టైం అనేది ఎప్పుడు, ఎవరిని, ఎలా మార్చుతుందో చెప్పడం కష్టం. మరికొద్ది గంటల్లో బిగ్ బాస్ హౌస్ లోకి అడుగు పెట్టాల్సిన ఓ బుల్లితెర నటి ఇంట్లో ఘోర విషాదం చోటు చేసుకుంది. ఇప్పటికే ఆమె బిగ్ బాస్ కోసం ఎంతో కష్టపడి ప్రిపేర్ అయ్యింది. డ్యాన్సు ప్రాక్టీసు చేసింది. షో కోసం ఏవీలు రూపొందించారు. బిగ్ బాస్ హౌస్ లోకి అడుగు పెట్టడమే తరువాయి అనుకుంటున్న సమయంలో బుల్లితెర నటి పూజా మూర్తి తండ్రి చనిపోయారు. గుండె సంబంధ సమస్యతో అకాల మరణం పొందారు. ఆమె కుటుంబ సభ్యులు విషాదంలో మునిగిపోయారు.
క్షమించు నాన్నా అంటూ పూజా మూర్తి ఆవేదన!
తనను అల్లారు ముద్దుగా పెంచి పోషించిన తండ్రి తిరిగిరాని లోకాలకు వెళ్లిపోవడంతో పూజా పుట్టెడు దుఃఖంలో మునిగిపోయింది. తండ్రి ఇక లేరనే విషయం తెలుసుకుని కన్నీరు మున్నీరవుతోంది.ఈ మేరకు సోషల్ మీడియాలో ఓ పోస్టు పెట్టింది. వీలైతే తిరిగి వచ్చేయండి నాన్నా అంటూ బతిమలాడుకుంది. 'RIP.. వీలైతే తిరిగి రండి. నిన్ను ఎంతో ప్రేమించాను నాన్నా. ప్రతిక్షణం నిన్ను మిస్ అవుతున్నాను. నాకు తెలిసినంత వరకు నిన్ను గర్వపడేలా చేశాను అని అనుకుంటున్నాను. తెలిసో, తెలియకో ఏదైనా పొరపాటు చేసి ఉంటే క్షమించు నాన్నా. నువ్వు నాతోనే ఉంటావని నాకు తెలుసు. నీ ఆశీస్సులు నాకు, అమ్మకు ఎప్పుడూ ఉంటాయని భావిస్తున్నాను. నీ ఆత్మకు శాంతి చేకూరాలని కోరుకుంటున్నాను” అంటూ సోషల్ మీడియాలో రాసుకొచ్చింది. ఈ మేరకు తన తండ్రితో కలిసి దిగిన ఫోటోను షేర్ చేసింది.
బిగ్ బాస్ షో నుంచి తప్పుకున్న పూజ
పూజా మూర్తి కన్నడ సీరియల్స్ తో మంచి గుర్తింపు తెచ్చుకుంది. తెలుగులో ‘గుండమ్మ కథ’తో బుల్లితెర ప్రేక్షకులకు దగ్గరైంది. అటు యాంకర్ ప్రదీప్ హోస్ట్ గా వ్యవహరించిన ‘సూపర్ క్వీన్’ షోలో పాల్గొంది. చక్కటి గుర్తింపు తెచ్చుకుంది. ప్రస్తుతం బుల్లితెరపై మంచి పాపులారిటీ సంపాదించుకున్న పూజకు బిగ్ బాస్ సీజన్ 7లో కంటెస్టెంట్ గా పాల్గొనే అవకాశం లభించింది. పూజా బిగ్ బాస్ హౌస్ లోకి వెళ్లేందుకు రెడీ అయ్యింది. షోలో ఎంట్రీ ఇచ్చేందుకు చక్కగా డ్యాన్స్ కూడా ప్రాక్టీస్ చేసింది. మరికొద్ది గంటల్లోనే ఆమె బిగ్ బాస్ హౌస్ లోకి అడుగు పెడుతుంది అనుకుంటున్న సమయంలో ఈ విషాదం జరిగింది. తండ్రి అకాల మరణంతో ఆమె ఈ షోకు రాలేనని చెప్పినట్లు తెలుస్తోంది. ఈ విషయం తెలుసుకున్న అభిమానులు పాపం అంటున్నారు. ఆమె తండ్రి ఆత్మకు శాంతి చేకూరాలని కోరుకుంటున్నారు.
ఇక బిగ్ బాస్ ఇప్పటికే 6 సీజన్లు సక్సెస్ ఫుల్ గా కంప్లీట్ చేసుకుంది. ప్రస్తుతం 7వ సీజన్ కు రెడీ అవుతోంది. సెప్టెంబర్ 3 నుంచి ఈ షో మొదలుకానుంది. అటు బిగ్ బాస్ షోకు సంబంధించిన ప్రోమోలు, టీజర్లు ప్రేక్షకులలో మంచి ఆసక్తి కలిగిస్తున్నాయి.
Read Also: వెల్‌కమ్ టు ది ఫ్యూచర్ - విజయ్ కొత్త మూవీ గురించి అదిరిపోయే అప్‌డేట్
ముఖ్యమైన, మరిన్ని ఆసక్తికర కథనాల కోసం ‘టెలిగ్రామ్’లో ‘ఏబీపీ దేశం’లో జాయిన్ అవ్వండి.
Join Us on Telegram: https://t.me/abpdesamofficial