ప్రముఖ యాంకర్, టీవీ హోస్ట్ సుమ ప్రధాన పాత్రలో నటిస్తున్న చిత్రం 'జయమ్మ పంచాయతీ'. ఈ సినిమాతో విజయ్ కుమార్ కలివారపు దర్శకుడిగా పరిచయం అవుతున్నారు. ఈ సినిమాను వెన్నెల క్రియేషన్స్ పతాకంపై ప్రొడక్షన్ నెంబర్ 2గా బలగ ప్రకాష్ నిర్మిస్తున్నారు. ఇప్పటికే ఈ సినిమా నుంచి కొన్ని పాటలను విడుదల చేశారు. తాజాగా సినిమా మేకింగ్ వీడియోను వదిలారు.
శ్రీకాకుళంలో ఈ సినిమా షూటింగ్ నిర్వహించారు. దానికి సంబంధించిన మేకింగ్ వీడియోను సోషల్ మీడియాలో షేర్ చేశారు. ఈ వీడియో చూస్తుంటే సుమ తన పాత్ర కోసం బాగానే కష్టపడినట్లుంది. బ్యాక్ గ్రౌండ్ లో జయమ్మ సాంగ్ వినిపిస్తోంది. వీడియో చివర్లో టీమ్ మొత్తం కలిసి 'జై జయమ్మ' అంటూ అరవడం హైలైట్ గా నిలిచింది. ఈ సినిమాలో సుమ పక్కా పల్లెటూరి మహిళగా కనిపించనుంది. ఆమె కట్టుబొట్టు కూడా అలానే ఉండబోతుంది. రాజమౌళి, నాని లాంటి సెలబ్రిటీలు ఈ సినిమాను ప్రమోట్ చేయడంతో మంచి బజ్ ఏర్పడింది.
పల్లెటూరి వాతావరణం నేపథ్యంలో తెరకెక్కించిన చిత్రమిది. చిత్రీకరణ దాదాపుగా పూర్తి కావొస్తుంది. త్వరలో సినిమా విడుదల తేదీ ప్రకటించనున్నారు. ఇదివరకు క్యారెక్టర్ ఆర్టిస్ట్ గా కొన్ని సినిమాల్లో నటించింది సుమ. ఆ తరువాత పూర్తిగా బుల్లితెరకే పరిమితమైంది. టీవీ షోలు, సినిమా ఈవెంట్స్ తో బిజీగా గడుపుతోంది. అయినప్పటికీ నటిగా రీఎంట్రీ ఇవ్వడానికి రెడీ అయింది. మరి 'జయమ్మ పంచాయతీ'తో సుమ ఎలాంటి హిట్ అందుకుంటుందో చూడాలి!