Telangana Budget 2023: బడ్జెట్‌లో విద్యారంగానికి ప్రాధాన్యం, రూ.19,093 కోట్లు కేటాయింపు!

ఈ సారి బడ్జెట్‌లో విద్యారంగానికి అధిక ప్రాధ్యాన్యమిచ్చారు. బడ్జెట్‌లో విద్యారంగానికి రూ.19,093 కోట్లు కేటాయించారు.రాష్ట్రంలో గురుకుల విద్యకు పెద్దపీట వేశారని ఆర్థిక మంత్రి వెల్లడించారు.

తెలంగాణ బడ్జెట్‌ 2023 - 24ను అసెంబ్లీలో ఆర్థిక మంత్రి హరీశ్ రావు ప్రవేశపెట్టారు. మొత్తం రూ.2,90,396 కోట్లతో భారీ బడ్జెట్‌ను రూపొందించారు. ఇందులో రెవెన్యూ వ్యయం రూ.2,11,685 కోట్లు కాగా, మూలధన వ్యయం రూ.37,525 కోట్లు. ఈ సారి బడ్జెట్‌లో విద్యారంగానికి అధిక ప్రాధ్యాన్యమిచ్చారు. బడ్జెట్‌లో విద్యారంగానికి రూ.19,093 కోట్లు కేటాయించారు. ముఖ్యంగా పేద పిల్లలు చదువులో ముందుండాలంటే గురుకుల విద్య ద్వారానే సాధ్యమని విశ్వసించిన సీఎం కేసీఆర్‌.. రాష్ట్రంలో గురుకుల విద్యకు పెద్దపీట వేశారని ఆర్థిక మంత్రి హరీశ్‌వారు బడ్జెట్ ప్రసంగంలో వెల్లడించారు. 

కేటాయింపులు ఇలా..

➥ రాష్ట్రం ఏర్పడినప్పుడు 293గా ఉన్న గురుకులాలను ఇప్పుడు 1,002కు పెంచామన్నారు. ఆనాడు వసతుల లేమితో 1.31 లక్షల మంది విద్యార్థులు గురుకులాల్లో చదివేవారు. ఇప్పుడు సకల వసతులతో 5.59 లక్షల మంది విద్యార్థులు గురుకుల విద్యను అభ్యసిస్తున్నట్లు మంత్రి తెలిపారు. రాష్ట్రం ఏర్పడిన కొత్తలో గురుకులాలకు బడ్జెట్‌ కేటాయింపులు రూ.784 కోట్లు ఉండగా.. 2022-23 బడ్జెట్‌ నాటికి అది 3,400 కోట్లకు పెరిగిందని ఆర్థిక మంత్రి వెల్లడించారు.
 
➥ రాష్ట్రంలోని ప్రభుత్వ పాఠశాలల్లో మౌలిక వసతుల మెరుగు కోసం ప్రభుత్వం మన ఊరు మన బడి అనే బృహత్తర కార్యక్రమాన్ని ప్రభుత్వం చేపట్టిందని మంత్రి తెలిపారు. రాష్ట్రంలో మొత్తం 26,065 పాఠశాలల్లో దశల వారీగా మూడు దశల్లో మౌలిక సదుపాయాలను మెరుగుపర్చనున్నారు. ఇందుకోసం బడ్జెట్‌లో రూ.7,289 కోట్ల నిధులను కేటాయించారు. మొదటి దశలో భాగంగా రూ.3,497 కోట్ల నిధులతో 9,123 పాఠశాలల్లో మౌలిక వసతులను కల్పిస్తున్నారు. 

➥ యూనివర్సిటీల్లో మౌలిక వసతుల కల్పన, హాస్టల్‌ భవనాల ఆధునీకరణ, కొత్త భవనాల నిర్మాణం కోసం ఈ బడ్జెట్‌లో రూ.500 కోట్లను కేటాయించారు. అదేవిధంగా విద్యార్థులకు ఆంగ్ల మాధ్యమంలో బోధించడం కోసం రాష్ట్రంలో ఉపాధ్యాయులందరికీ శిక్షణ ఇచ్చారు. ఇంటర్‌ పూర్తిచేసిన విద్యార్థులకు ఎంసెట్‌, నీట్‌, జేఈఈ తదితర ప్రవేశపరీక్షల కోసం ప్రభుత్వం శిక్షణ ఇస్తున్నది. రాష్ట్రంలో సాంకేతిక విద్యకు కూడా ప్రభుత్వం పెద్దపీట వేసింది. గత ఎనిమిదిన్నర ఏండ్లలో కొత్తగా 14 పాలిటెక్నిక్‌ కళాశాలలను ఏర్పాటు చేసింది. ఈ విద్యాసంవత్సరం మహేశ్వరం, మణుగూరులో పాలిటెక్నిక్‌ కళాశాలలు ప్రారంభం కానున్నాయి. జేఎన్టీయూ పరిధిలో ప్రభుత్వం 4 కొత్త ఇంజినీరింగ్‌ కాలేజీలను ఏర్పాటు చేస్తున్నది.

➥ మహిళా యూనివర్సిటీకి 100 కోట్లు, ఉన్నతవిద్యకు 3001 కోట్లు, ఫారెస్ట్ కాలేజీ కోసం 100 కోట్లు కేటాయించారు.

➥ రాష్ట్రవ్యాప్తంగా విద్యార్థుల కోసం ప్రభుత్వం సన్నబియ్యంతో భోజనం పెడుతున్నది. రాష్ట్రంలోని 28,606 పాఠశాలలకు చెందిన 25.26 లక్షల మంది విద్యార్థులతోపాటు, 4,237 హాస్టళ్లు, ఇతర విద్యాసంస్థలకు చెందిన 9.77 లక్షల మంది విద్యార్థులకు ఈ సన్నబియ్యం భోజనం అందిస్తున్నారు. దీని కోసం ప్రతి నెల 21,868 మెట్రిక్‌ టన్నుల సన్నబియ్యాన్ని, పోర్టిఫైడ్ రైస్‌ను సరఫరా చేస్తున్నారు. ఇక పాఠశాలల్లో మధ్యాహ్నం భోజనం పథకం కింద వంటలు చేసేవారి పారితోషికాన్ని ప్రభుత్వం రూ.1000 నుంచి రూ.3000లకు పెంచుతున్నట్లు ప్రకటించింది. కాగా, రాష్ట్రంలో విద్యా వికాసం కోసం వివిధ శాఖల ద్వారా కూడా ప్రభుత్వం పెద్ద ఎత్తున నిధులను ఖర్చు చేస్తున్నది.