పవర్ స్టార్ పవన్ కళ్యాణ్ నటిస్తోన్న లేటెస్ట్ సినిమా 'భీమ్లానాయక్'. సాగర్ చంద్ర డైరెక్ట్ చేస్తోన్న ఈ సినిమాకి త్రివిక్రమ్ స్క్రీన్ ప్లే-మాటలు అందిస్తున్నారు. నిజానికి ఈ సినిమా సంక్రాంతికి రావాల్సింది కానీ 'ఆర్ఆర్ఆర్' కోసం వాయిదా పడింది. కొత్త రిలీజ్ డేట్ ఫిబ్రవరి 25న అని అనౌన్స్ చేశారు. దీంతో ప్రమోషన్స్ జోరు పెంచారు. ఈ క్రమంలో ఈరోజు హైదరాబాద్ లో గ్రాండ్ గా ప్రీరిలీజ్ ఈవెంట్ ను నిర్వహించాలని ప్లాన్ చేశారు. రాజకీయ నాయకులు కేటీఆర్, తలసాని శ్రీనివాస్ యాదవ్ లాంటి వాళ్లను అతిథులుగా ఆహ్వానించారు.
అయితే ఇప్పుడు ఈవెంట్ ను క్యాన్సిల్ చేస్తున్నట్లుగా నిర్మాణ సంస్థ ప్రకటించింది. ఏపీ మంత్రి మేకపాటి గౌతమ్ రెడ్డి ఈరోజు అకస్మాత్తుగా మరణించారు. ఇలాంటి సమయంలో ప్రీరిలీజ్ ఈవెంట్ ని నిర్వహించడం కరెక్ట్ కాదని భావించిన సితార ఎంటర్టైన్మెంట్స్ సంస్థ 'భీమ్లానాయక్' ఈవెంట్ ను వాయిదా వేస్తున్నట్లు ప్రకటించింది. నిజానికి ప్రీరిలీజ్ ఈవెంట్ లోనే ట్రైలర్ ను రిలీజ్ చేయాలనుకున్నారు. మరిప్పుడు ట్రైలర్ ను రిలీజ్ చేస్తారో లేదో చూడాలి!
మలయాళంలో సూపర్ హిట్ గా నిలిచిన 'అయ్యప్పనుమ్ కోశియుమ్' సినిమాకి రీమేక్ గా 'భీమ్లానాయక్' సినిమాను తెరకెక్కిస్తున్నారు. సితార ఎంటర్టైన్మెంట్స్ బ్యానర్‌పై ఈ సినిమాను రూపొందిస్తున్నారు. ఈ సినిమాలో పవన్ కళ్యాణ్ పోలీస్ ఆఫీసర్ గా కనిపించనున్నారు. ఇప్పటికే సినిమాలో పవన్ కళ్యాణ్, రానా క్యారెక్టర్లు ఎలా ఉండబోతున్నాయనే విషయాలను టీజర్ ద్వారా చెప్పకనే చెప్పారు. ఇప్పటివరకు విడుదలైన పాటలు యూట్యూబ్ లో ట్రెండ్ అయ్యాయి.