Tollywood: ఈ వారం థియేటర్, ఓటీటీల్లో సందడి చేయబోయే సినిమాలివే!

ఈ వారం థియేటర్, ఓటీటీలో సందడి చేయడానికి చాలా సినిమాలు సిద్ధంగా ఉన్నాయి. అవేంటో ఇప్పుడు చూద్దాం!

ఇప్పటివరకు టాలీవుడ్ లో పెద్ద సినిమాలు విడుదల కాగా.. ఇప్పుడు చిన్న సినిమాలు థియేటర్ వద్ద క్యూ కడుతున్నాయి. అలానే ఓటీటీలో సందడి చేయడానికి చాలా సినిమాలు సిద్ధంగా ఉన్నాయి. అవేంటో ఇప్పుడు చూద్దాం!

శేఖర్: రాజశేఖర్ కథానాయకుడిగా రూపొందిన సినిమా 'శేఖర్'. మే 20న ఈ సినిమా ప్రేక్షకుల ముందుకు రానుంది. ఈ సినిమాకు రాజశేఖర్ సతీమణి, నటి జీవిత దర్శకత్వం వహించారు. ఈ దంపతుల పెద్ద కుమార్తె శివాని ఈ సినిమాలో కీలక పాత్ర చేశారు. పెగాసస్ సినీ కార్ప్, టారస్ సినీ కార్ప్, సుధాకర్ ఇంపెక్స్ ఐపీఎల్, త్రిపురా క్రియేషన్స్ పతాకాలపై బీరం సుధాకర్ రెడ్డి, శివాని రాజశేఖర్, శివాత్మిక రాజశేఖర్, వెంకట శ్రీనివాస్ బొగ్గరం చిత్రాన్ని నిర్మించారు. ఈ చిత్రానికి అనూప్ రూబెన్స్ సంగీతం అందించారు.

ధగడ్ సాంబ: బర్నింగ్ స్టార్‌ సంపూర్ణేష్ బాబు ప్రధాన పాత్రలో తెరకెక్కిన సినిమా 'ధగడ్ సాంబ'. మే 20న ఈ సినిమా విడుదల కానుంది. ఈ సినిమాకు ఎన్‌ఆర్‌ రెడ్డి డైరెక్టర్‌. సోనాక్షి హీరోయిన్ గా నటించింది. 

ధాకడ్: కాంట్రవర్సీ క్వీన్‌ కంగనా రనౌత్ నటించిన లేటెస్ట్ సినిమా 'ధాకడ్'. స్పై యాక్షన్ థ్రిల్లర్ గా తెరకెక్కిన ఈ సినిమాను రజనీష్ తెరకెక్కించారు. ఇటీవల విడుదలైన సినిమా ట్రైలర్ ఓ రేంజ్ లో ఉంది. ఈ సినిమా కూడా మే 20నే వస్తుంది. 

భూల్ భులైయా2: 2007లో దర్శకుడు ప్రియదర్శన్ 'భూల్ భులైయా' అనే సినిమాను రూపొందించారు. అక్షయ్ కుమార్, విద్యాబాలన్ ప్రధాన పాత్రలు పోషించిన ఈ సినిమా భారీ విజయాన్ని అందుకుంది. ఇప్పుడు ఈ సినిమా పేరుతో 'భూల్ భులైయా2' రాబోతుంది. తొలి చిత్రంలో కీలకపాత్ర పోషించిన రాజ్ పాల్ యాదవ్ ఈ సినిమాలో కూడా నటించారు. యంగ్ హీరో కార్తిక్ ఆర్యన్, కియారా అద్వానీ, టబు ప్రధాన పాత్రలు పోషిస్తున్నారు. దర్శకుడు అనీష్ బాజ్మీ ఈ సినిమాను రూపొందిస్తున్నారు. మే 20న ఈ సినిమా ప్రేక్షకుల ముందుకు రాబోతుంది. 

ఓటీటీ రిలీజెస్: 
ఆర్ఆర్ఆర్: ఎన్టీఆర్, రామ్ చరణ్ హీరోలుగా దర్శకుడు రాజమౌళి తెరకెక్కించిన ఈ సినిమా సెన్సేషన్ అయింది. బాక్సాఫీస్ వద్ద రికార్డులు సృష్టించిన ఈ సినిమా ఇప్పుడు ఓటీటీలో సందడి చేయబోతుంది. మే 20 నుంచి జీ5 ఓటీటీలో ఈ సినిమా స్ట్రీమింగ్ కానుంది. అయితే అద్దె చెల్లించి ఈ సినిమాను చూడాలి!

ఆచార్య: మెగాస్టార్ నటించిన 'ఆచార్య' మే 20 నుంచి అమెజాన్ ప్రైమ్ లో స్ట్రీమింగ్ కానుంది.

భళా తందనాన: శ్రీవిష్ణు నటించిన ఈ సినిమా రెండు వారాలు తిరగకముందే ఓటీటీలోకి రానుంది. మే 20 నుంచి డిస్నీ హాట్ స్టార్ లో స్ట్రీమింగ్ కానుంది. 

12th మ్యాన్: మోహన్ లాల్ నటించిన ఈ సినిమా మే 20న హాట్ స్టార్ లో స్ట్రీమింగ్ కానుంది. దీనికి జీతూ జోసెఫ్ దర్శకుడు.