ప్రముఖ వ్యాపార సంస్థ టాటా సన్స్‌ ఆసక్తికర అడుగులు వేయబోతోందని సమాచారం. మెరుగైన కార్పొరేట్‌ పరిపాలన కోసం ప్రత్యేకంగా చీఫ్‌ ఎగ్జిక్యూటివ్‌ ఆఫీసర్‌ (సీఈవో) పోస్టును సృష్టించనుందని తెలిసింది. ఉప్పు నుంచి సాఫ్ట్‌వేర్‌ వరకు అనేక సంస్థలు టాటాసన్స్ పరిధిలో ఉన్న సంగతి తెలిసిందే. ఇప్పుడా సంస్థ వ్యాపార విలువ ఏకంగా 106 బిలియన్‌ డాలర్ల పైమాటే.
కొత్తగా ప్రతిపాదన
ఇప్పటివరకు టాటాసన్స్‌కు ప్రత్యేకంగా సీఈవో లేకపోవడం ఆశ్చర్యకరమే. బోర్డ్‌ ఆఫ్ డైరెక్టర్ల ఛైర్మనే అన్ని బాధ్యతలు చూసుకుంటారు. ప్రస్తుత వ్యాపార ధోరణులు, మార్పులకు అనుగుణంగా సీఈవో పోస్టును సృష్టించాలని భావిస్తోంది. కాగా వాటాదారులు, ఇతర కీలక బాధ్యతలను ఛైర్మనే చూసుకుంటారని బ్లూమ్‌బర్గ్‌ తెలిపింది.
కార్యనిర్వహణ పరంగా టాటాసన్స్‌కు సీఈవో అవసరమే లేదని అంటున్నారు. అనేక సంస్థలు ఈ హోల్డింగ్‌ కంపెనీ పరిధిలోనే ఉన్నా ఇప్పటి వరకు నేరుగా ఎలాంటి ఆపరేషన్స్‌ చేపట్టలేదు. పైగా అది అన్‌లిస్టెడ్‌ కంపెనీ కావడం గమనార్హం. అయితే టాటా ట్రస్టుల ఛైర్మన్‌ ప్రస్తుత ప్రతిపాదనను అధికారికంగా ఆమోదించాల్సి ఉంటుందని విశ్లేషకులు అంటున్నారు.
చంద్రశేఖరన్‌కు పొడగింపు
టాటాసన్స్ మంగళవారమే 103వ వార్షిక సాధారణ సమావేశం (ఏజీఎం) వర్చువల్‌గా నిర్వహించింది. ఫిబ్రవరితో ముగిసిపోనున్న టాటాసన్స్ ఛైర్మన్‌ నటరాజన్‌ చంద్రశేఖరన్ పదవీ కాలాన్ని పొడగించాలని ప్రతిపాదించింది. టాటా గ్రూప్‌ కంపెనీల్లో కీలకమైన టాటా స్టీల్‌ అధినేత టాటా సన్స్‌ సీఈవో అయ్యే అవకాశం ఉందని విశ్వసనీయంగా తెలిసింది. ఇక ఛైర్మన్‌, సీఈవోల బాధ్యతల్లో స్పష్టమైన పని విభజన జరగాల్సి ఉంది. ఎందుకంటే ప్రతి పదవికీ ప్రత్యేకమైన బాధ్యతలు ఉండాల్సిందేనని సెబీ గతంలో తెలపడం గమనార్హం.
సీఈవో నియామకానికి ప్రత్యేక కారణం
టాటా సన్స్‌కు ప్రత్యేకంగా సీఈవోను నియమించడానికి కారణం ఉందని తెలిసింది. రతన్‌ టాటా ఛైర్మన్‌ పదవి నుంచి తప్పుకొన్నప్పుడు సైరస్‌ మిస్త్రీని వారసుడిగా ప్రకటించారు. ఆ తర్వాత మిస్త్రీ సంస్థ నిబంధనలు, విలువలకు వ్యతిరేకంగా ప్రవర్తించారని విమర్శలు వచ్చాయి. ఆ పదవి నుంచి ఉద్వాసన పలికినా మిస్త్రీ న్యాయపోరాటానికి దిగారు. ఈ మధ్య కాలంలో సంస్థ నాయకత్వం ఒడుదొడుకులకు లోనవుతోంది! అనేక అధికార కేంద్రాలు ఏర్పడటం పెట్టుబడిదారుల్లో గందరగోళానికి తెరతీసింది. అందుకే ప్రత్యేకంగా సీఈవో పదవిని సృష్టించేందుకు పూనుకున్నారని తెలిసింది.
కొత్త సీఈవోకు సవాళ్లెన్నో!
టాటాసన్స్ సీఈవోగా ఎంపికయ్యే వ్యక్తి మున్ముందు అనేక సవాళ్లు ఎదుర్కోవాల్సి ఉంటుంది. ప్రస్తుతం టాటా స్టీల్స్‌ పది బిలియన్‌ డాలర్ల నికర అప్పుల్లో ఉంది. ల్యాండ్‌ రోవర్‌ను కొనుగోలు చేసిన టాటా మోటార్స్‌ వరుసగా మూడేళ్ల నుంచి నష్టాలు చవిచూస్తోంది. డిజిటల్‌ రంగంలో టాటా సన్స్‌ తన ముద్ర వేయాలనుకుంటోంది. అంతేకాకుండా నిత్యావసర వస్తువులు, సేవలను విక్రయించే ఆల్‌ ఇన్‌ వన్‌ ఈ కామర్స్‌ యాప్‌ను అభివృద్ధి చేయాలని టాటాసన్స్ నిర్ణయించింది. వాయిదా పడిన ఆ యాప్‌ రూప కల్పనను తిరిగి పట్టాలెక్కించాల్సి ఉంది.