Facebook Layoffs: సోషల్‌ మీడియా వేదిక ఫేస్‌బుక్‌ (Facebook) ఉద్యోగుల సంఖ్యను తగ్గించుకుంటోందని తెలిసింది. గుట్టుచప్పుడు కాకుండా 12,000 మందిని బయటకు పంపిచేస్తోందని సమాచారం. ప్రస్తుతం టెక్నాలజీ కంపెనీలు ఆర్థిక ఇబ్బందులు ఎదుర్కోవడమే ఇందుకు కారణం!
ఈ మధ్యే మెటా అధినేత మార్క్‌ జుకర్‌ బర్గ్‌ స్టాఫ్‌తో ప్రశ్న జవాబుల సెషన్‌ నిర్వహించారు. అంతర్గత సమీక్ష ప్రక్రియలో కంపెనీ వ్యాప్తంగా కనీసం 15 శాతం మందిని ఇంటికి పంపించేందుకు ఎంపిక చేశారు. అంటే దాదాపుగా 12,000 మంది ఉద్యోగాలు కోల్పోతారని సమాచారం. టెక్‌ ఉద్యోగులు ఉపయోగించే బ్లైండ్‌ యాప్‌లో మెటాలో పనిచేసే వ్యక్తి ఉద్యోగ కోతల గురించి పోస్టు చేశారు. కంపెనీల మెయిల్‌ ఐడీలు ఉన్న వారిని మాత్రమే ఇందులో పోస్టు చేసేందుకు అనుమతిస్తారు. 'ఈ 15 శాతం మందిని పిప్స్‌ (పెర్ఫామెన్స్‌ ఇంప్రూవ్‌మెంట్‌ ప్లాన్‌) విభాగంలో ఉంచారు' అని మరొకరు పోస్టు చేశారు.
ఫేస్‌బుక్‌ ఎంప్లాయీ రివ్యూ ప్రాసెస్‌ ప్రకారం 'ఇన్‌ నీడ్‌ ఆఫ్ సపోర్ట్‌' విభాగంలో ఉంచిన వారు నిర్దేశించిన లక్ష్యాలు సాధించడం లేదని అర్థం. అలాంటి వారినే పిప్స్‌ కేటగిరీలో ఉంచి బయటకు పంపించేస్తారు. తాజా రీస్ట్రక్చర్‌తో వేలాది మంది ఈ విభాగంలోకి వస్తున్నారట. 30 రోజుల్లో వీరు కంపెనీలో కొత్త పొజిషన్‌ వెతుక్కోవాలి. లేదా బయటకు వెళ్లిపోవాల్సి ఉంటుంది. ప్రపంచ వ్యాప్తంగా ఆర్థిక మాంద్యం పరిస్థితులు తలెత్తుతుండటంతో మెటా నియామక ప్రక్రియను నిలిపివేసింది. ఉన్న ఉద్యోగులనే ఇతర విభాగాలనూ సర్దుతోంది. యాపిల్‌, మైక్రోసాఫ్ట్‌, గూగుల్‌ వంటి ఇతర టెక్‌ సంస్థలూ ఇదే పనిచేస్తున్నాయి.