Suryapet Crime : క్రూల్ డ్రింక్ లో మత్తు మందు కలిపి, మూడ్రోజులుగా యువతిపై అత్యాచారం

Suryapet Crime : సూర్యాపేట జిల్లాలో దారుణం చోటుచేసుకుంది. ఓ యువతిని మూడ్రోజుల పాటు బంధించి మత్తు మందు ఇచ్చి అత్యాచారం చేశారో కొందరు యువకులు. నిందితుల్లో టీఆర్ఎస్ కౌన్సిలర్ కుమారుడు కూడా ఉన్నట్లు సమాచారం.

Suryapet Crime : సూర్యాపేట జిల్లా కోదాడలో దారుణ ఘటన జరిగింది. కూల్ డ్రింక్ మత్తు మందు కలిసి ఓ యువతిపై యువకులు అత్యాచారం చేశారు. మూడు రోజుల పాటు యువతిని బంధించి ఈ దారుణానికి పాల్పడ్డారు. యువకుల నుంచి తప్పించుకున్న యువతి బంధువులకు సమాచారం ఇవ్వడంతో ఈ ఘటన వెలుగులోకి వచ్చింది. మృగాళ్ల దాడిలో తీవ్రంగా గాయపడిన యువతికి ఆస్పత్రిలో వైద్యులు చికిత్స అందిస్తున్నారు. బాధితురాలి ఫిర్యాదుతో పోలీసులు కేసు నమోదు చేశారు. ఈ కేసులో ఇద్దరు నిందితులను అదుపులోకి తీసుకుని విచారిస్తున్నారు. నిందితుల్లో ఒకరు టీఆర్ఎస్ కౌన్సిలర్ కుమారుడిగా తెలుస్తోంది. 

టీఆర్ఎస్ కౌన్సిలర్ కొడుకు 

ఓ యువతిపై ఇద్దరు కామాంధులు మూడు రోజులపాటు సామూహిక అత్యాచారానికి పాల్పడారు. దేశంలో మహిళలపై, ఆడపిల్లలపై జరుగుతున్న ఆకృత్యాలను అరికట్టేందుకు నిర్భయ లాంటి ఎన్ని కఠినమైన చట్టాలు తెచ్చినా మహిళలపై మృగాళ్ల దాడులు కొనసాగుతూనే ఉన్నాయి.  ఇద్దరు మృగాల క్రూరత్వానికి ఓ యువతి మూడు రోజుల పాటు విలవిల్లాడిన సంఘటన సూర్యాపేట జిల్లా కోదాడ పట్టణంలో ఆలస్యంగా వెలుగుచూసింది. ఇద్దరు యువకులు ఓ యువతిపై దారుణానికి ఒడిగట్టారు. పోలీసులు, కుటుంబ సభ్యుల వివరాల ప్రకారం కోదాడ పట్టణానికి చెందిన అధికార టీఆర్ఎస్ పార్టీ కౌన్సిలర్ ఖాజా కొడుకు గౌస్ , సాయిరాం రెడ్డి అనే ఇద్దరు యువకులు ఓ యువతి రోడ్డుపై వెళుతుంటే బలవంతంగా ఆటోలో లాక్కెళ్లి కూల్ డ్రింక్ లో మత్తు మందు కలిపి మూడు రోజులుగా ఆమెపై సామూహిక అత్యాచారానికి పాల్పడ్డారు. ఆ మృగాల పైచాచికత్వం నుంచి తప్పించుకున్న యువతి జరిగిన దారుణాన్ని బంధువులకు తెలపడంతో వారు కోదాడ పట్టణ పోలీసులను ఆశ్రయించారు. 

విచారణ సాఫీగా సాగేనా

బాధితురాలి తల్లి ఫిర్యాదుతో కేసు నమోదు చేసుకున్న పోలీసులు యువతిని చికిత్స నిమిత్తం ఆసుపత్రికి తరలించారు. తీవ్రగాయాలతో ఆసుపత్రిలో చేరిన యువతికి వైద్యులు ప్రస్తుతం చికిత్స అందిస్తున్నారు. ఇద్దరు నిందితులను అదుపులోకి తీసుకుని విచారిస్తున్నట్లు పట్టణ సీఐ తెలిపారు. నిందితుల్లో ఒకరు అధికార పార్టీకి చెందిన కౌన్సిలర్ కుమారుడు కావడంతో పోలీసుల విచారణ సాఫీగా సాగేనా అనే అనుమానాలు వ్యక్తమవుతున్నాయి.ఈ ఘటనపై మహిళా సంఘాలు భగ్గుమన్నాయి. నిష్పక్షపాతంగా విచారణ జరిపి, నిందితులను కఠినంగా శిక్షించాలని మహిళా సంఘాల నేతలు డిమాండ్ చేశారు. ఈ ఘటనతో కోదాడ పట్టణ ప్రజలు ఒక్కసారిగా ఉలిక్కిపడ్డారు.