Delhi Crime:
ఢిల్లీలో టీచర్ దారుణ హత్య..
ఢిల్లీలో దారుణం జరిగింది. లైంగికంగా వేధిస్తున్న టీచర్‌ని హత్య చేశాడు 14 ఏళ్ల విద్యార్థి. పదేపదే తనను లైంగికంగా వేధించడమే కాకుండా...అసభ్యంగా వీడియోలు తీసేవాడని చెప్పాడు ఆ బాలుడు. అప్పటికే సహనం కోల్పోయిన విద్యార్థి టీచర్‌ని పొడిచి చంపాడు. ఈ హత్య జరిగిన మూడు రోజుల తరవాత బాలుడిని అరెస్ట్ చేశారు పోలీసులు. ఆగస్టు 30న మధ్యాహ్నం ఈ హత్య చేసినట్టు పోలీసుల విచారణలో తేలింది. స్థానికులు గదిలో నుంచి రక్తం వస్తుండడాన్ని గమనించి పోలీసులకు సమాచారం అందించారు. వెంటనే ఘటనా స్థలానికి చేరుకుని విచారించగా...నిందితుడు 14 ఏళ్ల విద్యార్థి అని వెల్లడైంది.
"ఆగస్టు 30వ తేదీన మధ్యాహ్నం 2.15 నిముషాలకు మాకు ఫోన్ కాల్ వచ్చింది. జమియా నగర్‌లోని ఓ అపార్ట్‌మెంట్‌లో సెకండ్ ఫ్లోర్ నుంచి రక్తం వస్తుండడాన్ని స్థానికులు గమనించారు. అదే విషయం మాకు చెప్పారు. ఆ గది తలుపులు తెరిచే ఉన్నాయి. మేం వెళ్లేటప్పటికే టీచర్ మృతదేహం నేలపై పడి ఉంది. మెడపై లోతైన గాయాలు కనిపించాయి"
- పోలీసులు
వీడియో తీసి బెదిరింపులు..
మర్డర్ కేసు పెట్టిన పోలీసులు స్పెషల్ టీమ్‌తో ఇన్వెస్టిగేషన్ మొదలు పెట్టారు. టీచర్ హోమోసెక్సువల్ అని గుర్తించారు. రెండు నెలల క్రితం నిందితుడితో పరిచమయైంది. పదేపదే ఇంటికి పిలిపించుకుని అసభ్యంగా ప్రవర్తించేవాడు. ఓ సారి వీడియో తీసి అప్పటి నుంచి బెదిరించడం మొదలు పెట్టాడు. పోలీసులకు ఫిర్యాదు చేయొద్దని వార్నింగ్ ఇచ్చాడు. లేదంటే సోషల్ మీడియాలో వీడియో అప్‌లోడ్ చేస్తా అని బెదిరించాడు. ఓ రోజు ట్యూటర్‌ కాల్ చేసి పిలిచాడు. ఈసారి ఎలాగైనా చంపేయాలని ఇంటి నుంచే పేపర్‌ కట్టర్‌ని తీసుకెళ్లాడు. ఇంట్లోకి వెళ్లగానే గొంతుపై పొడిచి చంపాడు. వెంటనే అక్కడి నుంచి పారిపోయాడు. రెండు నెలల క్రితమే ఈ గది ఖాళీ అయింది. అప్పటి నుంచి బాలుడిని పిలిచి అసభ్యంగా ప్రవర్తించేవాడు. ఆ కోపంతోనే హత్య చేశాడు.