ప్రముఖ సీనియర్ నటుడు రాజేంద్రప్రసాద్ ప్రధాన పాత్రలో నటించిన సినిమా 'సేనాపతి'. పవన్ సాధినేని డైరెక్ట్ చేసిన ఈ సినిమా 'ఆహా'లో డిసెంబర్ 31 నుంచి స్ట్రీమింగ్ అవుతోంది. తమిళ సినిమా '8 తొట్టక్కల్'కి రీమేక్ గా దీన్ని తెరకెక్కించారు. ఈ సినిమా చూసిన ప్రతి ఒక్కరూ రాజేంద్రప్రసాద్ పెర్ఫార్మన్స్ ను, దర్శకుడి టేకింగ్ ను మెచ్చుకుంటున్నారు. తాజాగా మెగాస్టార్ చిరంజీవి కూడా ఈ సినిమాపై స్పందించారు.
ట్విట్టర్ లో ఈ సినిమాను ప్రశంసిస్తూ ఓ పోస్ట్ పెట్టారు. ''సేనాపతి' చూశాను. యువదర్శకుడు పవన్ సదినేని ఎంతో ఆసక్తికరం గా, అనుక్షణం ఏం జరుగుతుందోననే ఉత్కంఠభరితంగా ఉండేలా తీశాడు. మంచి అభిరుచికి అద్దంపట్టే చిత్రాన్ని నిర్మించిన యువనిర్మాతలు సుష్మిత కొణిదెల, విష్ణులకి నా ప్రేమాభినందనలు. అన్నింటికీ మించి సీనియర్ నటుడు 'నటకిరీటి' రాజేంద్రప్రసాద్ ఒక వినూత్న పాత్రలో అద్భుతంగా నటించాడు. తన నటనా ప్రతిభకి ఈ చిత్రం ఓ మచ్చు తునక. ఈ ప్రయత్నం వెనుక వున్న GOLDBOX Entertainment టీం అందరికీ నా శుభాకాంక్షలు! 'ఆహా' OTT ప్లాట్ ఫార్మ్ లో విడుదలైన ఈ చిత్రం తప్పకుండా ప్రేక్షకుల మన్ననలు పొందుతుందని భావిస్తున్నాను' అంటూ రాసుకొచ్చారు.
రాజేంద్ర ప్రసాద్ తో పాటు ఈ సినిమాలో నరేష్ అగస్త్య, జ్ఞానేశ్వరి కండ్రేగుల, హర్షవర్ధన్, రాకేందు మౌళి, 'జోష్' రవి, సత్యప్రకాష్, పావని రెడ్డి, జీవన్ కుమార్ తదితరులు నటించారు.