Nivetha Thomas: సౌత్ హీరోయిన్ నివేదా థామస్ తెలుగు తెర మీద కనిపించి రెండేళ్లు దాటిపోయింది. ఒకప్పుడు వైవిధ్యమైన సినిమాలతో ప్రేక్షకులను అలరించిన ఈ బ్యూటీ.. కారణాలు తెలియదు కానీ ఇటీవల కాలంలో సినిమాలు బాగా తగ్గించేసింది. చివరగా ఆమె 2022లో 'శాకినీ డాకినీ' అనే చిత్రంలో నటించింది. చాలా గ్యాప్ తర్వాత ఇప్పుడు '35 - చిన్న కథ కాదు' అనే చిన్న సినిమాతో టాలీవుడ్ లోకి రీఎంట్రీ ఇవ్వడానికి రెడీ అయింది. ప్రమోషన్స్ లో భాగంగా రెగ్యులర్ గా ఫోటోలు, వీడియోలు షేర్ చేస్తూ, సోషల్ మీడియాలో సందడి చేస్తోంది.
దగ్గుబాటి రానా సమర్పణలో సురేష్ ప్రొడక్షన్స్ బ్యానర్ లో రూపొందిన చిత్రం '35 - చిన్న కథ కాదు'. నంద కిషోర్ దర్శకత్వం వహించిన ఈ సినిమాలో నివేదా థామస్ లీడ్ రోల్ ప్లే చేస్తోంది. అప్పుడెప్పుడో షూటింగ్ పూర్తి చేసుకున్న ఈ చిత్రాన్ని ప్రేక్షకుల ముందుకు తీసుకురాడానికి మేకర్స్ సన్నాహాలు చేస్తున్నారు. ఇప్పటికే రిలీజైన ఫస్ట్ లుక్, టీజర్, ఇతర పోస్టర్స్ కు ఆడియన్స్ నుంచి మంచి రెస్పాన్స్ వచ్చింది. ఈ క్రమంలో ఫ్రెండ్ షిప్ డే స్పెషల్ గా 'సయ్యారే సయ్యా' అనే సాంగ్ ను రిలీజ్ చేసారు. తాజాగా ఈ పాటకు నివేదా ఓ రీల్ చేసి తన ఇంస్టాగ్రామ్ లో పోస్ట్ చేసింది. 'నా బడ్డీతో సయ్యారే సయ్యారింగ్' అని దీనికి ఓ కూడా క్యాప్షన్ పెట్టింది.
''మన తోబుట్టువులు, స్నేహితులు, కుటుంబ సభ్యులతో ప్రతిధ్వనింపజేసే పాట. అన్ని విషయాలు ఆహ్లాదకరంగా ఉంటాయి'' అంటూ నివేదా థామస్ తన తమ్ముడితో గడిపిన ఆనందకరమైన క్షణాలను, ఫన్నీ మూమెంట్స్ ను పంచుకుంటుంది. చిన్నప్పటి ఫోటోలు, కలిసి అల్లరి చేస్తున్న పిక్స్, వర్షంలో డ్యాన్స్ చేస్తున్న వీడియో, చిన్నపిల్లల్లా మారి ఆటలు ఆడుకుంటున్న వీడియోలతో కలిపి ఎడిటి చేసిన ఈ రీల్ ఆకట్టుకుంటోంది. అందరూ ఇలానే తమ బడ్డీలతో వీడియోలు చేసి తనను ట్యాగ్ చేయాలని నివేదా కోరింది. వాటిల్లో సూపర్ ఫన్నీగా ఉన్న వాటిని తన ఇన్స్టా స్టోరీలో షేర్ చేస్తానని, అవన్నీ 35 ఆల్బమ్ లో యాడ్ చేయబడతాయని పేర్కొంది.
'35 - చిన్న కథ కాదు' సినిమాలో నివేదా థామస్ పెళ్ళై ఇద్దరు పిల్లలు ఉన్న గృహిణి సరస్వతి పాత్రలో కనిపించనుంది. తల్లి పాత్రలో నటించడం ఒక పెద్ద సవాలు అని చెబుతోంది. ఆమెతో పాటుగా ప్రియదర్శి పులికొండ, విశ్వదేవ్ రాచకొండ ప్రధాన పాత్రలు పోషించారు. గౌతమి, భాగ్యరాజ్, అనన్య, కృష్ణ తేజ తదితరులు ఇతర పాత్రల్లో కనిపించనున్నారు. వివేక్ సాగర్ సంగీతం సమకూర్చిన ఈ సినిమాకి నికేత్ బొమ్మి సినిమాటోగ్రఫీ నిర్వహించారు. ముందుగా ఈ చిత్రాన్ని స్వతంత్ర దినోత్సవం సందర్భంగా ఆగస్టు 25న తెలుగు తమిళ మలయాళ భాషల్లో విడుదల చేయాలని భావించారు. కానీ ఇప్పుడు మేకర్స్ మరో డేట్ కోసం ట్రై చేస్తున్నట్లు టాక్ వినిపిస్తోంది.
ఇక నివేదా థామస్ విషయానికొస్తే, మలయాళ ఇండస్ట్రీలో చైల్డ్ ఆర్టిస్టుగా కెరీర్ ప్రారంభించింది. 'మధ్య వేనల్' అనే చిత్రంలో సపోర్టింగ్ క్యారక్టర్ చేసిన నివేదా.. 2011లో 'చెప్ప కురిష్' సినిమాతో లీడ్ యాక్ట్రెస్ గా మారింది. హీరోయిన్ పాత్రలే కాకుండా ప్రాధాన్యమున్న ఇతర పాత్రల్లోనూ నటించింది. 'దృశ్యం' తమిళ్ రీమేక్ లో కమల్ హాసన్ కూతురిగా, 'దర్బార్' చిత్రంలో రజనీకాంత్ కుమార్తెగా, 'జిల్లా' మూవీలో మోహన్ లాల్ డాటర్ గా నటించింది. నాని 'జెంటిల్ మెన్' మూవీతో టాలీవుడ్‌లో హీరోయిన్ గా ఎంట్రీ ఇచ్చిన నివేద.. నిన్ను కోరి, జై లవకుశ, బ్రోచేవారెవరురా, 118, వి, వ‌కీల్‌ సాబ్‌ సినిమాలతో మంచి పేరు తెచ్చుకుంది. చివరగా 2023లో 'ఎంతాడ సాజి' అనే మలయాళ మూవీలో కనిపించింది. ఈ మధ్య కాలంలో కాస్త బొద్దుగా మారిన ఈ బ్యూటీ ఇప్పుడు '35 చిన్న కథ కాదు' చిత్రంతో తెలుగు ఆడియన్స్‌ను పలకరించబోతోంది. మరి ఈ సినిమా ఆమెకు ఎలాంటి విజయాన్ని అందిస్తుందో చూడాలి.