AP Schools Summer Holidays : ఏపీ పాఠశాలలకు వేసవి సెలవులు ప్రకటించారు. మే 6వ తేదీ నుంచి రాష్ట్రంలోని అన్ని పాఠశాలలకు ప్రభుత్వం సమ్మర్ హాలిడేస్ ప్రకటించింది. మే 4వ తేదీ నాటికి అన్ని తరగతుల పరీక్షలు పూర్తి చేయాలని విద్యాశాఖ ఆదేశించింది. జులై 4వ తేదీన పాఠశాలలను తిరిగి పునఃప్రారంభిస్తామని ప్రభుత్వం తెలిపింది. 


విద్యాశాఖ కీలక ఆదేశాలు 


ఆంధ్రప్రదేశ్ లో ఎండల తీవ్రత అధికంగా ఉంది. ఎండలతో సాధారణ ప్రజలతో పాటు పాఠశాలలకు వెళ్లే పిల్లలు కూడా ఇబ్బంది పడుతున్నారు. ప్రస్తుతం ఒంటిపూట బడులు కొనసాగుతున్నా మధ్యాహ్నం ఇంటికి చేరుకునే సరికి పిల్లలు ఉక్కపోతతో ఇబ్బంది పడుతున్నారు. ఈ నేపథ్యంలో రాష్ట్ర ప్రభుత్వం వేసవి సెలవులపై కీలక ప్రకటన చేసింది. మే 6వ తేదీ నుంచి రాష్ట్రంలో అన్ని పాఠశాలలకు సమ్మర్ హాలిడేస్ ప్రకటిస్తూ విద్యాశాఖ నిర్ణయం తీసుకుంది. వచ్చే నెల 4వ తేదీ లోపు 1 - 10వ తరగతులకు పరీక్షల నిర్వహణ పూర్తి చేయాలని విద్యాశాఖ కమిషనర్‌ సురేష్ కుమార్ ఆదేశాలు జారీ చేశారు. వేసవి సెలవుల అనంతరం జూన్‌ 4వ తేదీన పాఠశాలలను తిరిగి ప్రారంభించనున్నట్లు పేర్కొన్నారు. 


కరోనా కారణంగా విద్యాసంవత్సరంలో మార్పు 


కరోనా కారణంగా గత రెండేళ్లుగా విద్యాసంవత్సరం అంతంత మాత్రంగా నడిచింది. కరోనా తర్వాత విద్యాసంవత్సరంలో పలు మార్పులు చోటు చేసుకున్నాయి.  సిలబస్ తగ్గింపు, సెలవుల కుదింపుతో పాటు విద్యా సంవత్సరాన్ని ముందుకు జరిపింది. రెండేళ్లు అయితే పదోతరగతి పరీక్షలు రద్దు చేసింది. అయితే ఈ నెల 24 నుంచి వేసవి సెలవులు ప్రకటించాల్సి ఉండగా మే 6 వరకూ పొడిగించినట్లు తెలుస్తోంది. దీంతో ఆ మేరకు ఏర్పాట్లు చేయాలని అధికారుల నుంచి పాఠశాలలకు ఆదేశాలు వెళ్లాయి.


పదో తరగతి విద్యార్థులకు ఉచిత ప్రయాణం


పదో తరగతి విద్యార్థుల పరీక్షలకు హాల్ టికెట్ పై ఉచితంగా ప్రయాణించేందుకు ప్రభుత్వం ఉత్తర్వులు ఇచ్చింది. పదో తరగతి పరీక్షల సమయంలో విద్యాకేంద్రం నుంచి పరీక్ష కేంద్రానికి, తిరుగు ప్రయాణం ఆర్టీసీ బస్ లలో ఉచితంగా వెళ్లవచ్చని పేర్కొంది. ఇందుకు విద్యార్థులు హాల్ టికెట్ చూపించాల్సి ఉంటుంది. పదో పరీక్షలపై జిల్లా కలెక్టర్లతో విద్యాశాఖ మంత్రి బొత్స సత్యనారాయణ వీడియో కాన్ఫరెన్స్ నిర్వహించారు.  బస్సు పాస్ లేని విద్యార్థులు హాల్ టికెట్ చూపించి ఈ సదుపాయం కల్పించనున్నారు. 


పదో పరీక్షల తేదీలు ఇవే



  • ఏప్రిల్‌ 27వ తేదీ - తెలుగు

  • ఏప్రిల్‌ 28వ తేదీ - సెకండ్‌ లాంగ్వేజ్‌

  • ఏప్రిల్‌ 29వ తేదీ - ఇంగ్లిష్‌

  • మే 2వ తేదీ -  గణితం

  • మే 4వ తేదీ  -  సైన్స్‌ పేపర్‌-1

  • మే 5వ తేదీ  -  సైన్స్‌ పేపర్‌-2

  • మే 6వ తేదీ  -  సోషల్