Rana Gives Update About 'Rana Naidu 2' Trailer And Streaming Date: టాలీవుడ్ టాప్ హీరోస్ విక్టరీ వెంకటేశ్, రానా కీలక పాత్రల్లో నటించిన వెబ్ సిరీస్ 'రానా నాయుడు' (Rana Naidu). గతంలో ఓటీటీ ప్లాట్ ఫాం 'నెట్ ఫ్లిక్స్'లో విడుదలై విజయం సాధించిన ఈ సిరీస్‌కు సీక్వెల్ రానా నాయుడు 2' (Rana Naidu) రాబోతోంది. ఓటీటీ ప్రియులు ఆసక్తిగా ఎదురుచూస్తోన్న ఈ సిరీస్ ట్రైలర్, స్ట్రీమింగ్ డేట్స్‌పై దగ్గుబాటి రానా తాజాగా కీలక అప్ డేట్ ఇచ్చారు. తాజాగా, ఆయన నిర్మించిన 'ఇట్స్ కాంప్లికేటెడ్' సినిమా ఈవెంట్లో దీనిపై మాట్లాడారు. 'రానా నాయుడు 2' వెబ్ సిరీస్ ట్రైలర్ సిద్ధమైందని.. విడుదల తేదీ సైతం ఖరారైనట్లు తెలిపారు. అతి త్వరలోని సిరీస్ స్ట్రీమింగ్‌కు వస్తుందన్నారు. ఇక ఇదే ఈవెంట్లో వెంకీ ఫ్యామిలీ ఎంటర్‌టైనర్.. 'నువ్వు నాకు నచ్చావ్' రీ రిలీజ్‌పైనా స్పందించారు. ఆ మూవీ యూనిట్‌తో మాట్లాడి ఆ సినిమాను రీరిలీజ్ చేస్తామన్నారు.
కాగా, గతేడాది జులైలో 'రానా నాాయుడు 2' షూటింగ్ ప్రారంభమైంది. మన దేశంలోనే కాకుండా ప్రపంచవ్యాప్తంగా ఈ సిరీస్‌కు విశేష ప్రేక్షకాదరణ లభించిందని నెట్ ఫ్లిక్స్ బృందం గతంలో తెలిపింది. దీన్ని దృష్టిలో ఉంచుకుని సీజన్-2ను ప్రేక్షకుల ముందుకు తీసుకువస్తున్నట్లు పేర్కొంది. 'రానా నాయుడు' సిరీస్ కంటే ఎన్నో ట్విస్టులు, మరింత ఫ్యామిలీ డ్రామాతో 'రానా నాయుడు 2'ను త్వరలోనే విడుదల చేస్తామని వెల్లడించింది. ఇటీవల టీజర్ విడుదల చేయగా ఆకట్టుకుంది. ఈ సిరీస్‌లో నటనకు గానూ రానా 'ఇండియన్ టెలీ అవార్డు 2024'లో ఉత్తమ నటుడిగా అవార్డు అందుకున్నారు.
విమర్శలను ఎదుర్కొన్న 'రానా నాయుడు'
అమెరికన్ టీవీ సిరీస్ 'రే డొనొవాస్'ను స్ఫూర్తిగా తీసుకుని ఇండియన్ ఆడియన్స్‌‌ను మెప్పించేలా 'రానా నాయుడు' సిరీస్‌ను కరన్ హన్షుమాన్ తీర్చిదిద్దారు. నెట్ ఫ్లిక్స్ ఓటీటీలో హిందీ, తెలుగుతో పాటు ఇంగ్లీష్, తమిళ్, మలయాళం, స్పానిష్ భాషల్లో గతేడాది మార్చి 10వ తేదీన అందుబాటులోకి వచ్చింది. ఇంగ్లీష్, హిందీ సబ్ టైటిల్స్‌తో స్ట్రీమింగ్ అయ్యింది. క్రైమ్, యాక్షన్ డ్రామాగా తెరకెక్కిన ఈ వెబ్ సిరీస్‌కు హిట్ టాక్ వచ్చినా అడల్ట్ కంటెంట్ ఎక్కువగా ఉండడంతో విమర్శలు ఎదుర్కొంది. రానా - వెంకీ నుంచి ఇలాంటి సిరీస్ ఊహించలేదని.. ఫ్యామిలీతో కలిసి చూడలేమంటూ ట్రోల్స్ నడిచాయి.
అయితే, విడుదలైన తొలి 2 రోజుల్లోనే భారత్ టాప్ ట్రెండింగ్ షోల్లో ఈ సిరీస్ ఫస్ట్ ప్లేస్‌లో నిలిచింది. అటు, ఈ ట్రోల్స్‌పై అప్పట్లోనే వెంకీ, రానా క్షమాపణ చెప్పారు. కుటుంబంతో కలిసి సిరీస్ చూడొద్దని.. ఇది 'ఏ' రేటెడ్ సిరీస్ అని, 18 ఏళ్లు నిండిన వారికి మాత్రమేనని స్పష్టం చేశారు. ఎన్ని విమర్శలు ఎదుర్కొన్నప్పటికీ గ్లోబల్ స్థాయిలో ఎక్కువ వ్యూస్ సొంతం చేసుకున్న వాటిలో ఈ సిరీస్ టాప్‌లో నిలిచింది. అంతే స్థాయిలో 'రానా నాయుడు 2' సైతం సిద్ధమైనట్లు తెలుస్తోంది. రెండో సీజన్‌లో రానా నాయుడు ఎలాంటి ఇబ్బందులను ఫేస్ చేశాడు.? తన ఫ్యామిలీని రక్షించుకునేందుకు రానా నాయుడు ఏం చేశారు.? గతంలో చేసిన పనుల వల్ల ఏర్పడిన కొత్త సమస్యలు ఏంటనే అంశాలు ఇందులో ఉంటాయి.