దేవర (Devara) మూవీ తన కెరీర్ లోనే బెస్ట్ ఫిల్మ్ అంటున్నారని, ఆ విషయంలో వారికి థ్యాంక్స్ అని చెప్పారు దర్శకుడు కొరటాల శివ (Koratala Shiva). సినిమా విడుదల సందర్భంగా అర్థరాత్రి నుంచి ఇప్పటి వరకు వరుసగా ఫోన్ కాల్స్ వస్తున్నాయని, అందరూ సినిమాని మెచ్చుకుంటున్నారని, తమ మూడేళ్ల కష్టానికి దక్కిన ఫలితం ఇదని చెప్పారాయన. ఇంత పెద్ద విజయాన్ని ఇచ్చిన తెలుగు ప్రేక్షకులకు ధన్యవాదాలు అని చెప్పారు కొరటాల శివ. దేవర మూవీలో నటించిన యాక్టర్స్, టెక్నీషియన్స్.. అందరికీ స్పెషల్ థ్యాంక్స్ అన్నారు. వారందరి వల్లే సినిమా ఈస్థాయికి వెళ్లిందని చెప్పారు. సినిమాకోసం ప్రతి ఒక్కరూ ఎంతో శ్రమించారని, అందుకే ఇలాంటి సక్సెస్ వచ్చిందన్నారు. అందరూ దీన్ని తమ సొంత సినిమాలాగా భావించారన్నారు. మిర్చి నుంచి తన సినిమాలన్నిటినీ దిల్ రాజు డిస్ట్రిబ్యూట్ చేశారని, ఆయన ఉంటే తనకు సక్సెస్ ఖాయం అని చెప్పారు కొరటాల. సినిమా రిలీజైన సందర్భంగా ఏర్పాటు చేసిన ప్రెస్ మీట్ లో దర్శకుడు కొరటాల శివ, నిర్మాత కల్యాణ్ రామ్, డిస్ట్రిబ్యూటర్ దిల్ రాజు, రామజోగయ్య శాస్త్రి, సాబు సిరిల్ పాల్గొన్నారు.
నందమూరి అభిమానులందరికీ ధన్యవాదాలు అని చెప్పారు నందమూరి కల్యాణ్ రామ్ (Nandamuri Kalyan Ram). కొరటాల కథకు, సాబు సిరిల్ అందమైన దృశ్యరూపం ఇచ్చారని అన్నారు. ఈ సినిమాకి పనిచేసిన ప్రతి టెక్నీషియన్ కష్టపడ్డారన్నారు. కుమ్మేశావ్ నాన్న అంటూ ఎన్టీఆర్(Jr NTR) పర్ఫామెన్స్ ని మెచ్చుకున్నారు కల్యాణ్ రామ్. ఎన్టీఆర్ ఇరగదీశాడన్నారు. ఇది వన్ మ్యాన్ షో అని చెప్పడానికి తనకు గర్వంగా ఉందన్నారు. సినిమాలో కనిపించే ప్రతి సన్నివేశంలోనూ తారక్ కుమ్మేశాడని అభినందించారు. యు రాక్డ్ ఇట్ అని అన్నారు కల్యాణ్ రామ్.
తెలుగులో టాప్ గ్రాసర్..
దేవర మూవీ ఓపెనింగ్స్ లో కొత్త రికార్డులు సృష్టిస్తోందన్నారు ఈ సినిమాకి డిస్ట్రిబ్యూటర్ గా పనిచేసిన దిల్ రాజు. తెలుగు ఇండస్ట్రీలో దేవర రిలీజ్ ఓ పండగ వాతావరణాన్ని తీసుకొచ్చిందన్నారు. ప్రేక్షకులు ఇచ్చే ఆ ప్రోత్సాహమే మంచి మంచి సినిమాలు తీసేలా చేస్తుందన్నారు. ఈ సినిమాలో ఎన్టీఆర్ ప్రజెన్స్ అదిరిపోయిందన్నారు. సినిమాలో ఇంట్రో సీన్ నుంచి క్లైమాక్స్ వరకు ఎక్కడా ఆ టెంపో తగ్గలేదన్నారు. టెంపో తగ్గకుండా మెయింటెన్ చేశారని దర్శకుడు కొరటాల శివను ఆయన అభినందించారు. చివర్లో ట్విస్ట్ ఉందని, అయితే ఆ ట్విస్ట్ ని తాను రివీల్ చేయనని అన్నారు. తెలుగు సినిమాల్లో ఇది ఫస్ట్ డే కలెక్షన్లలో టాప్-2 గ్రాసర్ గా నిలుస్తుందని, ఇప్పటికే ఆ స్థాయిలో కలెక్షన్లు వచ్చాయన్నారు. రాబోయే రోజుల్లో ఇది కొత్త సినిమాలకు టార్గెట్ గా నిలుస్తుందన్నారు. దేవర ఇంత పెద్ద హిట్ అవడానికి ఎన్టీఆర్ కారణం అని, తాతగారిని ఆయన తనలో తెచ్చి పెట్టుకున్నారని, ప్రతి సీన్ లో మెప్పించారని అన్నారు దిల్ రాజు. ఈ సినిమా సక్సెస్ లో తాను కూడా పార్టనర్ కావడం సంతోషంగా ఉందన్నారు. విదేశాల్లో తెలుగు సినిమాకు దక్కుతున్న గౌరవం చూస్తే తనకు చాలా సంతోషంగా ఉందన్నారు. మన హీరోలను చైనా, జపాన్, మలేసియా ప్రేక్షకులు ఓన్ చేసుకున్నారని చెప్పారు.
Also Read: మీ అభిమానానికి నా మనసు పులకరించిపోయింది - ‘దేవర‘ రెస్పాన్స్ గురించి ఎన్టీఆర్ ఎమోషనల్ పోస్టు!