యంగ్ హీరో నిఖిల్ సిద్ధార్థ్ ప్రస్తుతం వరుస సినిమాలతో బిజీగా ఉన్నారు. ఆయన తాజా సినిమాలన్నీ పాన్ ఇండియన్ ప్రాజెక్టులుగానే రూపొందుతున్నాయి. వాటిలో ఒకటి ‘స్వయంభు‘ కాగా మరొకటి ‘ది ఇండియన్ హౌస్‘. అటు ‘కార్తికేయ 3‘ కూడా పట్టాలు ఎక్కబోతోంది. ఆయన చివరగా నటించిన ‘స్పై‘ మూవీ మాత్రం బాక్సాఫీస్ దగ్గర డిజాస్టర్ గా మిగిలింది. ‘కార్తికేయ 2‘, ‘18 పేజెస్‘ సక్సెస్ తర్వాత భారీ బడ్జెట్ తో సినిమా తెరకెక్కింది. భారీ అంచనాల నడుమ ప్రేక్షకుల ముందుకు వచ్చింది. అయితే, ఈ సినిమా అనుకున్న స్థాయిలో విజయాన్ని నమోదు చేసుకోలేకపోయింది. ఈ సినిమా పరాభవం పట్ల అప్పట్లో నిఖిల్ తన అభిమానులకు క్షమాపణలు కూడా చెప్పారు.
‘స్పై‘ డిజాస్టర్ కు కారణం ఏంటంటే?
తాజాగా ఈ సినిమా గురించి మరోసారి స్పందించారు నిఖిల్. అసలు ‘స్పై‘ సినిమా ఎందుకు డిజాస్టర్ గా మిగిలిందో చెప్పే ప్రయత్నం చేశారు. వాస్తవానికి ఈ సినిమాకు సంబంధించి ఇంకా 10 రోజుల షూటింగ్ పెండింగ్ లో ఉన్నట్లు చెప్పారు. అది పూర్తి చేయకుండానే సినిమా పోస్ట్ ప్రొడక్షన్ కంప్లీట్ చేయాలని నిర్మాత నిర్ణయం తీసుకున్నారట. అంతేకాదు, హడావిడిగా ఈ సినిమాను రిలీజ్ చేసినట్లు చెప్పారు. ఈ కారణంగానే సినిమా అసంపూర్ణంగా మిగిలిందన్నారు. ప్రేక్షకులు కూడా ఈ సినిమా అర్థంకాక అవస్థలు పడినట్లు చెప్పారు. నిర్మాత తీసుకున్న తొందరపాటు నిర్ణయమే సినిమా పరాజయానికి కారణం అయ్యిందన్నారు. అంతేకాదు, ఈ సినిమా విషయంలో జరిగిన పొరపాట్లు ఇకపై ఉండవని చెప్పారు. వచ్చే సినిమాల విషయంలో చాలా జాగ్రత్తలు తీసుకుంటానని వెల్లడించారు. ప్రేక్షకులు తన నుంచి ఎలాంటి సినిమాలను ఆశిస్తారో, అలాంటి వాటికే ఎక్కువ ప్రయారిటీ ఇస్తానని చెప్పారు.
‘స్వయంభు‘ సినిమా షూటింగ్ లో నిఖిల్ బిజీ
ప్రస్తుతం నిఖిల్ ‘స్వయంభు‘ సినిమా షూటింగ్ లో బిజీగా ఉన్నారు. ఈ సినిమాలో నిఖిల్ రాజు పాత్రలో కనిపించబోతున్నట్లు తెలుస్తోంది. ఈ సినిమా కోసం తను చాలా కష్టపడుతున్నారట. పీరియాడికల్ మూవీగా రూపొందుతున్న ఈ చిత్రంలో యుద్ధ సన్నివేశాల కోసం మూడు నెలల పాటు స్పెషల్ గా ట్రైనింగ్ తీసుకున్నారట. అతడి కెరీర్ లో తొలిసారి పూర్తి స్థాయి పీరియాడికల్ మూవీలో యువరాజుగా కనిపించనున్నట్లు తెలుస్తోంది. అటు ‘ది ఇండియన్ హౌస్‘ అనే సినిమాలోనూ నటిస్తున్నారు నిఖిల్. ప్రస్తుతం ఆయన నటిస్తున్న సినిమాలన్నీ పాన్ ఇండియా మూవీలుగా రూపొందుతున్నాయి. ఈ సినిమాలతో మళ్లీ నిఖిల్ హిట్ బాట పట్టాలని ప్రయత్నిస్తున్నారు. మొత్తంగా ఆయన చెప్పినట్లు వచ్చే సినిమాలన్నీ ఆయన రేంజికి తగినట్లు ఉంటాయో? లేదో? తెలియాలంటే మరికొద్ది రోజులు వేచి చూడాల్సిందే.
Read Also: శ్రద్ధా, పూజా హెగ్డే మాత్రమే కాదు... సోనాల్ చౌహన్ కూడా - కొత్త కారు కొన్న హీరోయిన్!
ముఖ్యమైన, మరిన్ని ఆసక్తికర కథనాల కోసం ‘టెలిగ్రామ్’లో ‘ఏబీపీ దేశం’లో జాయిన్ అవ్వండి.
Join Us on Telegram: https://t.me/abpdesamofficial