ఆంటోనీ’ అనే సినిమాలో నటిస్తున్నారు. తాజాగా జరిగిన ఈ సినిమా ప్రీ రిలీజ్ ఈవెంట్ లో మహేష్ బాబు గురించి ఆయన పలు ఆసక్తికర విషయాలు చెప్పారు. ప్రస్తుతం సూర్య కామెంట్స్ సోషల్ మీడియాలో తెగ హల్ చల్ చేస్తున్నాయి.


మహేష్ బాబుకు బాకీ ఉన్నా- ఎస్ జే సూర్య


ఇప్పటి తెలుగు, తమిళ చిత్ర పరిశ్రమల్లో దర్శకుడిగా చాలా మంది హీరోలకు బ్లాక్ బస్టర్లు అందించిన తాను, మహేష్ విషయంలో మాత్రం బాకీ పడినట్లు సూర్య చెప్పుకొచ్చారు. “నేను తెలుగు, తమిళ చిత్ర పరిశ్రమలో చాలా సినిమాలకు దర్శకత్వం వహించాను. పలువురు హీరోలకు అద్భుతమైన విజయాలను అందించాను. పవన్ కల్యాణ్ తో ‘ఖుషి’ సినిమా చేసి చక్కటి హిట్ అందించాను. తమిళంలో విజయ్, అజిత్ కు బ్రహ్మాండమైన విజయాలను చూపించాను. మహేష్ బాబుకు మాత్రం సక్సెస్ అందించలేకపోయా. ఆయన హీరోగా నేను తెరకెక్కించిన ‘నాని’ సినిమా హిట్ కాలేదు. ఆయనకు నేను బాకీ ఉన్నాను. త్వరలోనే ఆయనతో మంచి సినిమా తీసి ఆ రుణం తీర్చుకుంటాను” అని చెప్పుకొచ్చారు.


2004లో విడుదలైన మహేష్ ‘నాని’


2004లో మహేష్ బాబు హీరోగా వచ్చిన ‘నాని’ సినిమాకు ఎస్‌ జె సూర్య దర్శకత్వం వహించారు. చక్కటి కథాంశం ఉన్నా, ప్రేక్షకులను అలరించడంలో మాత్రం సక్సెస్ కాలేకపోయింది. ఈ సినిమాలో మహేష్ బాబు నటనకు మాత్రం సర్వత్రా ప్రశంసలు దక్కాయి. ఏఆర్ రెహమాన్ సంగీతం అందరనీ అలరించింది. ఇక మహేష్ బాబు హీరోగా 2017లో వచ్చిన ‘స్పైడర్’ చిత్రంతో ఎస్ జే సూర్య విలన్ గా నటించారు. చావు రుచి మరిగిన క్రూరుడిగా అద్భుత నటన కనబర్చాడు. ఆయన నటనకు విమర్శకుల నుంచి సైతం ప్రశంసలు లభించాయి.


‘మార్క్ ఆంటోని’ గురించి..


ప్రముఖ తమిళ హీరో విశాల్, ఎస్‌జే సూర్య ప్రధాన పాత్రల్లో నటిస్తున్న సినిమా ‘మార్క్ ఆంటోని’.  ఆదిక్ రవిచంద్రన్ ఈ సినమాను తెరకెక్కిస్తున్నారు.  గ్యాంగ్‌స్టర్ నేపథ్యంలో సాగే సైన్స్ ఫిక్షన్ డ్రామాగా ఈ మూవీ రూపొందుతోంది. సెప్టెంబర్ 15న పాన్ ఇండియా రేంజిలో ఈ సినిమా విడుదల కానుంది. తమిళంతో పాటు హిందీ, తెలుగు, మలయాళం, కన్నడ భాషల్లో ఈ సినిమా విడుదల కానుంది. ఈ చిత్రంలో తెలుగు హీరోయిన్ రీతు వర్మ కథానాయికగా నటిస్తోంది. ఎస్ జె సూర్య, సునీల్ కీలక పాత్రల్లో కనిపించనున్నారు. జీవి ప్రకాష్ కుమార్ సంగీతం అందిస్తున్న ‘మార్క్ ఆంటోని’ సినిమాని మినీ స్టూడియోస్ ఎల్ఎల్‌పీ బ్యానర్ పై ఎస్ వినోద్ కుమార్ నిర్మిస్తున్నారు.  


Read Also: సంగీత దిగ్గజానికి తమిళ స్టార్ హీరో సపోర్టు- వారిదే తప్పన్న యువన్ శంకర్ రాజా!



ముఖ్యమైన, మరిన్ని ఆసక్తికర కథనాల కోసం ‘టెలిగ్రామ్’లో ‘ఏబీపీ దేశం’లో జాయిన్ అవ్వండి.
Join Us on Telegram: https://t.me/abpdesamofficial