బుల్లితెరపై బిగ్ బాస్(Bigg Boss Telugu) షోకి ఉన్న క్రేజ్ గురించి ప్రత్యేకంగా చెప్పనక్కర్లేదు. ఇప్పటికే తెలుగులో మొత్తం ఐదు సీజన్లను పూర్తి చేసుకుంది బిగ్ బాస్. ఇప్పుడు కొత్తగా బిగ్ బాస్ ఓటీటీ(Bigg Boss Telugu OTT) వెర్షన్ ను మొదలుపెట్టబోతున్నారు. డిస్నీ హాట్ స్టార్ లో ప్రత్యేకంగా ఓటీటీ వెర్షన్ టెలికాస్ట్ అవుతుంది. ఇప్పటికే హిందీలో ఓటీటీ వెర్షన్ ఒక సీజన్ ను పూర్తి చేసుకున్నారు. తమిళంలో బిగ్ బాస్ అల్టిమేట్ పేరుతో ఓటీటీ వెర్షన్ ను టెలికాస్ట్ చేస్తున్నారు. ఇప్పుడు తెలుగులో కూడా ఓటీటీ వెర్షన్ టెలికాస్ట్ కానుంది.
ఈసారి 24/7 ఈ షో హాట్ స్టార్ లో ప్రసారమవుతూనే ఉంటుంది. దీనికి సంబంధించిన ప్రోమోను ఇటీవల విడుదల చేయగా.. అది బాగా వైరల్ అయింది. ఈ నెల 26 నుంచి ఈ నాన్ స్టాప్ బిగ్ బాస్ షో సందడి చేయబోతుంది. ఇప్పటికే దాదాపు 20 మంది కంటెస్టెంట్లను తీసుకున్నారు. అందరినీ ప్రస్తుతం క్వారెంటైన్ లో ఉంచారు. వేర్వేరు హోటల్స్ లో ఐసోలేషన్ లో ఉన్న కంటెస్టెంట్స్ లో 18 మంది మాత్రమే బిగ్ బాస్ హౌస్ లోకి వెళ్తారు.
ఇప్పటికే తేజస్వి, ముమైత్ ఖాన్, అరియనా గ్లోరీ, నటరాజ్ మాస్టర్ ల పేర్లు లీక్ అయ్యాయి. వీరంతా ఇంతకముందు సీజన్లలో పాల్గొన్నారు. ఈసారి ఓటీటీ వెర్షన్ కోసం సిద్ధమవుతున్నారు. అలానే రీసెంట్ గా విడుదలైన బిగ్ బాస్ హౌస్ ఫస్ట్ లుక్ ప్రోమోలో బిగ్ బాస్ సీజన్ 5 కంటెస్టెంట్ హమీద కూడా కనిపించింది. కాబట్టి ఆమె కూడా ఓటీటీ వెర్షన్ లో కనిపించడం ఖాయం.
ఎప్పటిలానే ఈ షోకి హోస్ట్ గా నాగార్జున వ్యవహరించనున్నారు. అయితే నాన్ స్టాప్ గా ఈ షోని టెలికాస్ట్ చేయడమనేది ఇంట్రెస్టింగ్ ఫ్యాక్టర్. కానీ ఎంతమంది ఈ షోని చూస్తారో..? ఏ రేంజ్ లో హాట్ స్టార్ సబ్ స్క్రిప్షన్స్ పెరుగుతాయో చూడాలి. ప్రస్తుతానికైతే ఈ షోపై భారీ అంచనాలు నెలకొన్నాయి. మరి ఆ అంచనాలను ఎంతవరకు రీచ్ అవుతుందో చూడాలి!