Changes brought by RBI in 2023: ఈ సంవత్సరం మరికొన్ని రోజుల్లో ముగుస్తంది. ఇన్వెస్టర్లకు ఈ ఏడాది చాలా మేలు జరిగింది. స్టాక్‌ మార్కెట్‌లోకి వచ్చిన చాలా IPOలు పెట్టుబడిదార్లకు లాభాలు పంచాయి. ద్రవ్యోల్బణం శాంతించింది.  GDP, GST గణాంకాలు గట్టిగా ఉన్నాయి. వీటిని బట్టి, 2024 సంవత్సరం శుభప్రదంగా కొనసాగుతుందన్న సంకేతాలను 2023 ఇస్తోంది. 


ఈ ఏడాది కాలంలో, రిజర్వ్ బ్యాంక్ ఆఫ్ ఇండియా (RBI) కూడా బ్యాంకింగ్ రంగంలో కొన్ని కీలక నిర్ణయాలు తీసుకుంది. వీటిలో 4 నిర్ణయాలపై దేశవ్యాప్తంగా చర్చ జరిగింది, ప్రజల నోళ్లలో ఎక్కువగా నానాయి. ఆ కీలక మార్పులు బ్యాంకింగ్‌ సెక్టార్‌ ‍‌(Banking sector in 2023) దిశను మార్చాయి.


2023లో ఆర్‌బీఐ తీసుకున్న కీలక నిర్ణయాలు:


2000 రూపాయల నోటుకు మంగళం (Withdrawal of 2000 rupees notes)
డీమోనిటైజేషన్ (Demonetization) సమయంలో తీసుకొచ్చిన రూ.2000 నోట్లను ఆర్థిక వ్యవస్థ నుంచి ఆర్‌బీఐ వెనక్కు తీసుకుంది. 2023 మే 19న, రూ.2000 నోట్ల ఉపసంహణ నిర్ణయం తీసుకుంది. అయితే, దీనిని రాత్రికి రాత్రే అమల్లోకి తీసుకురాలేదు. 2000 నోట్లను బ్యాంకులో డిపాజిట్ చేసేందుకు ప్రజలకు 4 నెలల సమయం ఇచ్చింది. 2023 నవంబర్ 30న బిజినెస్‌ ముగిసే నాటికి, చెలామణిలో ఉన్న ₹2000 నోట్లలో 97.26% బ్యాంకుల వద్దకు తిరిగి వచ్చాయి. రూ.9,760 కోట్ల విలువైన రెండు వేల రూపాయల నోట్లు ఇంకా తిరిగి రాలేదు, అవన్నీ ప్రజల దగ్గరే ఉన్నాయి.


మరో ఆసక్తికర కథనం: 2024లో రూ.10 లక్షల్లోపు ధరలో లాంచ్ అయ్యే కార్లు - కొత్త ఫీచర్లు, సూపర్ డిజైన్లు! 


పర్సనల్ లోన్స్‌కు నిరుత్సాహం           
వ్యక్తిగత రుణాలు అన్‌సెక్యూర్డ్ లోన్స్‌ ‍‌(Unsecured Loans) కిందకు వస్తాయి. వీటి వల్ల బ్యాంక్‌లకు రిస్క్‌ ఎక్కువ. గత కొన్నేళ్లుగా ఈ తరహా లోన్స సంఖ్య పెరుగుతుండటంతో, ఆర్‌బీఐ మొదట బ్యాంకింగేతర ఆర్థిక సంస్థలను (NBFCs) హెచ్చరించింది. పర్సనల్ లోన్స్‌ ‍‌(Personal Loans) మీద రిస్క్ వెయిటేజీ పెంచుతూ నిర్ణయం తీసుకుంది. NBFCల రిస్క్ వెయిట్‌ను (Risk weight) 100 నుంచి 125కి పెంచబడింది. దీని వల్ల NBFCల వ్యాపారం ప్రతికూలంగా ప్రభావితమైంది.


UPI లావాదేవీల పరిమితి పెంపు  
ఆర్థిక సేవల్లో డిజిటల్ చెల్లింపులను ప్రోత్సహించడానికి UPI (Unified Payment Interface) లావాదేవీల పరిమితిని RBI పెంచింది. విద్యాసంస్థలు & ఆసుపత్రుల్లో చేసే UPI ఆధారిత లావాదేవీల పరిమితిని రూ. 5 లక్షలకు పెంచింది. అంతకుముందు ఇది రూ.1 లక్షగా ఉంది.


రెపో రేట్‌పై స్టేటస్‌ కో  
తాజాగా, 2023 డిసెంబర్‌లో ద్రవ్య విధానాన్ని (monetary policy) సమీక్షించినప్పుడు, రెపో రేటును (RBI Repo rate) 6.5 శాతం వద్ద RBI యథాతథంగా ఉంచింది. ఆర్‌బీఐ, తన రెపో రేటును స్థిరంగా ఉంచడం ఇది వరుసగా ఐదోసారి. ఓవరాల్‌గా చూస్తే, రెపో రేటు 2023 ఫిబ్రవరిలో మాత్రమే పెరిగింది. దీని కారణంగా, ఆర్థిక రంగంలో స్థిరత్వం ఏర్పడింది.


మరో ఆసక్తికర కథనం: 2024లో బ్యాంకులకు నెలన్నర సెలవులు - ఈ లిస్ట్‌ను బట్టి మీ పనిని ప్లాన్‌ చేసుకోండి