CEO's Son Murder News:
నాలుగేళ్ల చిన్నారి హత్య..
గోవాలో ఓ స్టార్టప్ కంపెనీ సీఈవో సొంత కొడుకునే హత్య చేసిన ఘటన దేశవ్యాప్తంగా సంచలనమైంది. తల్లిని అదుపులోకి తీసుకున్న పోలీసులు విచారణ కొనసాగిస్తున్నారు. ఈ విచారణలోనే ఎన్నో కీలక విషయాలు వెలుగులోకి వస్తున్నాయి. ఇది ప్రీప్లాన్డ్ మర్డర్‌గా ప్రాథమికంగా భావిస్తున్నారు పోలీసులు. రూమ్‌లో కాఫ్ సిరప్ బాటిల్స్ కనిపించినట్టు తెలుస్తోంది. కావాలనే ఆ చిన్నారికి ఎక్కువ డోస్ ఉన్న కాఫ్ సిరప్ తాగించి ఆ తరవాత చంపేసినట్టు అంచనా వేస్తున్నారు. పోస్ట్‌మార్టమ్ రిపోర్ట్‌లోనూ మరి కొన్ని విషయాలు బయటపడ్డాయి. దిండుతో గట్టిగా అదిమి పెట్టి ఊపిరి ఆడకుండా చేసి చంపేసినట్టు వైద్యులు వెల్లడించారు. నిందితురాలు సుచనా సేథ్ (Suchana Seth) కొడుకుని హత్య చేసిన తరవాత ఓ బ్యాగ్‌లో ఆ డెడ్‌బాడీని కుక్కింది. అక్కడి నుంచి నేరుగా ట్యాక్సీ బుక్ చేసుకుని కర్ణాటకకు వెళ్లినట్టు పోలీసులు వివరించారు. కర్ణాటకలోనే చిత్రదుర్గ వద్ద ఆమెని అదుపులోకి తీసుకున్నారు. అక్కడి నుంచి విచారణకు గోవాకి తరలించారు. ఘటనా స్థలాన్ని పరిశీలించారు. ఆ సమయంలోనే ఓ గదిలో చిన్న పిల్లల దగ్గు మందు బాటిల్స్ కనిపించాయి. నొప్పి తెలియకుండా కాఫ్ సిరప్ పోసి ఆ తరవాత దిండుతో చంపేసింది. అయితే...ఎంత డోస్ ఇచ్చిందనేది ఇంకా తెలియలేదని, దీనిపై పూర్తి వివరాలు త్వరలోనే వెల్లడిస్తామని పోలీసులు చెప్పారు. అపార్ట్‌మెంట్‌ స్టాఫ్‌నీ విచారించారు పోలీసులు. తనకు దగ్గు వస్తోందని, కాఫ్ సిరప్ తెచ్చి పెట్టాలని ఆ స్టాఫ్‌కి డబ్బులిచ్చింది నిందితురాలు. అయితే...విచారణలో మాత్రం నిందితురాలు తన నేరాన్ని అంగీకరించలేదు. తాను నిద్రలేచి చూసే సరికే బిడ్డ చనిపోయి ఉందని, తాను హత్య చేయలేదని వాదించింది.
విడాకుల కేసు..
భర్తతో గొడవ పడి విడిపోయిందని, ఆ కోపంలోనే చిన్నారిని హత్య చేసి ఉండొచ్చని పోలీసులు ప్రాథమికంగా అంచనా వేస్తున్నారు. వీళ్లిద్దరూ విడాకులు తీసుకోవాలని అనుకున్నారు. ఈ ప్రాసెస్‌లోనే కోర్టు ఇచ్చిన తీర్పు సుచనా సేథ్‌కి నచ్చలేదు. ఆ అసహనంలోనే కన్న బిడ్డనే చంపుకుంది. జనవరి 6వ తేదీన సర్వీస్‌ అపార్ట్‌మెంట్‌లోకి వెళ్లిన సుచనా సేథ్..జనవరి 8వ తేదీ వరకూ అక్కడే ఉంది. ఆ తరవాత అక్కడి నుంచి ట్యాక్సీలో బెంగళూరు వెళ్లిపోయింది. జకార్తాలో ఉన్న ఆమె భర్త ఈ వార్త తెలియగానే బెంగళూరుకి వచ్చాడు.
"ఆ చిన్నారికి ఊపిరి ఆడకుండా చేసి చంపేసింది. బహుశా దిండుతో అదిమి పెట్టి చంపి ఉండొచ్చు. చేతులతో అయితే గొంతు నులిమి చంపినట్టు ఎలాంటి ఆధారాలు కనిపించడం లేదు. పోస్ట్‌మార్టం రిపోర్ట్‌లో ఇదే తేలింది"
- పోలీసులు