RBI Nationwide Quiz for Graduate Students: రిజర్వు బ్యాంక్ ఆఫ్ ఇండియా (RBI) విద్యార్థులకు బంపరాఫర్ ప్రకటించింది. ఆర్బీఐ ఏర్పడి 90 సంవత్సరాలు పూర్తవడంతో విద్యార్థులకు క్విజ్ పోటీలు నిర్వహించనుంది. దేశవ్యాప్తంగా డిగ్రీ స్థాయిలో విద్యార్థుల మేధాశక్తిని పరీక్షించేందుకు 'ఆర్బీఐ-90' పేరుతో ఈ క్విజ్ పోటీలను జాతీయ స్థాయిలో నిర్వహించనుంది. ఇప్పటికే ఇందుకు సంబంధించి రిజిస్ట్రేషన్ ప్రక్రియ ప్రారంభంకాగా.. సెప్టెంబరు 17 వరకు దరఖాస్తు చేసుకునేందుకు అవకాశముంది. దరఖాస్తు చేసుకున్న విద్యార్థులకు సెప్టెంబరు 19 నుంచి 21 వరకు ఆన్‌లైన్‌లో ఉదయం 9 గంటల నుంచి రాత్రి 9 గంటల వరకు క్విజ్ పోటీలు నిర్వహించనున్నారు. 2024 సెప్టెంబరు 1 నాటికి 25 ఏళ్లలోపు వయసు ఉండి ఏదైనా కళాశాలలో డిగ్రీ చదువుతున్న వారు ఈ పోటీలో పాల్గొనవచ్చు.
10 లక్షలు గెలుచుకునే అవకాశం..
దీనిద్వార ప్రభుత్వ, ప్రైవేటు డిగ్రీ కళాశాలల విద్యార్థులు రూ.10 లక్షలు గెలుచుకునే సువర్ణావకాశాన్ని ఆర్బీఐ కల్పించింది. విద్యార్థుల్లో రిజర్వు బ్యాంకు ఆర్థిక వ్యవస్థ గురించి అవగాహనతోపాటు డిజిటల్ లావాదేవీలు, సురక్షిత బాధ్యతాయుత వినియోగం తదితరాలను ప్రోత్సహించే లక్ష్యంతో ఆర్బీఐ ఈ పోటీలను నిర్వహిస్తోంది.
నాలుగు దశల్లో పోటీలు..
ప్రతి కళాశాల నుంచి ఎంతమంది విద్యార్థులైనా దరఖాస్తు చేసుకోవచ్చు. ఒక్కో టీమ్‌లో కనీసం ఇద్దరు విద్యార్థులు ఉండాలి. మొత్తం నాలుగు దశల్లో క్విజ్ పోటీలు జరగనున్నాయి. తొలుత జిల్లా స్థాయి, ఆన్‌లైన్ దశ ప్రారంభమై రాష్ట్ర, జోనల్, జాతీయ స్థాయి పోటీలు నిర్వహించనున్నారు. విజేతలకు రూ.లక్ష నుంచి రూ.10 లక్షలు గెలుచుకునే అవకాశం ఉంటుంది. ఆంగ్లం, హిందీ భాషల్లో పోటీలు ఉంటాయి. ప్రధానంగా దేశ, అంతర్జాతీయ ఆర్థిక వ్యవహారాలు, ఆర్బీఐ డిజిటల్ కరెన్సీ, ఆర్థిక వ్యవస్థ, క్రీడలు, చరిత్ర, సాహిత్యం, శాస్త్ర సాంకేతిక రంగాలు, సమకాలీన అంశాలు, తదితరాలపై ప్రశ్నలుంటాయి.
బహుమతులు ఇలా..
➥ రాష్ట్రస్థాయిలో ప్రథమ బహుమతి 2 లక్షలు, ద్వితీయ బహుమతి 1.5 లక్షలు, తృతీయ బహుమతి కింద రూ.1 లక్ష ఇస్తారు.
➥ జోనల్ స్థాయిలో ప్రథమ బహుమతి 5 లక్షలు, ద్వితీయ బహుమతి 4 లక్షలు, తృతీయ బహుమతి కింద రూ.3 లక్షలు ఇస్తారు.
➥ జాతీయ స్థాయిలో ప్రథమ బహుమతి 10 లక్షలు, ద్వితీయ బహుమతి 8 లక్షలు, తృతీయ బహుమతి కింద రూ.6 లక్షలు ఇస్తారు.
దరఖాస్తులు ఇలా..
➥ దరఖాస్తు కోసం విద్యార్థులు మొదట అధికారిక వెబ్‌సైట్‌లోకి వెళ్లాలి. www.rbi90quiz.in
➥ వెబ్‌సైట్‌లో స్టూడెంట్ రిజిస్ట్రేషన్ ఆప్షన్ ఎంపిక చేసుకోవాలి.
➥ రిజిస్ట్రేషన్ పేజీలో విద్యార్థులు తమ వివరాలు సమర్పించాలి. రాష్ట్రం, జిల్లా, కళాశాల వివరాలు నమోదుచేయాలి.
➥ పోటీల్లో పాల్గొనే విద్యార్థులు ఒకరైతే ఒకరు, ఇద్దరైతే ఇద్దరు పేర్లు నమోదు చేయాలి.
➥ దరఖాస్తు సమయంలో స్టూడెంట్ ఐడీ, ఈమెయిల్, ఫోన్ నంబర్, జెండర్, పుట్టినతేదీ తదితర వివరాలు నమోదుచేయాలి.
➥ వివరాల నమోదుప్రక్రియ పూర్తయిన తర్వాత ఒకసారి సరిచూసుకొని Submit బటన్ మీద క్లిక్ చేయాలి.
➥ దరఖాస్తు కోసం విద్యార్థులు ఎలాంటి ఫీజు చెల్లించాల్సిన అవసరం లేదు.