Bollywood Actor arrested at Chennai airport with drugs worth Rs 40 crore: బాలీవుడ్‌  నటుడు విశాల్ బ్రహ్మ (32)ను చెన్నై అంతర్జాతీయ విమానాశ్రయంలో డైరెక్టరేట్ ఆఫ్ రెవెన్యూ ఇంటెలిజెన్స్ (DRI) అధికారులు అరెస్ట్ చేశారు. అతని  వద్ద  రూ. 40 కోట్ల విలువైన మెథాక్వాలోన్  అనే   డ్రగ్స్‌ను స్వాధీనం చేసుకున్నారు.  అస్సాంకు చెందిన ఈ నటుడు 2019లో వచ్చిన 'స్టూడెంట్ ఆఫ్ ది ఇయర్ 2' సినిమాలో చిన్న పాత్ర పోషించాడు. సింగపూర్ నుంచి చెన్నైకి వచ్చిన విమానంలో డ్రగ్స్‌ను స్మగ్లింగ్ చేస్తూ దొరికాడు.  దీని వెనుక నైజీరియన్ డ్రగ్ గ్యాంగ్ ఉందని అనుమానిస్తున్నారు.  

Continues below advertisement


సోమవారం రాత్రి సింగపూర్ నుంచి చెన్నైకి AI 347 ఫ్లైట్‌లో విశాల్ బ్రహ్మ చేరాడు. ఎయిర్‌పోర్ట్ స్కానర్‌లో అతని ట్రాలీ బ్యాగ్‌లో  అనుమానాస్పదంగా కనిపించడంతో DRI అధికారులు అతన్ని ఆపి సోదాలు చేశారు. బ్యాగ్‌లో మెథాక్వాలోన్ డ్రగ్స్ మిశ్రమంగా ప్యాక్ చేసి దాచినట్లు తేలింది. ఈ డ్రగ్స్ మార్కెట్ విలువ రూ. 40 కోట్లు ఉందని అధికారులు అంచనా. విశాల్‌కు డబ్బు అవసరమని తెలిసి, నైజీరియన్ గ్యాంగ్ అతన్ని కాంబోడియాకు 'విహారయాత్ర'కు ఆహ్వానించారు. అక్కడి నుంచి తిరిగి వచ్చే సమయంలో ఈ బ్యాగ్‌ను తీసుకెళ్లమని ఆదేశాలు ఇచ్చినట్లు విశాల్ పోలీసులకు చెప్పాడు.                     


"విశాల్ డ్రగ్స్ గురించి తెలియకుండా గ్యాంగ్‌కు బలవంతంగా పని చేసినట్లు కనిపిస్తోంది. అతని ఆర్థిక కష్టాలను ఉపయోగించుకుని గ్యాంగ్ అతన్ని ఉపయోగించుకుంది" అని DRI అధికారి ఒకరు తెలిపారు. విశాల్‌ను నార్కాటిక్స్ డ్రగ్స్ అండ్ సైకోట్రోపిక్ సబ్‌స్టాన్సెస్ (NDPS) చట్టం కింద అరెస్ట్ చేసి, జుడీషియల్ కస్టడీలోకి తీసుకున్నారు. అతని మొబైల్ ఫోన్, ల్యాప్‌టాప్‌లను పరిశీలిస్తున్నారు.  


నైజీరియన్ గ్యాంగ్‌లో భాగంగా చెన్నైలో ఉంటున్న  వారిని పట్టుకోవడానికి ఇంటెలిజెన్స్ బృందాలు ఏర్పాటు చేశారు. "ఈ గ్యాంగ్ చెన్నై, ముంబై, ఢిల్లీ ఎయిర్‌పోర్ట్‌ల ద్వారా డ్రగ్స్ తరలిస్తోంది. విశాల్‌లా చిన్న నటులు, మోడల్స్‌ను ఉపయోగించుకుంటున్నారు" అని పోలీస్  వర్గాలు చెబుతున్నాయి. గ్యాంగ్ సభ్యులు కాంబోడియా, సింగపూర్‌లో బేస్ క్యాంప్‌లు ఏర్పాటు చేసి ఉండవచ్చని అనుమానం  వ్యక్తంచేస్తున్నారు.     



గత జూన్‌లో కోలీవుడ్ నటులు కృష్ణ, శ్రీకాంత్‌లను NDPS చట్టం కింద అరెస్ట్ చేశారు. ఆ దర్యాప్తు నైట్‌క్లబ్ గొడవ నుంచి మొదలై, డ్రగ్స్ పెడ్లింగ్, ఉద్యోగ మోసాలు, భూమి ఆక్రమణల వరకూ వెల్లింది.  మదురైలోని ఆర్మ్డ్ రిజర్వ్ హెడ్ కానిస్టేబుల్ సెంథిల్‌ను కూడా అరెస్ట్ చేశారు.  విశాల్ బ్రహ్మ బాలీవుడ్‌లో చాలా సినిమాల్లో చిన్న పాత్రలు చేసి, డబ్బు సంపాదించలేక కష్టాలు పడుతున్నాడు.ఈ క్రమంలో అతను ఆఫ్రికా డ్రగ్ రాకెట్‌ వలలో చిక్కినట్లుగా తెలుస్తోంది.