Kanguva Shooting Update: కోలీవుడ్ స్టార్ హీరో సూర్య ప్రస్తుతం 'కంగువ' అనే భారీ పీరియాడిక్ యాక్షన్ డ్రామాలో నటిస్తున్న సంగతి తెలిసిందే. తమిళ మాస్ డైరెక్టర్ సిరుతై శివ ఈ చిత్రానికి దర్శకత్వం వహిస్తున్నారు. ఇప్పటికే విడుదలైన సూర్య ఫస్ట్ లుక్, గ్లింప్స్ ఫ్యాన్స్ ను విశేషంగా ఆకట్టుకున్నాయి. తాజాగా ఈ సినిమా షూటింగ్ అప్డేట్ ని సూర్య సోషల్ మీడియాలో పంచుకున్నారు.


'కంగువ' సినిమాలో తన పాత్రకు సంబంధించిన చిత్రీకరణ పూర్తయినట్లు సూర్య తెలిపారు. ఈ టీమ్ తనకు ఎన్నో జ్ఞాపకాలను అందించిందని, ఫ్యామిలీని మిస్ అవుతున్నట్లు ఉందని పేర్కొన్నారు. ఈ సందర్భంగా షేర్ చేసిన స్టిల్ లో సూర్య ఒక యోధుడిలా కనిపిస్తున్నాడు. పొడవాటి ఉంగరాల జుట్టు, ఒంటి నిండా టాటూలతో ఉన్నాడు. గుర్రంపై కూర్చొని చేతిలో కత్తి పట్టుకొని ఉండటాన్ని బట్టి చూస్తే, అతను యుద్ధానికి బయలుదేరుతున్నట్లు తెలుస్తోంది.


“కంగువ సినిమా కోసం నా లాస్ట్ షాట్ పూర్తి అయ్యింది. యూనిట్ మొత్తం పాజిటివిటీతో నిండిపోయింది. ఇది ఒకదానికి ముగింపు, మరెన్నింటికో మొదలు. ఎన్నో జ్ఞాపకాలను అందించిన దర్శకుడు శివ మరియు టీమ్ మొత్తానికి ధన్యవాదాలు. కంగువ చాలా పెద్దది, ప్రత్యేకమైనది. ఈ సినిమాని మీ అందరికీ వెండితెరపై చూడడానికి ఆతృతగా ఎదురు చూస్తున్నాను” అని సూర్య తన ట్వీట్ లో పేర్కొన్నారు. 






Also Read: కీర్తి సురేష్ సినిమాని నేరుగా ఓటీటీలో రిలీజ్ చేస్తున్నారా?


ఇదిలా ఉంటే 'కంగువ' చిత్రాన్ని 2024 సమ్మర్ లో ప్రేక్షకుల ముందుకి తీసుకురాబోతున్నట్లు మేకర్స్ చాలా రోజుల క్రితమే ప్రకటించారు. తెలుగు తమిళం హిందీతో సహా ప్రపంచవ్యాప్తంగా పది భాషల్లో ౩-డీ & ఐమాక్స్ ఫార్మాట్‌లో గ్రాండ్‌ గా రిలీజ్ చేయటానికి సన్నాహాలు చేస్తున్నట్లు తెలుస్తోంది. దీని కోసం ఏప్రిల్ 11వ తేదీని పరిశీలిస్తున్నట్లు వార్తలు వస్తున్నాయి. అదే నిజమైతే వారం రోజులు ముందుగా థియేటర్లలోకి రాబోతున్న యంగ్ టైగర్ ఎన్టీఆర్ 'దేవర పార్ట్ 1' సినిమాతో సూర్య పోటీ పడాల్సి వస్తుంది. త్వరలోనే మేకర్స్ రిలీజ్ డేట్ పై క్లారిటీ ఇస్తారేమో చూడాలి.


ప్రాచీన కాలానికి, ఆధునిక కాలానికి లింక్ చేస్తూ సాగే కథాంశంతో 'కంగువ' మూవీ తెరకెక్కుతున్నట్టు ప్రచారం జరుగుతోంది. ఇందులో యాక్షన్ సీన్స్, విజువల్‌ ఎఫెక్ట్స్‌ కి అధిక ప్రాధాన్యత ఉండనుంది. ఇక ఈ చిత్రంలో సూర్య గతంలో ఎన్నడూ లేని విధంగా ఆరు విభిన్నమైన పాత్రల్లో కనిపించనున్నట్లు టాక్. బాలీవుడ్ బ్యూటీ దిశా పటానీ హీరోయిన్ గా నటిస్తోంది. బాబీ డియోల్ విలన్ పాత్ర పోషిస్తుండగా.. జగపతిబాబు, యోగిబాబు, నటరాజన్ తదితరులు కీలక పాత్రల్లో నటిస్తున్నారు. 


జ్ఞానవేల్ రాజా సమర్పణలో స్టూడియో గ్రీన్, యూవీ క్రియేషన్స్ సంస్థలు సంయుక్తంగా భారీ బడ్జెట్ తో 'కంగువ' చిత్రాన్ని నిర్మిస్తున్నాయి. దేవిశ్రీ ప్రసాద్‌ సంగీతం సమకూరుస్తున్న ఈ సినిమాకి వెట్రి పళనిస్వామి సినిమాటోగ్రఫీ నిర్వహిస్తున్నారు.


Also Read: హాలీవుడ్ హీరోలను తలదన్నేలా సోగ్గాడి స్టైలిష్ లుక్‌ - ఆర్జీవీ వీడియో వైరల్!