టాలీవుడ్ తో పాటు పాన్ ఇండియా లెవల్లో దుమ్మురేపిన చిత్రం 'పుష్ప’. ఎలాంటి అంచనాలు లేకుండా హిందీలో రిలీజైన ఈ సినిమా, బాలీవుడ్ బాక్సాఫీస్ దగ్గర సంచనలం సృష్టించింది. సుకుమార్ డైరెక్షన్ లో స్టైలిష్ స్టార్ అల్లు అర్జున్, రష్మిక మందన్నా జంటగా నటించిన ఈ సినిమా వసూళ్ల వర్షం కురిపించింది. ఈ చిత్రంలోని డైలాగులు, పాటలు సూపర్ డూపర్ హిట్ అయ్యాయి. తొలి భాగం దేశ వ్యాప్తంగా అద్భుత విజయాన్ని అందుకోవడంతో, ఇప్పుడు అందరి దృష్టి 'పార్ట్ 2' పైనే పడింది. ఈ సినిమాపైనా ఫ్యాన్స్ భారీ అంచనాలు పెట్టుకున్నారు. ఈ సినిమాకు సంబంధించి ఇప్పటికే విడుదలైన పోస్టర్, టీజర్ కు ఊహించని రెస్పాన్స్ వచ్చింది. సినిమాపై ఉన్న అంచనాలు అమాంతం పెరిగాయి.


నత్తన నడకన సాగుతున్న ‘పుష్ప 2’ షూటింగ్


‘పుష్ప 2’ సినిమా కోసం దేశ వ్యాప్తంగా సినీ అభిమానులు ఎంతో ఆసక్తిగా ఎదురుచూస్తున్నారు. అయితే, ఈ సినిమా షూటింగ్ మాత్రం చాలా నెమ్మదిగా కొనసాగుతోంది. ప్రేక్షకుల అంచనాలకు అనుగుణంగా ఈ చిత్రాన్ని తీర్చిదిద్దుతున్నారట దర్శకుడు సుకుమార్. సినిమాలోని ప్రతి అంశాన్ని చాలా జాగ్రత్తగా తెరకెక్కిస్తున్నారట. అందుకే సినిమా షూటింగ్ ఆలస్యం అవుతున్నట్లు తెలుస్తోంది. ఇప్పటి వరకు ఈ సినిమా షూటింగ్ కేవలం 50 శాతమే పూర్తియ్యిందట. ఏమాత్రం తొందర పడకుండా చాలా జాగ్రత్తలు తీసుకుని సినిమాను రూపొందిస్తున్నారట. మిగిలిన షూటింగ్ 2024 తొలి రెండు నెలల్లో కంప్లీట్ చేయాలని భావిస్తున్నారట.        


ఇప్పటికే ‘పుష్ప2’ సినిమాకు సంబంధించిన పలు స్టిల్స్, వీడియోలు లీక్ అయ్యాయి. సోషల్ మీడియాలో బాగా వైరల్ అయ్యాయి. ఈ నేపథ్యంలో ముమ్ముందు సినిమాకు సంబంధించిన ఏ విషయం బయటకు రాకుండా మేకర్స్ జాగ్రత్తలు తీసుకుంటున్నారట. ఇక అల్లు అర్జున్ పుట్టినరోజు సందర్భంగా 'పుష్ప 2'లో ఆయన లుక్ విడుదల చేశారు. అది నెట్టింట వైరల్ అయ్యింది. చీర కట్టి, ముక్కు పుడక పెట్టి, బొట్టుతో బన్నీ కొత్తగా కనిపించారు. తిరుపతిలో గంగమ్మ జాతరలో పురుషులు ఏ విధంగా పాల్గొంటారో, ఆ విధంగా కనిపించి ఔరా అనిపించారు. ఆ లుక్ రికార్డులు క్రియేట్ చేసింది. 


సంచలన విజయాన్ని అందుకున్న ‘పుష్ప’


ఎర్రచందనం స్మగ్లింగ్‌ నేపథ్యంలో తెరకెక్కిన ‘పుష్ప’ పలు భాషల్లోనూ బ్లాక్‌బస్టర్‌ విజయం సాధించింది. మైత్రీ సంస్థ నిర్మించిన ఈ చిత్రంలో బన్నీకు జోడీగా రష్మిక మందన్నా హీరోయిన్‌గా నటించింది. మ‌ల‌యాళ స్టార్ హీరో ఫాహ‌ద్ ఫజిల్ కీలక పాత్రలో న‌టించిన ఈ సినిమాలోని డైలాగులు, మేనరిజమ్, పాటలు ప్రపంచ వ్యాప్తంగా పాపులర్ అయ్యాయి. సినీ సెల‌బ్రెటీల నుంచి పలువురు క్రికెట‌ర్స్‌, రాజ‌కీయ నాయ‌కుల వ‌ర‌కు..   ప్ర‌తి ఒక్క‌రూ ఈ సినిమాలోని డైలాగ్స్‌, హూక్ స్టెప్స్‌ను రీల్స్‌ గా చేసి సోష‌ల్ మీడియాలో పోస్ట్ చేసి వైరల్ అయ్యారు. ‘పుష్ప 2’ సినిమా వచ్చే ఏడాది(2024) వేసవికి విడుదల చేయాలని మేకర్స్ ప్లాన్ చేస్తున్నారు.


Read Also: రౌడీ హీరో దూకుడు- ఏడాది వ్యవధిలో మూడు సినిమాలు విడుదల!


ముఖ్యమైన, మరిన్ని ఆసక్తికర కథనాల కోసం ‘టెలిగ్రామ్’లో ‘ఏబీపీ దేశం’లో జాయిన్ అవ్వండి.
Join Us on Telegram: https://t.me/abpdesamofficial