PF News: ప్రభుత్వప్రైవేటు సంస్థల్లో పనిచేస్తున్న ఉద్యోగులు తమ యజమాని నుంచి పీఎఫ్ ఖాతాను ఖచ్చితంగా పొందుతారని మనందరికీ తెలిసిందే. అయితే అత్యవసర సమయాల్లో దీని నుంచి చాలా మంది డబ్బును విత్‌డ్రా చేసుకుంటుంటారు. కరోనా కాలంలో చికిత్స కోసం ఈ సొమ్మును తీసుకునేందుకు అవకాశం కల్పించబడిన సంగతి తెలిసిందే. అయితే కొంత సంక్షిష్టంగా ఉన్న డబ్బు విత్ డ్రా ప్రక్రియను ప్రస్తుతం కేంద్ర ప్రభుత్వం సులభరం చేయటం చాలా మందిలో సంతోషాన్ని నింపింది. అయితే ముందుగా డబ్బును ఉపసంహరించుకోవటం వల్ల ఉన్న నష్టాన్ని సైతం ఉద్యోగులు ఇక్కడ గమనించాల్సి ఉంటుంది.
ఎంప్లాయీస్ ప్రావిడెంట్ ఫండ్ ఆర్గనైజేషన్(EPFO) తమ ఖాతాదారులకు ఆరోగ్య సమస్యలకు చికిత్స, విద్య, వివాహం, గృహ కొనుగోలు వంటి అవసరాల కోసం డబ్బును ఉపసంహరించుకునే అనుమతిస్తుందని మనందరికీ తెలిసిందే. అయితే ప్రస్తుతం ఈ ప్రక్రియను సులభరం చేయటం శుభవార్తగా చెప్పుకోవాలి. దీనికోసం ఇక నుంచి ఆటోమేటిక్ క్లెయిమ్ సెటిల్మెంట్ విధానాన్ని ప్రారంభించింది. కొత్త సిస్టం కింద డబ్బులు విత్ డ్రా కోసం అప్లై చేసిన మూడు రోజుల్లోనే ఉద్యోగి బ్యాంక్ ఖాతాలో సొమ్ము జమచేయబడుతుంది. గతంలో ఇందుకోసం దాదాపు రెండు వారాల సమయం పట్టేది. దీంతో అత్యవసర సమయంలో చాలా మంది ఇబ్బందిపడటంతో పాటు విసిగిపోయేవారు.
పీఎఫ్ సభ్యుని అర్హత, క్లెయిమ్ కోసం సమర్పించిన పత్రాలు, KYC స్థితి, చెల్లుబాటు అయ్యే బ్యాంక్ ఖాతా మొదలైనవి ధృవీకరించబడినందున EPFO సాధారణంగా ముందస్తు క్లెయిమ్‌ను సెటిల్ చేయడానికి కొంత సమయం తీసుకుంటుంది. కొన్ని సార్లు క్లెయిమ్ రిజెక్ట్ అవుతుందని తెలిసిందే. అయితే కొత్త విధానం ద్వారా ఇకపై మనుషుల ప్రమేయం పూర్తిగా తొలగించబడనుంది. అయితే ఆటో మోడ్ ద్వారా సెటిల్మెంట్ కోసం పీఫ్ ఖాతాదారులు రూ.లక్ష వరకు విత్‌డ్రా చేసుకోవచ్చు. దీనివల్ల క్లెయిమ్ సెటిల్మెంట్ 3-4 రోజుల్లోనే పూర్తి కానుంది. గతంలో ఈ పరిమితి రూ.50,000 మాత్రమే ఉండేది.
కొత్తగా ఈపీఎఫ్ఓ ప్రవేశపెట్టనున్న ఆటోమేటిక్ సెటిల్మెంట్ ప్రక్రియ కింద క్లెయిమ్స్ తిరస్కరింపబడవు. దీనికి బదులుగా రెండవ స్థాయి విచారణ, ఆమోదం కోసం ఎస్కలేట్ చేయబడి పరిష్కరించబడనుంది. అయితే ఆటో మోడ్‌లో PF ఖాతా నుంచి అడ్వాన్స్ మొత్తాన్ని ఉపసంహరించుకోవడానికి, EPFO e-seva పోర్టల్ ద్వారా దరఖాస్తు చేసుకోవాలి. ఈ క్రమంలో సభ్యుడు ఆన్‌లైన్‌లో ఫారం-31 నింపి సమర్పించడం తప్పనిసరి.
అవసరానికి పీఎఫ్ ఖాతా నుంచి డబ్బులు విత్‌డ్రా ఆమోదయోగ్యమే అయినప్పటికీ.. కొంతమంది తక్కువ రాబడి వస్తుందనే, లేదా ఇతర కారణాలతో అనవసరంగా ఉద్యోగ భవష్యనిధి నుంచి సొమ్మును తీసుకుంటుంటారు. అయితే ఇలా చేయటం వల్ల ఉండే భారీ నష్టం గురించి వారికి తెలియకపోవటం కూడా అందుకు కారణంగా ఉంది. ఖాతాదారులు.. రూ.10 వేలు విత్ డ్రా చేసుకుంటే 20 ఏళ్ల తర్వాత రూ.50 వేలు, 30 ఏళ్ల తర్వాత రూ.లక్ష 14 వేలు నష్టం వాటిల్లుతుంది. అలాగే రూ.20 వేలు విత్ డ్రా చేసుకుంటే 20 ఏళ్ల తర్వాత రూ.1 లక్ష 01 వేలు, 30 ఏళ్ల తర్వాత రూ.2 లక్షల 28 వేలు నష్టపోతారు. అలాగే ఎవరైనా పీఎఫ్ ఖాతా నుంచి ఈరోజు రూ.లక్ష విత్‌డ్రా చేస్తే 20 ఏళ్ల తర్వాత రూ.5 లక్షల 07 వేలు, 30 ఏళ్లలో రూ.11 లక్షల 43 వేలు రాబడిని మిస్ అవుతారు. ఇక్కడ కాంపౌండింగ్ చేసే మాయను వారు మిస్ అవుతారు.