Telugu Bigg Boss 7: బిగ్ బాస్ సీజన్ 7లో ఇక కంటెస్టెంట్స్ అంతా గొడవలు పడే టాస్కులు అయిపోయాయేమో అనిపిస్తోంది. ఎందుకంటే ఫైనల్‌గా ఫినాలే వీక్‌లో టాప్ 6 కంటెస్టెంట్స్ మాత్రమే మిగిలారు. అందుకే బిగ్ బాస్ హౌజ్‌లో ఈ ఆరుగురి ప్రయాణాన్ని వారి కళ్లకు కట్టినట్టు చూపిస్తూ వారిని ఎమోషనల్ చేస్తున్నారు బిగ్ బాస్. కొన్నిరోజులపాటు టాస్కులను పూర్తిగా పక్కనపెట్టేశారు. ఇప్పటికే పలువురు కంటెస్టెంట్స్.. వారి జర్నీ వీడియోలు చూసి ఎమోషనల్ కాగా.. తాజాగా ప్రసారమయిన ఎపిసోడ్‌లో యావర్, ప్రశాంత్‌లు కూడా ఎమోషనల్ ఫీల్ అయ్యారు. యావర్ అయితే వెక్కివెక్కి ఏడుస్తూ బిగ్ బాస్‌కు ధన్యవాదాలు చెప్పుకున్నాడు.
యావర్ ఎమోషనల్ ఓవరాక్షన్..
తన జర్నీ వీడియోలో తన అన్నయ్యను చూడగానే ఏడవడం మొదలుపెట్టాడు యావర్. శివాజీతో తనకు ఉన్న బాండింగ్, ప్రశాంత్‌తో ఫ్రెండ్‌షిప్.. అన్నీ తనను చాలా ఎమోషనల్ చేశాయి. ఇక జర్నీ వీడియో చూసుకున్న తర్వాత ‘‘నాలో చాలా కోపం ఉందని చాలామంది అనుకుంటారు. కానీ చరిత్రను తిరగరాసే దమ్ముంది నాలో’’ అని చాలా ఇంటెన్స్ డైలాగ్ కొట్టాడు యావర్. ఆ తర్వాత ‘‘థాంక్యూ బిగ్ బాస్ నాకు ఈ అవకాశం ఇచ్చినందుకు. ఈ నేషనల్ టీవీలో అందరికీ నేనొక విషయం చెప్పాలని అనుకుంటున్నాను. ఒకవేళ నేను గెలిస్తే.. అవసరమైనవాళ్లకి ఈ యావర్ హెల్ప్ చేస్తాడు. నేను నిలబడితే నాతో పాటు మరొకరిని నిలబెడతాను. అదే యావర్ అంటే. నేను హైదరాబాద్ బిడ్డ కాదు. నేను కోలకత్తా బిడ్డ కాదు. నేను నీ బిడ్డ’’ అంటూ బిగ్ బాస్‌తో చెప్పుకొచ్చాడు. ‘‘ఎప్పటివరకు నా ఊపిరి ఉంటుందో.. అప్పటివరకు బిగ్ బాస్ పేరు నా మనసుపై నిలిచిపోతుంది. అసలు నేను ఎవరు? అసలు యావర్ ఎవరు? ఒకప్పుడు నేను నథింగ్.. కానీ మీరే నన్ను సంథింగ్ చేశారు’’ అని అన్నాడు. ఆ తర్వాత వెక్కివెక్కి ఏడుస్తూ బిగ్ బాస్‌కు లవ్ యూ చెప్పాడు. అంతే కాకుండా తనను బిగ్ బాస్ నమ్మాడని ఏడ్చాడు. బిగ్ బాస్ తనకు రెండో తల్లి అన్నాడు. చెప్పడానికి మాటలు లేవు అంటూ అలాగే ఏడుస్తూ బయటికి వెళ్లిపోయాడు.
పదేపదే రైతుబిడ్డ అని గుర్తుచేసిన ప్రశాంత్..
యావర్ తర్వాత బిగ్ బాస్ హౌజ్‌లో తన జర్నీ చూసుకోవడానికి వచ్చాడు పల్లవి ప్రశాంత్. తన ఏవీ తాను చూస్తున్నంతసేపు తనలో వేరే మనిషి ప్రవేశించినట్టుగా ఊగిపోతూనే ఉన్నాడు. ఆ తర్వాత తను కూడా యావర్‌లాగా ఎమోషనల్ అయ్యాడు. ఇంత గొప్ప అవకాశం ఇచ్చినందుకు, బిగ్ బాస్‌కు రుణపడి ఉంటానని థాంక్యూ చెప్పుకున్నాడు. మళ్లీ మళ్లీ తాను రైతుబిడ్డ అని ఆడియన్స్‌కు గుర్తుచేశాడు. ఆ తర్వాత హౌజ్‌లోకి వెళ్లి తన జర్నీ వీడియో చాలా బాగుందని చెప్తూ.. అసలు వీడియోలో ఎవరెవరు ఉన్నారో చెప్పుకొచ్చాడు. అమర్‌కు, తనకు జరిగిన గొడవలే వీడియోలో ఎక్కువగా ఉన్నాయని అమర్‌తో అన్నాడు. అది విన్న అమర్.. చిన్నపిల్లవాడిలాగా నలుగురి జర్నీ వీడియోల్లో తాను ఉన్నానని హ్యాపీగా ఫీల్ అయ్యాడు. అంతే కాకుండా నాలుగు సినిమాల్లో ఉన్నానని మురిసిపోయాడు. ప్రస్తుతం బయట ఉన్న పరిస్థితి చూస్తుంటే.. రైతుబిడ్డకే ఎక్కువ సపోర్ట్ దక్కేలా అనిపిస్తోంది. తనే విన్నర్ అయినా ఆశ్చర్యపోవాల్సిన అవసరం లేదని పలువురు బిగ్ బాస్ ప్రేక్షకులు అభిప్రాయం వ్యక్తం చేస్తున్నారు.
Also Read: ‘బిగ్ బాస్’ ఫినాలే: ఓటింగ్‌లో వారే టాప్, ఆ కంటెస్టెంట్‌‌కు మిడ్ వీక్ ఎలిమినేషన్ గండం