కళాకారులు కోరుకునేది చప్పట్లు అని చెబుతారు. సినిమా అనేది వ్యాపారం అయినా సరే వసూళ్లతో పాటు ప్రశంసల సైతం ముఖ్యమే. అటువంటిది మెగాస్టార్ చిరంజీవి చేత ప్రశంసలు అందుకోవడం అంటే మామూలు విషయం కాదు. ఆయన కంట్లో పడిన 2024 హిట్ సినిమాలు ఏవో తెలుసా?
చిరంజీవి కంట్లో పడిన 2024 హిట్స్ ఇవే!
చిరంజీవి వీరాభిమాని, యువ కథానాయకుడు సత్యదేవ్ నటించిన 'జీబ్రా' సినిమా ఈనెల 22వ తేదీన విడుదల కానుంది ఈ సందర్భంగా హైదరాబాద్ సిటీలో ఫ్రీ రిలీజ్ ఈవెంట్ నిర్వహించారు. చిరంజీవి ముఖ్య అతిథిగా హాజరు అయ్యారు. అక్కడ చిన్న సినిమాలు సాధించిన విజయాల గురించి మెగాస్టార్ మాట్లాడారు.
కరోనా కాలంలో ప్రేక్షకులు ఓటీటీ వేదికలకు అలవాటు పడడంతో ఇక చిన్న సినిమాలు చూడటానికి ప్రేక్షకులు థియేటర్లకు రారు అనే మాటలు వినిపించినప్పుడు అన్ని సినిమాలు ఆడాలని కోరుకునే తనలాంటి వాళ్ళు ఆలోచనలలో పడ్డామని చిరంజీవి అన్నారు. ఈ ఏడాది వచ్చిన సినిమాలు గమనిస్తే... కొన్ని చిన్న సినిమాలు భారీ విజయాలు సాధించడం తనకు ఎంతో సంతోషంగా ఉందని చిరు తెలిపారు. భారీ సినిమాలో విజయం సాధించడంతో పాటు చిన్నచితకా సినిమాలు ఆడినప్పుడే పరిశ్రమ కళకళలాడుతుందని ఆయన అన్నారు.
సంక్రాంతికి విడుదలైన ప్రశాంత్ వర్మ, తేజ సజ్జాల 'హనుమాన్' సినిమా కేవలం తెలుగు ప్రేక్షకులను మాత్రమే కాకుండా పాన్ ఇండియా స్థాయిలో విజయం సాధించడం తనకు ఎంతో సంతోషంగా ఉందని చిరంజీవి చెప్పారు. మెగా డాటర్ నిహారిక నిర్మించిన 'కమిటీ కుర్రోళ్ళు', సిద్దు జొన్నలగడ్డ కథానాయకుడిగా నటించిన 'టిల్లు స్క్వేర్' సైతం విషయాలు సాధించాయని ఆనందం వ్యక్తం చేశారు. దీపావళికి విడుదలైన 'లక్కీ భాస్కర్', 'క', 'అమరన్' సినిమాలు అన్ని విజయాలు సాధించడం మంచి పరిణామం అన్నారు. కీరవాణి గారి అబ్బాయి శ్రీ సింహ, సత్య నటించిన 'మత్తు వదలరా 2' సినిమాను రెండుసార్లు చూశానని చెప్పారు. ఈ సినిమాలకు చిరు ప్రశంసలు లభించడంతో ఆయా చిత్ర బృందాలు సంతోషంగా మునిగాయి.
ప్రేక్షకులది తప్పు కానే కాదు...
ఒకవేళ తప్పు ఏదైనా ఉంటే అది మాదే!
ప్రేక్షకులది ఎప్పుడు తప్పు ఉండదని చిరంజీవి చెప్పారు. ఒకవేళ సినిమాలు ఆడలేదు అంటే అది తీసిన తమది తప్పు అని ఆయన తెలిపారు. మంచి సినిమాలు వచ్చిన ప్రతిసారి ప్రేక్షకుల ఆదరణకు నోచుకుంటున్నాయని ఆయన వివరించారు. ఈ ఏడాది విడుదలైన సినిమాలలో సక్సెస్ రేట్ 20 శాతం ఉండడం శుభ పరిణామం అని చెప్పారు.
చిన్న సినిమాలకు మెగాస్టార్ అండగా నిలబడుతున్నారు. 'కమిటీ కుర్రోళ్ళు', 'ఆయా', 'టిల్లు స్క్వేర్', 'క' విజయాల తర్వాత ఆయా చిత్ర బృందాలను తన ఇంటికి ఆహ్వానించి వాళ్ళను అభినందించారు.
సత్యదేవ్ నాకు మూడో తమ్ముడు!
సత్యదేవ్ తనకు మూడో తమ్ముడు అని చిరంజీవి అన్నారు. కరోనా సమయంలో అతను నటించిన బ్లఫ్ మాస్టర్ సినిమా చూశానని, ఆ మూవీలో చాలా చక్కగా నటించాడని... టాలెంటెడ్ ఆర్టిస్ట్ కనుక 'గాడ్ ఫాదర్' సినిమాలో అవకాశం ఇచ్చానని చిరు చెప్పారు. ఇప్పుడు సత్యదేవ్ నటించిన 'జీబ్రా' మంచి విజయం సాధించి హీరోగా అతనికి మరింత మంచి భవిష్యత్తును తీసుకురావాలని కోరుకుంటున్నట్లు తెలిపారు.