ఆమీర్ ఖాన్ హీరోగా, యువ సామ్రాట్ నాగచైతన్య ప్రధాన పాత్రలో నటిస్తున్న సినిమా 'లాల్ సింగ్ చద్దా'. నిజానికి ఈ సినిమా గతేడాదిలోనే రిలీజ్ కావాల్సింది కానీ అనివార్య కారణాల వలన ఆలస్యమవుతూ వచ్చింది. ఈ ఏప్రిల్ లో కచ్చితంగా రిలీజ్ చేస్తామని చెప్పారు కానీ అప్పుడు కూడా రాలేదు. ఫైనల్ గా ఆగస్టు 11న సినిమా ప్రేక్షకుల ముందుకు రానుంది. దీంతో ప్రమోషన్స్ షురూ చేశారు. సినిమాలో పాటలను ఒక్కొక్కటిగా రిలీజ్ చేస్తున్నారు.
తాజాగా ఈ సినిమా స్పెషల్ ప్రీమియర్ ను హైదరాబాద్ లో వేశారు. ఆమిర్ ఖాన్ ఈ ప్రీమియర్ ను టాలీవుడ్ సెలబ్రిటీల కోసం ఎరేంజ్ చేశారు. ఈ స్పెషల్ స్క్రీనింగ్ కి చిరంజీవి, నాగార్జున, రాజమౌళి, సుకుమార్ లాంటి టాలీవుడ్ సెలబ్రిటీలు హాజరయ్యారు. వీరితో కలిసి ఆమిర్ ఖాన్ కూడా సినిమా చూశారు. దీనికి సంబంధించిన ఫొటోలు సోషల్ మీడియాలో చక్కర్లు కొడుతున్నాయి.
ఇక ఈ సినిమా టామ్ హాంక్స్ నటించిన 1994 హాలీవుడ్ బ్లాక్ బస్టర్ 'ఫారెస్ట్ గంప్‌'కి రీమేక్. ఇంతకుముందు అమీర్‌తో కలిసి 'సీక్రెట్ సూపర్‌స్టార్‌' (2017) తీసిన అద్వైత్‌ చందన్‌ ఈ హిందీ వెర్షన్‌ ను డైరెక్ట్ చేస్తున్నారు. ఈ సినిమా అమీర్‌ ఖాన్ ప్రొడక్షన్స్‌లో బ్యానర్‌లో రానుంది. ఇందులో కరీనా కపూర్ హీరోయిన్ గా కనిపించనుంది. 'లాల్ సింగ్ చద్దా' సినిమాకు ఎరిక్‌ రోత్‌, రచయిత అతుల్‌ కులకర్ణి స్క్రీన్‌ప్లే అందించారు.