కుక్కపై ఇనుప రాడ్డుతో విచణక్షారహితంగా దాడి
ఇరుగు పొరుగు వాళ్లు గొడవ పడటం చాలా సహజం. కానీ ఒక్కోసారి ఆ గొడవలకు కారణాలేంటని చూస్తే చాలా సిల్లీగా అనిపిస్తాయి. కొన్నిసార్లు ఇవే తీవ్రమై ప్రాణాలు పోయేంత వరకూ వెళ్తాయి. దిల్లీలోని జరిగిన ఘటనే ఇందుకు ఉదాహరణ. పక్కింటి కుక్క పదేపదే మొరుగుతోందన్న ఒకే ఒక కారణంతో ఇనుప రాడ్డుతో దానిపై దాడి చేశాడు ఓ వ్యక్తి. వద్దని యజమాని వారించినందుకు, ఆయననూ ఆ రాడ్డుతోనే విచక్షణారహితంగా కొట్టాడు. దిల్లీలోని పశ్చిమ్‌ విహార్‌లో జరిగిన ఈ ఘటన స్థానికంగా సంచలనమైంది. కేవలం తనను చూసి కుక్క మొరిగిందన్న కోపంతో ఇలా దాడి చేశాడు దుండగుడు. ఈ ఘటనలో కుక్క తీవ్రంగా గాయపడగా, యజమానికి కూడా గాయాలయ్యాయి. ముందు కుక్కపై రాడ్డుతో గట్టిగా కొట్టాడు. వద్దని అడ్డుగా వెళ్లినందుకు పెద్దాయననీ గాయపరిచాడు. మరో ఇద్దరికీ ఈ ఘటనలో గాయాలయ్యాయి.
ఈ దాడికి సంబంధించిన విజువల్స్ సీసీ కెమెరాలో రికార్డ్‌ అయ్యాయి. ఈ వీడియోని ఆధారంగా చేసుకుని పోలీసులు కేసు నమోదు చేశారు. ఐపీసీతో పాటు ప్రివెన్షన్ ఆఫ్ క్రుయాల్టీ టు యానిమల్స్ యాక్ట్‌ కింద కఠిన చర్యలు తీసుకుంటామని వెల్లడించారు. ఈ ఘటనపై విచారణ చేపట్టనున్నారు. గాయపడ్డ వ్యక్తి ప్రస్తుతానికి చికిత్స పొందుతున్నాడు.